កាលពីថ្ងៃទី ២ ខែកុម្ភៈ ប្រធានទីភ្នាក់ងារស៊ើបការណ៍សម្ងាត់សហរដ្ឋអាមេរិក (CIA) លោក William Burns បាននិយាយថា គេមិនគួរមើលស្រាលមហិច្ឆតារបស់ប្រធានាធិបតីចិនលោក Xi Jinping ចំពោះកោះតៃវ៉ាន់នោះទេ បើទោះបីជាលោក Xi ទំនងជាមិននិយាយអ្វីអំពីប្រតិបត្តិការរបស់កងយោធារុស្ស៊ីនៅក្នុងប្រទេសអ៊ុយក្រែនក៏ដោយ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
លោក Burns បាននិយាយថា សហរដ្ឋអាមេរិកដឹង «តាមការស៊ើបការណ៍សម្ងាត់» ថា លោក Xi បានបញ្ជាឱ្យកងយោធារបស់លោកត្រៀមលក្ខណៈធ្វើការលុកលុយកោះតៃវ៉ាន់នៅត្រឹមឆ្នាំ ២០២៧ ខាងមុខ។
លោក Burns បានថ្លែងប្រាប់ការប្រជុំមួយនៅសាកលវិទ្យាល័យ Georgetown ក្នុងរដ្ឋធានីវ៉ាស៊ីនតោន សហរដ្ឋអាមេរិកថា៖ «នៅពេលនេះ ករណីនេះមិនមែនមានន័យថាលោក Xi បានសម្រេចធ្វើការលុកលុយនៅក្នុងឆ្នាំ ២០២៧ ឬនៅឆ្នាំណាមួយទៀតនោះទេ ប៉ុន្តែនេះគឺជាការរំឭកអំពីការផ្តោតនិងអំពីមហិច្ឆតារបស់លោក Xi»។
លោកបានបញ្ជាក់បន្តថា៖ «ការវាយតម្លៃរបស់យើងនៅទីភ្នាក់ងារ CIA គឺថា ខ្ញុំមិនមើលស្រាលមហិច្ឆតារបស់លោក Xi ទេទាក់ទិននឹងរឿងតៃវ៉ាន់»។
លោកបានបន្ថែមថា មេដឹកនាំចិនរូបនេះហាក់ដូចជា «ភ្ញាក់ផ្អើលនិងមួម៉ៅ» ហើយព្យាយាមទាញយកមេរៀនពី «កិច្ចប្រតិបត្តិការមិនដំណើរការល្អ» របស់កងយោធារុស្ស៊ីនិងប្រព័ន្ធអាវុធរបស់រុស្ស៊ីនៅក្នុងប្រទេសអ៊ុយក្រែន។
រុស្ស៊ីនិងចិនបានចុះហត្ថលេខាលើកិច្ចព្រមព្រៀងភាពដៃគូ «គ្មានកម្រិត» កាលពីខែកុម្ភៈឆ្នាំមុន គឺក្នុងពេលមិនយូរប៉ុន្មានមុនពេលកងកម្លាំងរបស់រុស្ស៊ីចូលលុកលុយប្រទេសអ៊ុយក្រែន ហើយទំនាក់ទំនងសេដ្ឋកិច្ចរវាងប្រទេសទាំងពីរនេះបានរីកចម្រើននៅពេលដែលទំនាក់ទំនងរបស់រុស្ស៊ីជាមួយក្រុមបស្ចិមប្រទេសបានធ្លាក់ចុះ។
ការឈ្លានពានរបស់រុស្ស៊ីនៅអ៊ុយក្រែនបានធ្វើឱ្យបណ្ដាបស្ចិមប្រទេសកាន់តែមានក្ដីកង្វល់ថា ប្រទេសចិនអាចមានវិធានការស្រដៀងគ្នានេះលើកោះតៃវ៉ាន់ដែលជាកោះកាន់លទ្ធិប្រជាធិបតេយ្យដែលរដ្ឋាភិបាលចិនអះអាងថាជាដែនដីរបស់ខ្លួន។
កន្លងមក ចិនមិនបានថ្កោលទោសកិច្ចប្រតិបត្តិការរបស់រុស្ស៊ីលើអ៊ុយក្រែនទេ ប៉ុន្តែមានការប្រុងប្រយ័ត្នមិនផ្តល់ការគាំទ្រខាងសម្ភារដោយផ្ទាល់ណាមួយដែលអាចនាំឱ្យមានការដាក់ទណ្ឌកម្មពីក្រុមបស្ចិមប្រទេសដូចទណ្ឌកម្មដែលត្រូវបានដាក់លើរុស្ស៊ីដែរ។
លោក Burns បាននិយាយថា៖ «ខ្ញុំយល់ថា វាគឺជាកំហុសមួយដែលមើលស្រាលលើការតាំងចិត្តទៅវិញទៅមកវវាងចិននិងរុស្ស៊ីចំពោះភាពជាដៃគូនេះ ប៉ុន្តែវាមិនមែនជាមិត្តភាពដែលគ្មានកម្រិតទាំងស្រុងនោះទេ»។
លោក Burns បានហៅប្រទេសចិនថាជា «ឧបសគ្គភូមិសាស្ត្រនយោបាយដ៏ធំបំផុត» ដែលសហរដ្ឋអាមេរិកប្រឈមជាមួយ។
លោកបាននិយាយដូច្នេះថា៖ «ការប្រកួតប្រជែងជាមួយប្រទេសចិនមានលក្ខណៈពិសេស ហើយវាមានស្ទើរតែក្នុងគ្រប់ផ្នែកទាំងអស់ មិនមែនតែក្នុងផ្នែកយោធាប៉ុណ្ណោះទេ ប៉ុន្តែថែមទាំងក្នុងផ្នែកមនោគមវិជ្ជា សេដ្ឋកិច្ច បច្ចេកវិទ្យា ដែនអ៊ីនធឺណិត និងផ្នែកអវកាសទៀតផង។ វាគឺជាការប្រកួតប្រជែងសាកលដែលខ្លាំងជាងការប្រកួតប្រជែងជាមួយពួកសូវៀតកាលពីពេលមុនទៅទៀត»។
គេមិនទាន់ឃើញមានប្រតិកម្មបន្ទាន់ណាមួយពីស្ថានទូតចិននៅរដ្ឋធានីវ៉ាស៊ីនតោននៅឡើយទេទាក់ទិននឹងការលើកឡើងទាំងនេះរបស់លោក Burns៕
ប្រែសម្រួលដោយលោក ឈឹម សុមេធ
