ដំណើរទស្សនកិច្ចនេះ បានចាប់ផ្តើមនៅពេលដែលសហរដ្ឋអាមេរិក បានដកខ្លួនចេញពីសន្ធិសញ្ញាត្រួតត្រាអាវុធដែលមានចំណាស់រាប់ទសវត្សរ៍ជាមួយប្រទេសរុស្ស៊ី។ ការដកខ្លួនចេញនេះ មានន័យថា រដ្ឋាភិបាលក្រុងវ៉ាស៊ីនតោននិងរដ្ឋាភិបាលក្រុងមូស្គូ អាចផលិតដោយសេរីនូវកាំជ្រួចមីស៊ីលដែលបាញ់ពីដីដែលមានល្បឿនពី៥រយគីឡូម៉ែត្រទៅ៥ពាន់៥រយគីឡូម៉ែត្រ។ ហើយការដកខ្លួនរបស់សហរដ្ឋអាមេរិកនេះ អាចជាព័ត៌មានអាក្រក់សម្រាប់ប្រទេសដែលមិនស្ថិតនៅជាផ្នែកមួយនៃសន្ធិសញ្ញានេះគឺប្រទេសចិន។
រដ្ឋមន្ត្រីការពារប្រទេសសហរដ្ឋអាមេរិកថ្មីលោក Mark Esper បាននិយាយថា លោកចង់ឃើញមានកាំជ្រួចមីស៊ីវង់ប្រតិបត្តិការមធ្យមដែលបាញ់ពីដីរបស់សហរដ្ឋអាមេរិកនៅក្នុងទ្វីបអាស៊ី កាំជ្រួចមីស៊ីលត្រូវបានគេហាមឃាត់កាលពីពេលមុន។ លោករដ្ឋមន្រ្តីការពារប្រទេស Esper បានថ្លែងថា៖ «បាទ! ខ្ញុំ ចង់ដាក់ពង្រាយអាវុធនៅអាស៊ី។ តែខ្ញុំសូមបញ្ចាក់ឲ្យច្បាស់។ ខ្ញុំកំពុងនិយាយអំពីអាវុធធម្មតា»។
ការដាក់ពង្រាយអាវុធនេះ នឹងពង្រឹងជំហរបស់សហរដ្ឋអាមេរិកប្រឆាំងនឹងឥទ្ធិពលកាន់តែកើនឡើងរបស់ចិន។ លោករដ្ឋមន្រ្តីការពារប្រទេសអាមេរិក Esper បានថ្លែងទៀតថា៖ «យើងបានពិភាក្សាអំពីបញ្ហានេះមួយរយៈពេលហើយ ហើយខ្ញុំចង់និយាយថា ៨០ភាគរយនៃបញ្ជីសារពើភ័ណ្ឌ គឺជាប្រព័ន្ធកម្លាំងនុយក្លេអ៊ែរវង់ប្រតិបត្តិការមធ្យម ឬ INF។ ដូច្នេះការណ៍នេះមិនធ្វើឲ្យពួកគេភ្ញាក់ផ្អើលទេថា យើងចង់មានអាវុធដែលមានសមត្ថភាពប្រហាក់ប្រហែលគ្នានោះ»។
អ្នកជំនាញនិយាយថា ក្នុងពេលមានជម្លោះជាមួយចិន សមត្ថភាពយោធាកាន់តែខ្លាំងឡើងរបស់សហរដ្ឋអាមេរិក មាននៅក្នុងតំបន់អាស៊ីប៉ាស៊ីហ្វិករួចហើយដែលវាជាការប្រសើរ។
ពួកអ្នកជំនាញដូចជាលោក Bradley Bowman នៃមូលនិធិសម្រាប់ការពារលទ្ធិប្រជាធិបតេយ្យ និយាយថា នៅពេលមានជម្លោះជាមួយចិន សមត្ថភាពយោធាកាន់តែខ្លាំងឡើងរបស់សហរដ្ឋអាមេរិក មាននៅក្នុងតំបន់អាស៊ីប៉ាស៊ីហ្វិករួចហើយដែលជាការប្រសើរ។ លោក បានថ្លែងថា៖ «យើង ចាំបាច់ចែកចាយអាវុធទាំងនោះ ហើយ យើងត្រូវការមានអាវុធទាំងនោះនៅក្នុងតំបន់នៅពេលដែលជម្លោះកើតមានឡើង។ គំនិតដែលថា យើងនឹងចំណាយពេលដូចដែលយើង បានធ្វើនៅក្នុងសង្គ្រាមឈូងសមុទ្រពែកកាលពីដំបូង រាប់សប្តាហ៍ ឬរាប់ខែដើម្បីបញ្ជូនយន្តហោះដឹកទំនិញយ៉ាងធំ និងកប៉ាល់ដឹកទំនិញឆ្លងកាត់មហាសមុទ្រដើម្បីចូលរួមក្នុងសង្គ្រាមនោះនឹងមិនមានទេ»។
ការអញ្ជើញទៅដល់របស់លោក Esper នៅក្នុងប្រទេសអូស្ត្រាលីកាលពីថ្ងៃសៅរ៍សប្តាហ៍មុន បានកើតមានឡើងទើបតែ២ថ្ងៃ បន្ទាប់ពីកូរ៉េខាងជើង បានធ្វើការសាកល្បងកាំជ្រួចមីស៊ីលលើកទី៣របស់ខ្លួនមិនដល់២សប្តាហ៍ផង ដោយបានបាញ់ទៅលើអ្វីដែលទំនងជាកាំជ្រួចមីស៊ីលផ្លោងវង់ប្រតិបត្តិការខ្លីដែលមានសមត្ថភាពបាញ់ដល់ទីក្រុងសេអ៊ូល ឬទីក្រុងតូក្យូ។ លោក Rudy deLeon នៃមជ្ឈមណ្ឌល American Progress បានថ្លែងថា៖ «សហរដ្ឋអាមេរិក មានមូលដ្ឋានយោធាទាំងនោះនៅក្នុងប្រទេសជប៉ុនដែលនឹងក្លាយជាផ្លូវហោះហើររបស់កាំជ្រួចទាំងនោះដែលគេបានសាកល្បង។ដូច្នេះ នេះជាការគំរាមកំហែងដោយចេតនាពិតប្រាកដមួយ»។
លោករដ្ឋមន្ត្រីការពារប្រទេស Esper បាននិយាយសម្រាលការគំរាមកំហែងនោះកាលពីថ្ងៃសៅរ៍ ដោយបានប្រាប់ពួកអ្នកយកព័ត៌មានថា ស្ថានភាពជាមួយកូរ៉េខាងជើង មានស្ថិរភាពកាលពីបីបួនឆ្នាំមុន នៅពេលដែលរដ្ឋាភិបាលក្រុងព្យុងយ៉ាង បានសាកល្បងកាំជ្រួចមីស៊ីលចំនួន១៧ដង រួមមានការសាកល្បងកាំជ្រួចអន្តរទ្វីបផង៕
ប្រែសម្រួលដោយជឹង ប៉ូជីន
