មេដឹកនាំស.រ.អា.និងចិនបានផ្តល់ទស្សនៈផ្ទុយគ្នាអំពីទិសដៅពាណិជ្ជកម្មនៅក្នុងទ្វីបអាស៊ីនៅក្នុងសុន្ទរកថាដាច់ដោយឡែកពីគ្នាដល់ពួកមេដឹកនាំជំនួញក្នុងតំបន់នៅថ្ងៃសុក្រនេះ។
ប្រធានាធិបតីស.រ.អា.លោក ដូណាល់ ត្រាំ បាននិយាយប្រាប់សន្និសីទកំពូលAPEC នៃអ្នកដឹកនាំជំនួញ ថាលោកចង់ធ្វើឱ្យមានកិច្ចព្រមព្រៀងពាណិជ្ជកម្មទ្វេភាគីជាមួយប្រទេសណាមួយក្នុងតំបន់មហាសមុទ្រឥណ្ឌា និងមហាសមុទ្រប៉ាស៊ីហ្វិក ក៏ប៉ុន្តែលោកច្រានចោលកិច្ចព្រមព្រៀងពាណិជ្ជកម្មពហុជាតិដូចជាកិច្ចព្រមព្រៀងភាពដៃគូឆ្លងកាត់មហាសមុទ្រប៉ាស៊ីហ្វិ ហៅកាត់ថា TPP ដែលបានត្រូវបោះបង់ចោលយ៉ាងឆាប់រហ័សនៅក្នុងរយៈពេលប៉ុន្មានថ្ងៃដំបូងនៃរដ្ឋបាលរបស់លោក។
ប្រធានាធិបតី ត្រាំ បាននិយាយថា៖ «ខ្ញុំនឹងធ្វើឱ្យមានកិច្ចព្រមព្រៀងពាណិជ្ជកម្មទ្វេភាគីជាមួយប្រទេសជាតិណាមួយក្នុងតំបន់មហាសមុទ្រឥណ្ឌានិងមហាសមុទ្រប៉ាស៊ីហ្វិក ដែលចង់ធ្វើជាដៃគូជាមួយយើងនិងដែលធ្វើតាមគោលការណ៍នៃពាណិជ្ជកម្មមានភាពយុត្តិធម៌និងមានភាពទៅវិញទៅមក។ អ្វីដែលយើងនឹងមិនធ្វើទៀតទេនោះគឺចូលរួមក្នុងកិច្ចព្រមព្រៀងធំៗដែលចងដៃយើង ធ្វើឱ្យយើងបាត់បង់អធិបតេយ្យភាព និងមិនអាចធ្វើឱ្យមានការពង្រឹងបទប្បញ្ញត្តិមានន័យបាន»។
ប្រធានាធិបតីស.រ.អា.រូបនេះបាននិយាយថា កាលពីអតីតកាលនៅពេលដែលប្រទេសលោកបន្ទាបរបាំងផ្សារ ប្រទេសឯទៀតៗមិនបានបើកផ្សារពួកគេដើម្បីទទួលទំនិញយើងទេ»៕
