ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រដ្ឋ​មន្ត្រី​ការពារ​ជាតិ​អាមេរិក​និង​ចិន​សន្ទនា​គ្នា​នៅ​កិច្ចប្រជុំ​សន្តិសុខ​កំពូល​របស់​អាស៊ី


រដ្ឋមន្ត្រី​ការពារ​ជាតិ​សហរដ្ឋ​អាមេរិក​លោក​ Lloyd Austin (ស្តាំ) ចាប់ដៃ​ជាមួយ​រដ្ឋមន្ត្រី​ការពារ​ជាតិ​​ចិន​លោក Li Shangfu នៅ​ឯ​កិច្ចប្រជុំ​ Shangri La Dialogue ដែល​ជា​កិច្ចប្រជុំ​សន្តិសុខ​កំពូល​របស់​អាស៊ី នៅ​ប្រទេស​សិង្ហបុរី កាល​ពី​ថ្ងៃ​ទី​២ ខែ​មិថុនា ឆ្នាំ​២០២៣។
រដ្ឋមន្ត្រី​ការពារ​ជាតិ​សហរដ្ឋ​អាមេរិក​លោក​ Lloyd Austin (ស្តាំ) ចាប់ដៃ​ជាមួយ​រដ្ឋមន្ត្រី​ការពារ​ជាតិ​​ចិន​លោក Li Shangfu នៅ​ឯ​កិច្ចប្រជុំ​ Shangri La Dialogue ដែល​ជា​កិច្ចប្រជុំ​សន្តិសុខ​កំពូល​របស់​អាស៊ី នៅ​ប្រទេស​សិង្ហបុរី កាល​ពី​ថ្ងៃ​ទី​២ ខែ​មិថុនា ឆ្នាំ​២០២៣។

រដ្ឋ​មន្ត្រី​ការពារ​ជាតិចិនបាន​សន្ទនា​ផ្ទាល់​ជាមួយ​រដ្ឋមន្ត្រី​ការពារ​ជាតិ​សហរដ្ឋ​អាមេរិក​លោក​ Lloyd Austin ដែល​នេះ​អាចជា​សញ្ញានៃ​ការ​ធូរស្រាល​ខ្លះ​ក្នុង​ទំនាក់ទំនង​រវាង​ប្រទេស​ទាំង​ពីរ​ ក្រោយពី​រដ្ឋាភិបាល​ទីក្រុង​ប៉េកាំង​បដិសេធ​សំណើ​សុំជួប​ប្រជុំ​ជា​ច្រើន​លើក​ពី​សហរដ្ឋ​អាមេរិក។​

ការ​សន្ទនា​គ្នា​ដ៏​ខ្លី​នេះរវាង​លោក Austin និង​រដ្ឋមន្ត្រី​ការពារ​ជាតិ​ចិន​លោក Li Shangfu បាន​កើត​មាន​ឡើង​កាល​ពី​យប់​ថ្ងៃ​សុក្រ នៅ​ពិធី​បើក​នៃ​កិច្ចប្រជុំ​សន្តិសុខ Shangri La Dialogue នៅ​ប្រទេស​សិង្ហបុរី។ អ្នកនាំ​ពាក្យ​ក្រសួង​ការពារជាតិ​អាមេរិក លោក​ឧត្តមសេនីយ៍​ត្រី Pat Ryder ថ្លែង​ថា លោក Austin និង​លោក Li «បាន​សន្ទនា​គ្នា​មួយ​ភ្លែត»។​

លោក Ryder បន្ថែម​ក្នុង​សេចក្តី​ថ្លែងការណ៍​មួយ​ថា៖ «មេដឹកនាំ​ទាំង​ពីរ​បាន​ចាប់​ដៃ​គ្នា ប៉ុន្តែ​មិន​បាន​សន្ទនា​គ្នា​ស៊ី​ជម្រៅ​ទេ‍»។

ភាព​តានតឹង​រវាង​យោធា​សហរដ្ឋ​អាមេរិក​និង​យោធា​ចិន​បាន​កើន​ឡើង​ជា​បន្តបន្ទាប់ ចាប់តាំង​ពី​សហរដ្ឋ​អាមេរិក​បាន​រក​ឃើញ​និង​បាញ់​ទម្លាក់​នូវ​អ្វី​ដែល​ខ្លួន​ថា​ ជា​បាឡុង​ឈ្លប​យកការណ៍​របស់​ចិន ដែល​បាន​ហោះ​ នៅ​ក្បែរ​ឆ្នេរ​សមុទ្រ​រដ្ឋ​ South Carolina ក្រោយ​ពី​បាឡុង​នោះ​បាន​ហោះ​ឆ្លង​កាត់​ពី​លើ​ដែនដី​សហរដ្ឋ​អាមេរិក​ស្ទើរតែ​ទាំង​មូល។

មន្ត្រី​ក្រសួង​ការពារជាតិ​សហរដ្ឋ​អាមេរិក បាន​និយាយ​ថា​ពួក​គេ​បាន​ស្នើ​សុំ​សន្ទនា​តាម​ទូរស័ព្ទ​ភ្លាមៗ​ក្រោយ​ការ​បាញ់ទម្លាក់​បាឡុង​នោះ ប៉ុន្តែ​ថា ការ​ស្នើសុំ​នោះ និង​ការ​ស្នើសុំស្រដៀង​គ្នា​នេះ​ជា​បន្តបន្ទាប់​មក ត្រូវ​បាន​ភាគី​ចិន​បដិសេធ។

នៅ​ពេល​ថ្មីៗ​កន្លង​ទៅ​នេះ មន្ត្រី​យោធា​អាមេរិក​បាន​ព្រមាន​អំពី​«ការ​កើនឡើង​ដ៏​គួរឱ្យ​បារម្ភ‍»​នូវ​សកម្មភាព​គឃ្លើន​របស់​ចិន​នៅ​លើ​អាកាស​និង​ក្នុង​សមុទ្រ ដែល​រួម​មាន​សកម្មភាព​មួយ​ដែល​មន្ត្រី​អាមេរិក​ពណ៌នា​ថា​ជា​ការ​ហោះ​មក​ស្ទាក់​«ដ៏​គ្រោះថ្នាក់‍» របស់​យន្តហោះ​ប្រតិកម្ម​ចិន មក​ក្បែរ​យន្តហោះ​យោធា RC-135 របស់​សហរដ្ឋអាមេរិក ពី​លើ​ដែន​សមុទ្រ​ចិន​ខាង​ត្បូង។​

ក្រុម​មន្ត្រី​អាមេរិក​សង្កត់​ធ្ងន់​ថា ឧប្បត្តិហេតុ​ទាំង​នេះ​បង្ហាញ​កាន់​តែ​ខ្លាំង​អំពី​ភាព​ចាំបាច់ឱ្យ​មាន​ការ​
សន្ទនា​គ្នា​ច្រើន​ជាង​មុន។ លោក Ryder ​ថ្លែង​ថា៖ «ក្រសួង​[ការពារជាតិ​អាមេរិក] ជឿជាក់​លើ​ការ​រក្សា​សារគមនាគមន៍​រវាង​យោធា​និង​យោធា ជាមួយ​[សាធារណរដ្ឋ​ប្រជាមាណិត​ចិន] ហើយ​ក្រសួង​នឹង​បន្ត​ស្វះស្វែងរក​ការ​ពិភាក្សា​គ្នារវាង​យោធា​និង​យោធា នៅ​គ្រប់​កម្រិត ដើម្បី​គ្រប់គ្រង​ទំនាក់ទំនង​នេះ​ដោយ​ការទទួល​ខុស​ត្រូវ‍»។

គេ​មិន​ច្បាស់​ថា​ តើនឹង​មាន​ការ​សន្ទនា​គ្នា​បន្ថែម​ទៀត​រវាង​លោក Austin និង លោក Li ត្រូវ​បាន​គ្រោង​រៀបចំ​ឡើងនៅ​ក្នុងពេល​វេលា​សេសសល់​នៃ​កិច្ចប្រជុំ Shangri La Dialogue ដែរ​ឬ​ទេ។

លោក Austin គ្រោងនឹង​ថ្លែងសុន្ទរកថា​ទៅ​កាន់​អ្នក​ចូលរួមកិច្ចប្រជុំ​នេះ​ នៅ​ថ្ងៃ​សៅរ៍ ហើយ​លោក Li គ្រោង​នឹង​ថ្លែង​សុន្ទរកថា​នៅ​ថ្ងៃ​អាទិត្យ។ កិច្ច​ពិភាក្សា​ប្រចាំ​ឆ្នាំ Shangri La Dialogue នេះ ត្រូវ​បាន​ចាត់​ទុក​ថា​ជា​កិច្ច​ប្រជុំ​កំពូល​ខាង​សន្តិសុខ​ចម្បង​នៅ​ទ្វីប​អាស៊ី ដោយ​មាន​ការ​ចូលរួម​ពី​រដ្ឋមន្ត្រី​ការពារ​ជាតិ និង​អ្នក​នយោបាយ ហើយ​ក៏​មាន​ការ​ចូលរួម​ពី​មន្ត្រី​យោធា​ជាន់​ខ្ពស់ អ្នក​ការទូត អ្នក​ផលិត​អាវុធ និង​អ្នក​វិភាគ​ខាង​សន្តិសុខ​អន្តរជាតិ​ពី​តំបន់​អាស៊ីប៉ាស៊ីហ្វិក អឺរ៉ុប និង​អាមេរិក​ខាង​ជើង។ កិច្ច​ប្រជុំ​កំពូល​នេះ​កំពុង​ប្រព្រឹត្ត​ក្នុង​បរិបទ​នៃ​ភាព​តានតឹង​នៅ​អន្តរជាតិ​នានា រួម​មាន​ការ​ឈ្លានពាន​របស់​រុស្ស៊ី​លើ​អ៊ុយក្រែន ការ​គាំទ្រ​របស់​ចិន​ចំពោះ​រុស្ស៊ី និង​សកម្មភាព​កាន់​តែ​គឃ្លើន​ឡើង​របស់​ចិន​ប្រឆាំង​នឹង​កោះ​តៃវ៉ាន់៕

ប្រែ​សម្រួល​ដោយ សឹង សុផាត

អត្ថបទ​ទាក់ទង

XS
SM
MD
LG