ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ឧត្តមសេនីយ៍​អាមេរិក​ព្រមាន​អ្នកឈ្លានពាន​ថា សម្ពន្ធមិត្ត​ត្រៀម​លក្ខណៈ​ប្រយុទ្ធ​នៅ​អាស៊ី


រូបឯកសារ៖ នាវា​ផ្ទុក​យន្តហោះ USS Ronald Reagan និង​នាវា​ពិឃាត​ឧទ្ធម្ភាគចក្រ​ជប៉ុន JS Hyuga ចេញ​ដំណើរ​ជាមួយ​នាវា ១៦ ផ្សេង​ទៀត​មកពី​អាមេរិក និង​ជប៉ុន នៅ​សមុទ្រ​ហ្វីលីពីន ថ្ងៃទី៨ ខែវិច្ឆិកា ឆ្នាំ២០១៨។
រូបឯកសារ៖ នាវា​ផ្ទុក​យន្តហោះ USS Ronald Reagan និង​នាវា​ពិឃាត​ឧទ្ធម្ភាគចក្រ​ជប៉ុន JS Hyuga ចេញ​ដំណើរ​ជាមួយ​នាវា ១៦ ផ្សេង​ទៀត​មកពី​អាមេរិក និង​ជប៉ុន នៅ​សមុទ្រ​ហ្វីលីពីន ថ្ងៃទី៨ ខែវិច្ឆិកា ឆ្នាំ២០១៨។

កង​កម្លាំង​សហរដ្ឋ​អាមេរិក​ និង​សម្ពន្ធមិត្ត​នៅក្នុង​ទ្វីបអាស៊ី ​បាន​ត្រៀម​ខ្លួនរួច​ជាស្រេច​សម្រាប់​ការប្រយុទ្ធ​ បន្ទាប់ពី​ការធ្វើ​សមយុទ្ធ​រួមគ្នា​ជាច្រើនឆ្នាំ​មកនេះ។

ឧត្តម​សេនីយ៍​អាមេរិក​ម្នាក់​បាន​និយាយ​ដូចនេះ​កាលពី​ថ្ងៃពុធ ​ដោយ​បន្ថែម​ថា​ ការថយក្រោយ​របស់​រុស្ស៊ី​នៅ​អ៊ុយក្រែន​គួរតែ​ជា​ការព្រមាន​ដល់​ពួកឈ្លានពាន​អាស៊ី​ដែល​មាន​បំណង​ ដូចជា​ប្រទេស​ចិន និង ​កូរ៉េ​ខាងជើង។ នេះ​បើតាម​សេចក្តី​រាយការណ៍​របស់​ទីភ្នាក់ងារ​សារព័ត៌មាន​ AP។

សម្ពន្ធមិត្ត​សន្ធិ​សញ្ញា​របស់​សហរដ្ឋ​អាមេរិក​ ដូចជា​ហ្វីលីពីន​ ជប៉ុន ​និង​អូស្ត្រាលី ​ស្ថិត​ក្នុង​ចំណោម​ប្រទេស​ដទៃ​ទៀត​ «បាន​បង្ហាញ​ថា​ពួកគេ​នឹង​រួមគ្នា ​ថា​ពួកគេ​នឹង​មិនឈរ​ស្ងៀម​ចំពោះ​ការឈ្លានពាន​ពី​ប្រទេស​ទាំងនេះ​ទេ​ ដែល​បាន​សម្រេចចិត្ត​ថា​ពួកគេ​ចង់​ផ្លាស់ប្តូរ​សណ្តាប់ធ្នាប់​ពិភពលោក​នៅទីនេះ»។ នេះ​បើ​តាម​ការថ្លែង​របស់​លោកឧត្តម​សេនីយ៍ទោ​ Joseph Ryan។

លោក​បាន​និយាយ​ថា ​ទោះបីជា​អាស៊ី​មិនមាន​សមភាគី​ជាមួយ​អង្គការ​អូតង់​ក៏ដោយ ​ក៏​សម្ពន្ធភាព​យោធា​ដែល​មាន​ប្រទេស​ចំនួន​ ៣០​ ដែល​ភាគច្រើន​ជា​សមាជិក​អឺរ៉ុប​បាន​ប្តេជ្ញា​ការពារ​គ្នា​ទៅវិញទៅមក​ប្រឆាំង​នឹង​ការវាយ​ប្រហារ​ពី​ខាងក្រៅ ​លើ​បណ្តាញ​សម្ពន្ធមិត្ត​សន្ធិសញ្ញា​របស់​សហរដ្ឋ​អាមេរិក ​និង​ដៃគូ​ការពារ​ជាតិ​ដែល​រក្សា​សណ្តាប់ធ្នាប់​អន្តរជាតិ​ដែល​ផ្តល់​នូវ​ការការពារ​ក្នុង​តំបន់។

លោក Ryan ​បាន​ប្រាប់​ទីភ្នាក់ងារ​សារព័ត៌មាន​ The Associated Press ​នៅក្នុង​បទសម្ភាសន៍​មួយ​កាលពី​ថ្ងៃពុធ​ថា៖

«ខ្ញុំ​មាន​ការជំរុញ​ទឹកចិត្ត​ជាខ្លាំង​ចំពោះ​អ្វី​ដែល​ខ្ញុំ​មើល​ឃើញ​ពី​សម្ពន្ធមិត្ត​ និង​ដៃគូ​របស់​យើង​នៅក្នុង​តំបន់​នេះ ​និង​វិធី​ដែល​យើង​បាន​រួមគ្នា​ក្នុង​ការឆ្លើយតប​ទៅនឹង​ការឈ្លានពាន​របស់​ សាធារណរដ្ឋ​ប្រជាមានិត​ចិន ​ដោយ​កូរ៉េ​ខាងជើង​ក្នុង​ការនិយាយ​ថា 'យើង​នឹង​មិន​អនុញ្ញាត​ឱ្យ​រឿង​នេះ​កើតឡើង​នោះ​ទេ»។​

លោក ​Ryan ​ជា​មេបញ្ជាការ​កងពល​ធំ​ថ្មើរជើង​ទី២៥​ របស់​កងទ័ព​សហរដ្ឋ​អាមេរិក​ដែល​មាន​មូលដ្ឋាន​នៅ​រដ្ឋហាវ៉ៃ ​បាន​ស្ថិត​នៅក្នុង​ទីក្រុង​ម៉ានីល​ មួយ​ផ្នែក​សម្រាប់​កិច្ចពិភាក្សា​ជាមួយ​សមភាគី​ហ្វីលីពីន​ មុនពេល​សមយុទ្ធ​ប្រយុទ្ធ​ទ្រង់ទ្រាយ​ធំ​ប្រចាំ​ឆ្នាំ​ចំនួន​ពីរ​ដែលនឹង​រួមបញ្ចូល​សមយុទ្ធ​បាញ់​គ្រាប់​ពិត ​និង​សមយុទ្ធ​វាយប្រហារ​លើដី ​សមុទ្រ ​និង​ផ្លូវ​អាកាស ​ដែល​ពាក់ព័ន្ធ​នឹង​ទាហាន​រាប់​ពាន់​នាក់​របស់​សហរដ្ឋ​អាមេរិក​និង​កងទ័ព​ហ្វីលីពីន​ក្នុង​ខែមីនា ​និង​មេសា៕

XS
SM
MD
LG