ក្រសួងសន្តិសុខមាតុភូមិសហរដ្ឋអាមេរិកបានប្រាប់ឲ្យដឹងនៅក្នុងការចេញផ្សាយព័ត៌មានថា «ប្រទេសមីយ៉ាន់ម៉ានិងឡាវ បានបដិសេធ ឬពន្យារពេលដោយមិនសមហេតុផលក្នុងការបដិសេធមិនទទួលយកពលរដ្ឋរបស់ខ្លួនដែលត្រូវបញ្ជាឲ្យចេញពីសហរដ្ឋអាមេរិក»។
ក្រសួងការបរទេសអាមេរិកកាលពីថ្ងៃអង្គារបានបញ្ជាឲ្យការិយាល័យកុងស៊ុលក្នុងប្រទេសទាំង២នោះចាប់ផ្តើមរឹតត្បិតលើប្រភេទទិដ្ឋាការមួយចំនួន។ ប្រភេទទិដ្ឋាការនោះមានដូចតទៅ៖
ប្រទេសមីយ៉ាន់ម៉ា៖ «ឈប់បន្តចេញរាល់ប្រភេទទិដ្ឋាការ B1 B2 និង B1/B2 ដែលជាប្រភេទទិដ្ឋាការមិនមែនអន្តោប្រវេសន៍ដល់ពួកមន្ត្រីបម្រើការនៅពេលបច្ចុប្បន្ននេះចាប់ពីកម្រិតអគ្គនាយកឡើងទៅ ដែលបម្រើការនៅក្រសួងការងារ និងអន្តោប្រវេសន៍ និងក្រសួងមហាផ្ទៃរបស់មីយ៉ាន់ម៉ា ហើយនិងសមាជិកក្រុមគ្រួសារសាច់ផ្ទាល់ ដោយមានការលើកលែងតិចតួច»។
ប្រទេសឡាវ៖ «ឈប់បន្តចេញរាល់ប្រភេទទិដ្ឋាការ B1 B2,និង B1/B2 ដែលជាប្រភេទទិដ្ឋាការមិនមែនអន្តោប្រវេសន៍សម្រាប់មន្ត្រីបម្រើការនៅពេលបច្ចុប្បន្ននៅកម្រិតអគ្គនាយកឡើងទៅ ដែលបម្រើការនៅក្រសួងសន្តិសុខជាតិឡាវ និងក្រុមគ្រួសារសាច់ផ្ទាល់របស់ពួកគេ ហើយនិងប្រភេទទិដ្ឋាការ A3 និង G5 ដែលជាប្រភេទមិនមែនអន្តោប្រវេសន៍សម្រាប់ (អ្នកការទូតនិងបុគ្គលិករបស់អង្គការអន្តរជាតិ) ដល់បុគ្គលដែលធ្វើការឲ្យពួកមន្ត្រីរដ្ឋាភិបាលឡាវ ដោយមានការលើកលែងតិចតួច។
ការចេញផ្សាយរបស់ក្រសួងសន្តិសុខមាតុភូមិសហរដ្ឋអាមេរិក បានប្រាប់ឲ្យដឹងទៀតថា «ដោយមិនមានការឆ្លើយតបឲ្យបានសមរម្យ» ការដាក់ទណ្ឌកម្មនេះអាចនឹងត្រូវពង្រីកដល់មនុស្សផ្សេងៗទៀត។ ហើយការដាក់ទណ្ឌកម្មនេះ នឹងត្រូវបន្តរហូតទាល់តែក្រសួងសន្តិសុខមាតុភូមិកំណត់ថា «កិច្ចសហប្រតិបត្តិការពីប្រទេស២ស្តីពីការយកពលរដ្ឋខុសច្បាប់ មានការប្រសើរឡើងទៅដល់កម្រិតមួយដែលអាចទទួលយកបាន»។
ទាំងមីយ៉ាន់ម៉ា និងឡាវស្ថិតនៅលើបញ្ជីដែលសហរដ្ឋអាមេរិកកំណត់ថា ជាប្រទេសរឹងរូស។ បញ្ជីនោះរួមមានប្រទេសចំនួន៩ដែលបដិសេធពុំសុខចិត្តទទួលពលរដ្ឋដែលត្រូវនិរទេសចេញពីសហរដ្ឋអាមេរិក។
ការដាក់ទណ្ឌកម្មជាជំហានមួយបន្ថែមពីលើបញ្ជីទណ្ឌកម្មប្រទេសរឹងរូស។ ក្រសួងសន្តិសុខមាតុភូមិសហរដ្ឋអាមេរិកប្រាប់ឲ្យដឹងថា ដោយមិនមានឯកសារធ្វើដំណើរបញ្ជាក់ពីអត្តសញ្ញាណនិងសញ្ជាតិ ក្រសួងនេះមិនអាចបញ្ចប់ដំណើរការនិរទេសខ្លួនពួកគេបានទេ។
ក្រសួងសន្តិសុខមាតុភូមិសហរដ្ឋអាមេរិកបានប្រាប់ឲ្យដឹងទៀតថា «ប្រទេសមីយ៉ាន់ម៉ានិងឡាវ មិនបានបង្កើតបែបបទដើម្បីចេញឯកសារធ្វើដំណើរដល់ពលរដ្ឋរបស់ខ្លួនដែលត្រូវបានបញ្ជាឲ្យចេញពីសហរដ្ឋអាមេរិកនេះទេ។ ដោយមូលហេតុនេះ ទីភ្នាក់ងារអន្តោប្រវេសន៍និងគយសហរដ្ឋអាមេរិក ត្រូវដោះលែងពលរដ្ឋមីយ៉ាន់ម៉ានិងឡាវនៅក្នុងសហរដ្ឋអាមេរិក ដែលអ្នកខ្លះមានទោសព្រហ្មទណ្ឌធ្ងន់ធ្ងរ៕
ប្រែសម្រួលដោយ ជឹង ប៉ូជីន
