ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ប្រទេស​ហៃទី បេលី និង​សាម័រ​មិន​អាច​ស្នើ​សុំ​ទិដ្ឋាការ​ធ្វើការ​បណ្តោះ​អាសន្ន​នៅ​អាមេរិក​បាន​ទៀត​ទេ​


រូបភាពឯកសារ៖ ស្លាក​សញ្ញា​នាយកដ្ឋាន​សន្តិសុខ​ក្នុង​ស្រុកនៅ​ក្នុង​ទីក្រុង​ Fairfax រដ្ឋ Virginia កាលពី​ថ្ងៃទី​២២ កក្កដា ២០១៥៕

ក្រសួង​សន្តិសុខ​មាតុភូមិ​អាមេរិក​បាន​ដក​ប្រទេស ហៃទី ប្រទេស បេលី និង​ប្រទេស​សាម័រ ចេញ​ពី​បញ្ជី​ឈ្មោះ​ប្រទេស​ដែល​ពលរដ្ឋ​អាច​ធ្វើ​ការ​តាមរយៈ​ទិដ្ឋាការ​បណ្តោះ​អាសន្ន​នៅ​ក្នុង​សហរដ្ឋអាមេរិក​បាន។ នេះ​បើ​យោង​តាម​ការ​ប្រកាស​របស់​ក្រសួង​សន្តិសុខ​មាតុភូមិ​កាល​ពី​ថ្ងៃ​ព្រហស្បតិ៍។

បញ្ជី​ឈ្មោះ​ប្រទេស​ដែល​អាច​ស្នើ​សុំ​យក​ទិដ្ឋាការ​ប្រភេទ H-2A និង​ប្រភេទ H-2B សម្រាប់​ធ្វើការ​ក្នុង​អាមេរិក​បណ្តោះ​អាសន្ន​ក្នុង​វិស័យ​កសិកម្ម​ឬ​វិស័យ​មិនមែន​កសិកម្ម​ ដែល​ត្រូវ​បាន​ចេញ​ផ្សាយ​នៅ​ក្នុង​សេចក្តីប្រកាស​បញ្ជី​ឈ្មោះ​សហព័ន្ធ​មួយ ត្រូវ​បាន​ធ្វើ​បច្ចុប្បន្នភាព​ជា​រៀងរាល់​ឆ្នាំ។ បញ្ជី​ឈ្មោះ​ប្រទេស​ចុងក្រោយ​បង្អស់​ដែល​ត្រូវ​បាន​ចេញ​ដោយ​ក្រសួង​សន្តិសុខ​មាតុភូមិ​កាល​ពី​ថ្ងៃ​ពុធ មិន​បាន​ដាក់​បញ្ចូល​ប្រទេស​ទាំង​បី​នោះ​ទេ។ ​

លោកស្រី Katie Waldman អ្នកនាំពាក្យ​ក្រសួង​សន្តិសុខ​មាតុភូមិ បាន​ថ្លែង​ប្រាប់​ VOA ថា «ការ​សម្រេច​ដក​ប្រទេស​ហៃទី បេលី និង​សាម័រ​ចេញ​ពី​បញ្ជី​ឈ្មោះ​ប្រទេស​ដែល​អាច​ស្នើ​សុំ​ទិដ្ឋាការ​ប្រភេទ H-2A និង H-2B ត្រូវ​បាន​ធ្វើ​ឡើង​តាមរយៈ​ការ​សម្រេច​រួម​គ្នា​រវាង​ក្រសួង​សន្តិសុខ​មាតុភូមិ​និង​ក្រសួង​ការបរទេស»។

ក្នុង​ឆ្នាំ​សារពើពន្ធ​២០១៦ ទិដ្ឋាការ​ប្រភេទ H-2A ចំនួន​៦៥​ត្រូវ​បាន​ចេញ​ឲ្យ​ពលរដ្ឋ ហៃទី។ យោង​តាម​របាយការណ៍​មួយ​របស់​ក្រសួង​សន្តិសុខ​មាតុភូមិ​កាល​ពី​ឆ្នាំ​មុន ពលរដ្ឋ​ហៃទី​ប្រមាណ​៤០​ភាគរយ​ដែល​មក​សហរដ្ឋអាមេរិក​តាមរយៈ​ទិដ្ឋាការ​មិនមែន​អន្តោប្រវេសន៍ ដែល​ក្រៅ​ពី​ទិដ្ឋាការ H-2A និង​ H-2B បាន​ស្នាក់នៅ​ក្នុង​សហរដ្ឋអាមេរិក​ហួស​កាល​កំណត់៕

XS
SM
MD
LG