ខណៈពេលដែលសហរដ្ឋអាមេរិកនិងប្រទេសចិនកំពុងប្រជែងគ្នាបង្កើតដៃគូថ្មីៗនិងពង្រីកឥទ្ធិពលរបស់ខ្លួនជាមួយប្រទេសនានាក្នុងតំបន់អាស៊ីប៉ាស៊ីហ្វិកនោះ មន្ត្រីការពារជាតិជាន់ខ្ពស់នៃប្រទេសទាំងពីរកំពុងព្យាយាមដើម្បីទាក់ទាញការគាំទ្រនៅចុងសប្តាហ៍នេះ ពីសមភាគី មន្ត្រីការទូត និងមេដឹកនាំក្នុងតំបន់ នៅក្នុងកិច្ចប្រជុំនៃវេទិកាសន្តិសុខមួយ ដែលប្រព្រឹត្តធ្វើទៅនៅក្នុងប្រទេសសិង្ហបុរី។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន AP ។
នាយករដ្ឋមន្ត្រីអូស្ត្រាលី លោក Anthony Albanese ដែលប្រទេសរបស់លោកជាសម្ព័ន្ធមិត្តជិតស្និទ្ធជាមួយសហរដ្ឋអាមេរិកក្នុងតំបន់ប៉ាស៊ីហ្វិកនោះ នឹងថ្លែងសុន្ទរកថាមួយនៅយប់ថ្ងៃសុក្រនេះ ដើម្បីបើកកិច្ចប្រជុំនៃវេទិកាសន្ទនាគ្នានេះ នៅសណ្ឋាគារ Shangri-La ដែលត្រូវបានរៀបចំធ្វើឡើងដោយវិទ្យាស្ថានអន្តរជាតិសម្រាប់ការសិក្សាយុទ្ធសាស្ត្រ។
កិច្ចពិភាក្សានៃវេទិកាសន្ទនានៅឆ្នាំនេះប្រារព្ធធ្វើឡើង ស្របពេលដែលមានបញ្ហាជាច្រើនកំពុងកើតមាន ដូចជាសង្គ្រាមនៅអ៊ុយក្រែននិងការពាក់ព័ន្ធក្នុងតំបន់ ការគាំទ្ររបស់ចិនចំពោះរុស្ស៊ីក្នុងសង្គ្រាមអ៊ុយក្រែន ជម្លោះដែលកំពុងកើតឡើងនៅក្នុងប្រទេសមីយ៉ាន់ម៉ា ភាពតានតឹងកាន់តែកើនខ្លាំងឡើងរវាងចិននិងអាមេរិកនិងសម្ព័ន្ធមិត្តអាមេរិក ជុំវិញការទាមទាររបស់ចិនទៅលើដែនកោះតៃវ៉ាន់ជាដើម។
ក្រសួងការពារជាតិសហរដ្ឋអាមេរិកបានឱ្យដឹងថា រដ្ឋមន្ត្រីការពារជាតិអាមេរិក លោក Lloyd Austin នឹងថ្លែងសុន្ទកថានៅថ្ងៃសៅរ៍ ស្តីពី «ភាពជាអ្នកដឹកនាំរបស់អាមេរិកក្នុងតំបន់ឥណ្ឌូប៉ាស៊ីហ្វិក» ខណៈដែលរដ្ឋមន្ត្រីការពារជាតិប្រទេសចិន លោក Li Shangfu នឹងថ្លែងសុន្ទរកថានៅថ្ងៃអាទិត្យ ស្តីពីគំនិតផ្តួចផ្តើមសន្តិសុខថ្មីនៃប្រទេសរបស់លោក៕
