ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អាមេរិក​និង​ចក្រភព​អង់គ្លេស​សន្យា​ធ្វើ​ឱ្យ​អ៊ីរ៉ង់​ទទួល​ខុស​ត្រូវ​ចំពោះ​ការ​បំពាន​សិទ្ធិ​ពលរដ្ឋ​ខ្លួន​ឯង


រដ្ឋមន្ត្រីការបរទេសអាមេរិក​លោក Antony Blinken (ស្តាំ) និងរដ្ឋមន្ត្រីការបរទេសអង់គ្លេស​លោក James Cleverly ចាប់រលាក់ដៃគ្នានៅចុងបញ្ចប់នៃសន្និសីទសារព័ត៌មានរបស់ពួក​អស់​លោកនៅ​ក្រសួងការបរទេសក្នុង​រដ្ឋធានី​វ៉ាស៊ីនតោន នៅថ្ងៃទី១៧ ខែមករា ឆ្នាំ២០២៣។

សហរដ្ឋ​អាមេរិក​និង​ចក្រភព​អង់គ្លេស​បាន​បញ្ជាក់​កាលពី​ថ្ងៃ​អង្គារ​ថា ខ្លួន​នឹង​ធ្វើ​ឱ្យ​រដ្ឋាភិបាល​អ៊ីរ៉ង់​ទទួល​ខុស​ត្រូវ​ចំពោះ​ការ​រំលោភ​លើ​សិទ្ធិ​របស់​ប្រជាពលរដ្ឋ​ខ្លួន​ឯង ហើយ​ស្រប​ពេល​នោះ​ដែរ​បាន​ថ្កោលទោស​ជា​ថ្មី​លើ​ការ​សម្លាប់​របស់​អ៊ីរ៉ង់​លើ​ពលរដ្ឋ​អ៊ីរ៉ង់​ដើម​កំណើត​អង់គ្លេស​ម្នាក់។

រដ្ឋមន្ត្រី​ការបរទេស​សហរដ្ឋ​អាមេរិក​លោក Antony Blinken បាន​ប្រាប់​អ្នក​កាសែត​ថា ការ​សម្លាប់​លោក Ali Reza Akbari កាលពី​សប្ដាហ៍​មុន​គឺ​ជា​ទម្រង់​មួយ​នៃ​ការ​រំលោភ​បំពាន​របស់​រដ្ឋាភិបាល​អ៊ីរ៉ង់​ដែល​មាន​ដូចជា «ការ​ឃុំឃាំង ការ​ធ្វើ​ទារុណកម្ម ការ​បង្ខំ​ឱ្យ​សារភាព និង​ការ​សម្លាប់​ដោយ​អយុត្តិធម៌​ជាដើម»។

លោក Blinken បាន​និយាយ​ថា៖ «យើង​មាន​ក្ដី​រន្ធត់​តក់ស្លុត​ចំពោះ​ការ​សម្លាប់​លោក Akbari ដូច​ដែល​យើង​មាន​ក្ដី​រន្ធត់​តក់ស្លុត​ចំពោះ​អ្វីៗ​ផ្សេង​ទៀត​ដែល​យើង​បាន​ឃើញ​នៅ​តាម​ដង​ផ្លូវ​ក្នុង​ប្រទេស​អ៊ីរ៉ង់​ក្នុង​ពេល​ប៉ុន្មាន​ខែ​កន្លង​មក​នេះ​តាំងពី​ពេល​ដែល​ការ​តវ៉ា​ទាំង​នេះ​បាន​ចាប់ផ្ដើម​ដែរ ដែល​នោះ​មាន​ដូចជា​ការ​ចាប់​ខ្លួន​មនុស្ស​ជា​ច្រើន ការ​កាត់ទោស​ក្លែងក្លាយ ការ​សម្លាប់ និង​ការ​ប្រើ​អំពើ​ហិង្សា​ផ្លូវ​ភេទ​ជា​វិធី​ដើម្បី​បង្ក្រាប​ការ​តវ៉ា​ជាដើម»។

រដ្ឋមន្ត្រី​ការបរទេស​ចក្រភព​អង់គ្លេស​លោក James Cleverly ដែល​បាន​ជួប​ជាមួយ​នឹង​លោក Blinken នៅ​រដ្ឋធានី​វ៉ាស៊ីនតោន សហរដ្ឋ​អាមេរិក​កាលពី​ថ្ងៃ​អង្គារ បាន​និយាយ​ថា ចក្រភព​អង់គ្លេស​និង​សហរដ្ឋ​អាមេរិក «ឈរ​ជាមួយ​នឹង​ប្រជាពលរដ្ឋ​អ៊ីរ៉ង់​ដ៏​អង់អាច​ក្លាហាន​និង​ថ្លៃថ្នូរ​នៅ​ពេល​ដែល​ពួកគេ​ទាមទារ​សិទ្ធិ​រស់នៅ​ដែល​គ្មាន​ការ​ភ័យខ្លាច​និង​ការ​ជិះជាន់​គាប​សង្កត់»។

លោក Cleverly បាន​បញ្ជាក់​ថា ចក្រភព​អង់គ្លេស​បាន​ដាក់​ទណ្ឌកម្ម​លើ​អ្នក​ដែល​ជាប់​ពាក់ព័ន្ធ​នឹង​ការ​សម្លាប់​លោក Akbari ដែល​ក្នុង​នោះ​រួម​មាន​ទាំង​អគ្គ​រដ្ឋអាជ្ញា​អ៊ីរ៉ង់​ផង​ដែរ និង​លើ​សមាជិក​នៃ​កង​ប៉ូលិស​ផ្នែក​សីលធម៌​របស់​អ៊ីរ៉ង់​និង​តុលាការ​ដែល​ជាប់​ពាក់ព័ន្ធ​នៅ​ក្នុង​ការ​បង្ក្រាប​លើ​ក្រុម​អ្នក​តវ៉ា។

លោក​បាន​បន្ថែម​ថា ប្រជាពលរដ្ឋ​អ៊ីរ៉ង់​កំពុង​ប្រាប់​រដ្ឋាភិបាល​អ៊ីរ៉ង់​ថា​ពួកគេ​មិន​សប្បាយចិត្ត​នឹង​ប្រព័ន្ធ​បច្ចុប្បន្ន​នៅ​ក្នុង​ប្រទេស​និង​ថា​វា​អាស្រ័យ​លើ​រដ្ឋាភិបាល​អ៊ីរ៉ង់​នៅ​ក្នុង​ការ​កែប្រែ​ប្រព័ន្ធ​នេះ៕

XS
SM
MD
LG