រដ្ឋមន្ត្រីក្រសួងពាណិជ្ជកម្មអាមេរិកអ្នកស្រី Gina Raimondo បានជួបជាមួយសមភាគីចិនរបស់អ្នកស្រី គឺលោក Wang Wentao កាលពីថ្ងៃព្រហស្បតិ៍ ទី២៥ ខែឧសភា ដែលនេះជាកិច្ចប្រជុំកម្រិតគណៈរដ្ឋមន្ត្រីលើកដំបូងក្នុងរយៈពេលប៉ុន្មានខែរវាងប្រទេសដែលមានសេដ្ឋកិច្ចធំបំផុតក្នុងពិភពលោកទាំង២។
ភាគីទាំងពីរបានលើកឡើងពីគោលនយោបាយនាំចេញ ពាណិជ្ជកម្ម និងបញ្ហាវិនិយោគដែលធ្វើឱ្យទំនាក់ទំនងទ្វេភាគីមានភាពតានតឹង ក្នុងកិច្ចសន្ទនាមួយដែលការិយាល័យរបស់អ្នកស្រី Raimondo បានពិពណ៌នាថា «មានភាពស្មោះត្រង់និងសំខាន់»។
លោក Wang ក៏បានជួបជាមួយតំណាងពាណិជ្ជកម្មសហរដ្ឋអាមេរិកអ្នកស្រី Katherine Tai នៅក្រៅកិច្ចប្រជុំរដ្ឋមន្ត្រីពាណិជ្ជកម្មនៃវេទិកាសេដ្ឋកិច្ចអាស៊ីប៉ាស៊ីហ្វិកកាលពីថ្ងៃសុក្រនៅទីក្រុង Detroit រដ្ឋ Michigan ផងដែរ។
កិច្ចប្រជុំបានធ្វើឡើងប៉ុន្មានថ្ងៃបន្ទាប់ពីលោកប្រធានាធិបតី Joe Biden បានបង្ហាញពីភាពរកាំរកូសក្នុងទំនាក់ទំនងមួយដែលមានភាពតានតឹង ចាប់តាំងពីពេលដែលយន្តហោះចម្បាំងរបស់សហរដ្ឋអាមេរិកបានបាញ់ទម្លាក់បាឡុងចារកម្មរបស់ចិននៅលើទឹកដីអាមេរិកកាលពីខែកុម្ភៈ ដែលជាឧប្បត្តិហេតុមួយបានបង្កឱ្យមានភាពច្របូកច្របល់រវាងភាគីទាំងពីរ និងបណ្តាលឱ្យមានការលុបចោលដំណើរទស្សនកិច្ចដែលបានគ្រោងទុករបស់រដ្ឋមន្ត្រីការបរទេសលោក Antony Blinken ទៅកាន់ទីក្រុងប៉េកាំងផងដែរ។
ទោះជាយ៉ាងនេះក្តី នៅក្នុងកិច្ចប្រជុំថ្ងៃទី១០ ដល់ថ្ងៃទី១១ ខែឧសភា រវាងទីប្រឹក្សាសន្តិសុខជាតិរបស់សេតវិមាន លោក Jake Sullivan និងអ្នកការទូតកំពូលរបស់បក្សកុម្មុយនិស្តលោក Wang Yi ភាគីទាំងពីរទំនងជាបានទុកបញ្ហានេះឱ្យនៅមួយឡែកសិន។
លោក Sullivan បានប្រាប់ VOA ក្នុងអំឡុងសន្និសីទសារព័ត៌មានថ្ងៃទី១៧ ខែឧសភាថា ការបាញ់ទម្លាក់បាឡុងគឺជា«សារយ៉ាងច្បាស់មួយថា យើងនឹងមិនអត់ឱនចំពោះការរំលោភបំពានដែនអាកាសរបស់សហរដ្ឋអាមេរិកទេ។ យើងបានបញ្ជាក់ជំហររបស់យើង»។
ហេតុអ្វីនៅពេលនេះ?
អ្នកស្រី Yun Sun នាយកកម្មវិធីចិននៅមជ្ឈមណ្ឌល Stimson បានថ្លែងថា លើសពីការចង់បង្ហាញថាខ្លួនអាចគ្រប់គ្រងការប្រកួតប្រជែងមហាអំណាចជាមួយប្រទេសចិននិងស្វែងរកកិច្ចសហប្រតិបត្តិការលើបញ្ហាផ្សេងៗរាប់ចាប់ពីការប្រយុទ្ធប្រឆាំងនឹងការប្រែប្រួលអាកាសធាតុ រហូតដល់ការបញ្ឈប់ការជួញដូរសារធាតុ fentanyl រដ្ឋាភិបាលក្រុងវ៉ាស៊ីនតោនដ៏ចង់ឱ្យរដ្ឋាភិបាលក្រុងប៉េកាំងធ្វើជាកម្លាំងស្ថាបនាក្នុងសង្គ្រាមនៅអ៊ុយក្រែនផងដែរ។
ទន្ទឹមនឹងគ្នានេះ ចិនកំពុងប្រើប្រាស់ទំនាក់ទំនងប្រតិបត្តិការដើម្បីទាញយកប្រយោជន៍លើបញ្ហាដែលខ្លួនយកចិត្តទុកដាក់។ អ្នកស្រីបានប្រាប់ VOA ថា ឧទាហរណ៍ នៅក្នុងឧស្សាហកម្មបច្ចេកវិទ្យាខ្ពស់ ទោះបីជាការដែលសហរដ្ឋអាមេរិកកាត់ផ្តាច់ ឬកាត់បន្ថយការពឹងផ្អែកលើប្រទេសចិនជារឿងជៀសមិនរួចក៏ដោយ ក៏រដ្ឋាភិបាលក្រុងប៉េកាំងនៅតែមើលឃើញកន្លែងដែលអាចចរចាលើវិស័យក្រុមហ៊ុន ឬផលិតផលជាក់លាក់ណាមួយ។
លោក Dennis Wilder អតីតនាយកក្រុមប្រឹក្សាសន្តិសុខជាតិនៃប្រទេសចិនដែលឥឡូវនេះជាសហការីជាន់ខ្ពស់នៃគំនិតផ្តួចផ្តើមសម្រាប់កិច្ចសន្ទនាអាមេរិក-ចិនលើបញ្ហាសាកលនៅសាកលវិទ្យាល័យ Georgetown បានថ្លែងថា កត្តាជំរុញទៅវិញទៅមកគឺកិច្ចប្រជុំរបស់មេដឹកនាំ APEC ដែលសហរដ្ឋអាមេរិកគ្រោងធ្វើជាម្ចាស់ផ្ទះនៅទីក្រុង San Francisco ក្នុងខែវិច្ឆិកាខាងមុខ។
លោកប្រធានាធិបតី Xi Jinping ជឿជាក់ថា ចិនគឺជាសមាជិកស្ថាបនិកនៃវេទិកា APEC។ លោក Wilder បានប្រាប់ VOA ថា អ៊ីចឹងហើយ «បើគិតពីទស្សនទានកិត្យានុភាពជាតិ វាមានសារៈសំខាន់សម្រាប់លោកដែលត្រូវទៅចូលរួមនៅទីនោះ»។
ទន្ទឹមនឹងគ្នានេះ លោក Biden ចង់ឱ្យ«មេដឹកនាំពិភពលោកជាច្រើនចូលរួមក្នុងវេទិកានេះឱ្យបានច្រើនតាមដែលអាចធ្វើទៅបាន លើកលែងតែលោក Putin ប៉ុណ្ណោះ»។
ប្រសិនបើលោក Xi ចូលរួមកិច្ចប្រជុំកំពូល APEC អាចមានកិច្ចប្រជុំកំពូលដាច់ដោយឡែកមួយជាមួយលោក Biden ដែលជាការជួបប្រជុំផ្ទាល់មុខគ្នាជាលើកទី២របស់លោកទាំង ២ ក្នុងនាមជាប្រធានាធិបតី ចាប់តាំងពីពេលលោកទាំង ២ បានជួបគ្នានៅក្រៅកិច្ចប្រជុំក្រុមប្រទេស G-20 នៅកោះបាលីកាលពីខែវិច្ឆិកាឆ្នាំមុន។
ទោះជាយ៉ាងនេះក្តី ក្នុងរយៈពេលតិចជាង ៦ ខែ អ្នកសង្កេតការណ៍បានលើកឡើងថា ពួកគេជិតអស់ពេលវេលាក្នុងការត្រៀមរៀបចំសម្រាប់កិច្ចប្រជុំនេះហើយ៕
លោក Jeff Seldin និងអ្នកស្រី Nike Ching រួមចំណែកក្នុងសេចក្តីរាយការណ៍នេះ។
ប្រែសម្រួលដោយលោក ជឹង ប៉ូជីន
