រដ្ឋមន្ត្រីការពារជាតិសហរដ្ឋអាមេរិកលោក Lloyd Austin បាននិយាយនៅថ្ងៃចន្ទនេះថា ប្រសិនបើទាហានរុស្ស៊ីអាចដណ្ដើមត្រួតត្រាទីក្រុង Bakhmut នៅភាគខាងកើតប្រទេសអ៊ុយក្រែនបាន នោះវាមិនតំណាងឱ្យការផ្លាស់ប្ដូរទាំងស្រុងនៅក្នុងសង្គ្រាមនេះទេ។
លោក Austin បានប្រាប់អ្នកយកព័ត៌មានក្នុងអំឡុងពេលលោកធ្វើទស្សនកិច្ចទៅកាន់ប្រទេសហ្ស៊កដានីថា៖ «ខ្ញុំគិតថាវាមានគុណតម្លៃផ្នែកនិមិត្តរូបច្រើនជាងគុណតម្លៃផ្នែកយុទ្ធសាស្ត្រនិងផ្នែកប្រតិបត្តិការ»។
ទីក្រុង Bakhmut គឺជាទីតាំងនៃការវាយប្រយុទ្ធគ្នាខ្លាំងក្លាអស់រយៈពេលជាច្រើនខែមកហើយ ដោយរុស្ស៊ីជំរុញទៅមុខដើម្បីដណ្ដើមត្រួតត្រាទីក្រុងនេះនៅក្នុងខេត្ត Donetsk របស់ប្រទេសអ៊ុយក្រែន។
លោក Austin បាននិយាយនៅថ្ងៃចន្ទនេះថា លោកមិនយល់ឃើញថាការសម្រេចចិត្តរបស់អ៊ុយក្រែននៅក្នុងការផ្លាស់ទីកងទ័ពទៅភាគខាងលិចនៃទីក្រុងនេះថាជាដំណើរបង្អាក់ផ្នែកយុទ្ធសាស្ត្រសម្រាប់អ៊ុយក្រែននោះទេ។
ជាងនេះទៀត នៅថ្ងៃចន្ទនេះដែរ យោធាអ៊ុយក្រែនបានរាយការណ៍ថារុស្ស៊ីបានវាយប្រហារជុំថ្មីដោយប្រើដ្រូនដែលផលិតនៅប្រទេសអ៊ីរ៉ង់។
ក្រសួងការពារជាតិអ៊ុយក្រែនបានបញ្ជាក់នៅលើ Twitter ថា កងទ័ពអ៊ុយក្រែនបានបាញ់ទម្លាក់ដ្រូន ១៣ គ្រឿងក្នុងចំណោមដ្រូនទាំង ១៥ គ្រឿងនៅក្នុងការវាយប្រហារជុំថ្មីរបស់រុស្ស៊ីនោះ។
រុស្ស៊ីបានប្រើដ្រូន Shahed ដើម្បីបំបុកចំគោលដៅនៅតាមតំបន់នានានៅទូទាំងប្រទេសអ៊ុយក្រែន ដែលក្នុងនោះរួមមានទាំងទីតាំងហេដ្ឋារចនាសម្ព័ន្ធផ្សេងៗផងដែរ។
ស្របពេលនេះដែរ រុស្ស៊ីបានបញ្ជាក់ថា រដ្ឋមន្ត្រីការពារជាតិរបស់ខ្លួនលោក Sergei Shoigu បានទៅសួរសុខទុក្ខទាហានរុស្ស៊ីនិងធ្វើទស្សនកិច្ចនៅមន្ទីរពេទ្យមួយកន្លែងនៅភាគខាងត្បូងប្រទេសអ៊ុយក្រែននៅថ្ងៃចន្ទនេះ។
ក្រសួងការពារជាតិរុស្ស៊ីបានបញ្ជាក់ថា ដំណើរទស្សនកិច្ចរបស់លោក Shoigu ទៅកាន់ទីក្រុង Mariupol នេះរួមមានផងដែរនូវការធ្វើដំណើរទស្សនាទីក្រុងនេះដែលត្រូវបានរុស្ស៊ីវាយកម្ទេចចោលក្នុងពេលកន្លងមក ដើម្បីមើលការខុសត្រូវលើកិច្ចប្រឹងប្រែងកសាងទីក្រុងឡើងវិញ។ ក្រសួងនេះមិនបានបញ្ជាក់ឱ្យបានច្បាស់ថាដំណើរទស្សនកិច្ចនេះបានធ្វើឡើងនៅពេលណានោះទេ៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារព័ត៌មាន AP និង Reuters។
