កាលពីថ្ងៃចន្ទ ស.រ.អា. បានដោះលែងអ្នកទោសពីរនាក់ពីមជ្ឈមណ្ឌលឃុំឃាំងរបស់ផងខ្លួននៅឯឆកសមុទ្រ Guantanamo ក្នុងប្រទេសគុយបា ដោយបានបញ្ជូនជនទាំងពីរនាក់នេះទៅកាន់ប្រទេសសេណេហ្គាល់ (Senegal) នាប៉ែកខាងលិចនៃទ្វីបអាហ្វ្រិក។
សេចក្តីថ្លែងការណ៍មួយនៃក្រសួងការពារប្រទេសស.រ.អា.បាននិយាយថា៖ «ស.រ.អា.ដឹងគុណដល់រដ្ឋាភិបាលនៃប្រទេសសេណេហ្គាល់ ចំពោះកាយវិការមនុស្សធម៌របស់ប្រទេសនេះនិងចំណង់របស់ប្រទេសនេះក្នុងការគាំទ្រដល់កិច្ចខិតខំប្រឹងប្រែងរបស់ស.រ.អា.ដើម្បីបិទកន្លែងឃុំឃាំងនេះនៅឯឆកសមុទ្រ Guantanamo»។
បុរសទាំងពីរនាក់នេះដែលគេប្រាប់ថាជាជនជាតិលីប៊ីឈ្មោះ Omar Khalif Mohammed Abu Baker និងឈ្មោះ Salem Abdu Salam Ghereby បានជាប់ឃុំឃាំងនៅក្នុងគុកនេះចំនួន១៤ឆ្នាំដោយគ្មានការចោទប្រកាន់។
Khalif បានកំបុតជើងម្ខាងដោយសារការផ្ទុះគ្រាប់មីនកាលពីឆ្នាំ១៩៩៨ និង Ghereby គឺជាអ្នកប្រឆាំងនឹងបុរសមានអំណាចខ្លាំងនៃប្រទេសលីប៊ីឈ្មោះ Muammar Gaddafi ដែលបានត្រូវទម្លាក់ពីអំណាច។ Khalif ត្រូវបានចាប់ខ្លួននៅក្នុងក្រុង Karachi កាលពីដើមឆ្នាំ២០០២ ចំណែកឯ Ghereby វិញបានត្រូវចាប់ខ្លួនកាលពីចុងឆ្នាំ២០០១ នៅតាមបណ្តោយព្រំដែនរវាងប្រទេស
អាហ្វហ្គានីស្ថាន និងប្រទេសប៉ាគីស្ថាន។ ទីភ្នាក់ងារស.រ.អា. ចំនួន៦ បានពិនិត្យសើរើករណីពួកគេជាថ្មីនៅមុនសម្រេចចិត្តដោះលែងពួកគេទៅកាន់ប្រទេស សេណេហ្គាល់ ដែលជាប្រទេសទី២៦ដែលបានយល់ព្រមទទួលយកពួកអ្នកទោសនៅក្នុងស.រ.អា.។
ការដោះលែងជនពីរនាក់នេះ បានកាត់បន្ថយចំនួនអ្នកទោសនៅក្នុងគុក Guantanamo មកនៅត្រឹម៨៩នាក់ នៅពេលដែលលោកប្រធានាធិបតីស.រ.អា. បារ៉ាក់ អូបាម៉ា បន្តកិច្ចខិតខំប្រឹងប្រែងរបស់លោកដើម្បីបិទគុកនេះនៅមុនលោកចាកចេញពីតំណែងនៅខែមករាឆ្នាំក្រោយ ដែលជាការខិតខំប្រឹងប្រែងមួយមានការជំទាស់ពីពួកសមាជិកសភាស.រ.អា.ខាងគណបក្សសាធារណរដ្ឋ។
មានអ្នកទោសទាំងអស់៧៧៩នាក់បានជាប់ឃុំឃាំងនៅក្នុងគុក Guantanamo ដែលបានត្រូវបង្កើតឡើងដើម្បីឃុំឃាំងពួកជនជាប់សង្ស័យថាជាពួកភេរវជន នៅពេលដែលស.រ.អា. បើកធ្វើកិច្ចប្រតិបត្តិការយោធានៅក្នុងប្រទេសអាហ្វហ្គានីស្ថាន និងប្រទេសអ៊ីរ៉ាក់នៅក្រោយការវាយប្រហារភេរវកម្មក្នុងបូរីញូវយ៉ក និងក្នុងរដ្ឋធានីវ៉ាស៊ីនតោន៕
