ប្រទេសអ៊ីរ៉ង់ ត្រូវបានបោះឆ្នោតដកចេញពីស្ថាប័នទទួលបន្ទុកខាងបញ្ហាស្រ្តីរបស់អង្គការសហប្រជាជាតិកាលពីថ្ងៃពុធ ដោយសារការបន្តបង្រ្កាបបាតុកម្មដោយសន្តិវិធីនិងគោលនយោបាយរើសអើងនិងគាបសង្កត់នៃប្រទេសនេះចំពោះស្ត្រីនិងកុមារី។
ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ អ្នកស្រី Linda Thomas-Greenfieldបាននិយាយអំពីនារីអ៊ីរ៉ង់វ័យ២២ឆ្នាំម្នាក់ដែលត្រូវបានចាប់ខ្លួនដោយប៉ូលិសសីលធម៌នៅប្រទេសអ៊ីរ៉ង់ហើយការស្លាប់ស្រ្តីរូបនេះក្នុងពេលឃុំខ្លួនកាលពីពាក់កណ្តាលខែកញ្ញា បានញ៉ាំងឲ្យមានបាតុកម្មប្រឆាំងរាប់ខែ។
អ្នកស្រី Linda Thomas-Greenfield និយាយថា៖ «នាងMahsa Amini គ្រាន់តែចង់រៀនឲ្យចប់។ នាងចង់បង្កើតគ្រួសារមួយ។ នាងចង់រស់នៅក្នុងជីវិតមួយដ៏សាមញ្ញនិងរីករាយ។នាងគ្រាន់តែជានិស្សិតម្នាក់ ប៉ុន្តែឥឡូវ នាងបានក្លាយជាវីរនារីហើយ»។
អ្នកស្រី Lindaបន្តថា៖ «យើងដឹងថានាងត្រូវបានសម្លាប់ដោយសារបទឧក្រិដ្ឋក្នុងភាពជាស្រ្តីភេទ»។
អ្នកស្រី Linda បាននិយាយអំពីនាង Amini បន្ថែមទៀតថា៖ «វាយូរនិងញឹកញាប់ពេកហើយដែលការណ៍នេះមិនមែនជារឿងចម្លែកទេក្នុងប្រទេសអ៊ីរ៉ង់»។
ក្នុងការបោះឆ្នោតដោយមានសំឡេង២៩គាំទ្រ ៨ជំទាស់ និង១៦អនុប្បវាទ ក្រុមប្រឹក្សាសង្គមនិងសេដ្ឋកិច្ចរបស់អង្គការសហប្រជាជាតិដែលមានប្រទេស៥៤ជាសមាជិក បានចាត់វិធានការដែលមិនធ្លាប់ធ្វើកន្លងមក ក្នុងការដកប្រទេសអ៊ីរ៉ង់ចេញភ្លាមៗមុនចប់អាណត្តិពីគណៈកម្មការស្តីពីស្ថានភាពស្ត្រី។ អាណត្តិផ្លូវការរបស់អ៊ីរ៉ង់ត្រូវចប់នៅឆ្នាំ២០២៦។
គណៈកម្មការនេះ ជួបប្រជុំគ្នារយ:ពេល២សប្តាហ៍នៅរៀងរាល់ខែមីនា ដើម្បីពិភាក្សាបញ្ហានានាទាក់ទងនឹងការផ្តល់សិទ្ធិអំណាចដល់ស្ត្រីនិងការសម្រេចឲ្យបានសមភាពយេនឌ័រ។
គេត្រូវការត្រឹមតែសំឡេងភាគច្រើនដាច់ខាតថាព្រមឬមិនព្រមប៉ុណ្ណោះក្នុងការបោះឆ្នោតលើសេចក្តីសម្រេចចិត្តដែលព្រាងដោយសហរដ្ឋអាមេរិកនេះ។ សំឡេងឆ្នោតអនុប្បវាទ អត់បានការទេ។
មានបាតុករយ៉ាងហោចណាស់៣៥០នាក់បានស្លាប់ក្នុងពេលធ្វើបាតុកម្ម៣ខែ ក្នុងនោះរួមទាំងកុមារ៦០នាក់ផង។ បាតុករ១៤០០០នាក់ទៀតត្រូវបានចាប់ខ្លួន។ បាតុករជាបុរស២នាក់ ត្រូវបានប្រហារជីវិតក្នុងខែនេះ។
ឯកអគ្គរដ្ឋទូតអ៊ីរ៉ង់ប្រចាំអង្គការសហប្រជាជាតិ បាននិយាយថាគំនិតផ្តួចផ្តើមរបស់សហរដ្ឋអាមេរិកនេះ មានចរិតនយោបាយហើយថាការចោទប្រកាន់នានាគឺផ្អែកលើ«ការអះអាងដែលគ្មានមូលដ្ឋាននិងទឡ្ហីករណ៍ប្រឌិត»៕
