ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ជំងឺ​កូវីដ​១៩ បង្ក​ឲ្យ​មាន​វិបត្តិ​ផ្លាស់​ទីលំនៅ​​​​ និង​អំពើហិង្សា​នៅ​អាមេរិក​កណ្ដាល


រូប​ឯកសារ៖ បុគ្គលិក​នៃ​ក្រសួង​សុខាភិបាល​កំពុង​ធ្វើ​ការ​អង្កេត​នៅ​ក្នុង​សង្កាត់​មួយ​ បន្ទាប់​ពី​មនុស្ស​មួយ​ចំនួន​ធ្វើ​តេស្ត​មាន​មេរោគ​កូរ៉ូណា​ថ្មី នៅ​ក្នុង​ក្រុង Tegucigalpa ប្រទេស​ហុងឌូរ៉ាស កាលពី​ថ្ងៃទី១៧ ខែមីនា ឆ្នាំ២០២០។

ត្រឹម​ចុង​ឆ្នាំ​មុន ការ​កើន​ឡើង​អំពើ​ហិង្សា និង​អស្ថិរភាព បាន​ធ្វើ​ឲ្យ​ប្រជាជន​​ប្រមាណ ៧ សែន ២ ​ម៉ឺន ​នាក់ ​បាត់បង់​ទី​លំ​នៅ​ នៅ​ភាគ​ខាង​ជើង​តំបន់​អាមេរិក​កណ្ដាល ហើយ​ពាក់​កណ្ដាល​នៃ​ចំនួនអ្នក​ទាំង​នោះ​បាត់​បង់​ទីលំនៅ​នៅ​ក្នុង​ប្រទេស​របស់​ពួក​គេ។

ទីភ្នាក់ងារ​ជនភៀសខ្លួន​នៃ​អង្គការ​សហប្រជាជាតិ​បាន​រាយការណ៍​អំពីការ​កើន​ឡើងអំពើ​ហិង្សា និងទុក្ខ​លំបាក បង្កឡើងដោយ​ជំងឺ​កូវីដ​១៩ ដែល​កំពុងបង្ខំ​ឲ្យ​ប្រជាជន​ជាច្រើន​នាក់​នៅ​ក្នុង​តំបន់​អាមេរិក​កណ្ដាល​ចាក​ចោល​ផ្ទះ​សម្បែង​របស់​ពួក​គេ។ ការណ៍​នេះ​កំពុង​បង្កឲ្យ​មាន​វិបត្តិ​ផ្លាស់​ទី​លំនៅ​នៅ​ក្នុង​តំបន់។

ត្រឹម​ចុង​ឆ្នាំ​មុន ការ​កើន​ឡើង​អំពើ​ហិង្សា និង​អស្ថិរភាព បាន​ធ្វើ​ឲ្យ​ប្រជាជនប្រមាណ ៧ សែន ២ ​ម៉ឺន ​នាក់ ​បាត់បង់​ទី​លំ​នៅ​ នៅ​ភាគ​ខាង​ជើង​តំបន់​អាមេរិក​កណ្ដាល ហើយ​ពាក់​កណ្ដាល​នៃ​ចំនួនអ្នក​ទាំង​នោះ​បាត់​បង់​ទីលំនៅ​នៅ​ក្នុង​ប្រទេស​របស់​ពួក​គេ។

​ទីភ្នាក់ងារ​ជនភៀសខ្លួន​នៃ​អង្គការ​សហប្រជាជាតិបានរាយការណ៍​ថា ប្រទេស​ ហុងឌូរ៉ាស អែលសាល់វ៉ាឌ័រ និង​ក្វាតេម៉ាឡា ជា​ប្រទេស​ដែល​រង​វិបត្តិ​នេះ​ច្រើន​ជាង​គេ និង​ត្រូវ​បាន​ជាប់​ក្នុង​ភាព​រ៉ាំរ៉ៃ​នៃ​អំពើ​ហិង្សា ភាព​ក្រីក្រ និង​ការ​កើន​ឡើង​នូវ​ទុក្ខ​វេទនា ដោយ​សារ​ការ​រាត​ត្បាត​ជាសាកល​នៃ​ជំងឺ​កូវីដ១៩។ ឧត្តម​ស្នងការ​អង្គការ​សហប្រជាជាតិ​ទទួល​បន្ទុក​ជន​ភៀស​ខ្លួន ឬ​ហៅ​កាត់​ថា UNHCR ​បាន​រក​ឃើញ​ថា ឧក្រិដ្ឋកម្ម​ដែល​រីក​រាល​ដាល​នៅ​ក្នុង​តំបន់​កំពុង​កើន​ឡើង​នៅ​ក្នុង​អំឡុង​ពេល​មាន​វិបត្តិ​ជំងឺ​កូវីដ​១៩។ លោក Andrej Mahecic អ្នក​នាំ​ពាក្យ​របស់ UNCHR បាន​ឲ្យ​ដឹង​ថា ទោះ​បី​ជា​មាន​បទ​បញ្ជា​ឲ្យ​ស្នាក់​នៅ​ក្នុង​ផ្ទះ​ក៏​ដោយ ក៏​ក្រុម​ឧក្រិដ្ឋជន​កំពុង​ប្រើ​ប្រាស់​ការ​បង្ខាំង ​ដើម្បី​ពង្រឹង​ការគ្រប់​គ្រង​របស់​ពួក​គេ​ទៅ​លើ​សហគមន៍។

លោក Mahecic បាន​និយាយ​ថា៖ «ក្នុង​នោះ​រួម​មាន​ការ​ជំរិត​ទារ​ប្រាក់ ការ​ជួញ​ដូរ​គ្រឿង​ញៀន អំពើ​ហិង្សា​យេនឌ័រ​និង​ផ្លូវ​ភេទ ការ​ចាប់​ខ្លួន​ខុស​ច្បាប់ ឃាតកម្ម និង​ការ​គំរាម​សម្លាប់​លើ​អ្នក​ដែល​មិន​ធ្វើ​តាម។ ការ​រឹត​បន្ដឹង​ការ​ធ្វើ​ដំណើររឹត​តែ​បង្ក​ការ​លំបាក​ដល់​ពលរដ្ឋក្នុង​ការ​ទទួល​បាន​ជំនួយ និង​ការ​ការពារ ហើយ​អ្នក​ដែល​ចាំបាច់​ត្រូវ​រត់​គេច​ខ្លួន​ដើម្បី​រក្សា​ជីវិត​ក៏​កំពុងប្រឈម​នឹង​ឧបសគ្គច្រើន​ជាង​មុនដើម្បី​ស្វែងរក​កន្លែង​មាន​សុវត្ថិភាព»។

លើស​ពី​ការ​គំរាម​កំហែង​ដល់​ជីវិត​របស់​ពួក​គេ​ជា​ញឹកញយ លោក Mahecic និយាយ​ថា បទ​បញ្ជា​ស្នាក់​នៅ​ក្នុង​ផ្ទះ​កំពុង​បំផ្លាញ​ជីវភាព​រស់​នៅ​របស់​ប្រជាជន បង្ក​ការ​លំបាក​ដល់​ពួក​គេក្នុង​ការ​រក​ប្រាក់​សម្រាប់​ផ្គត់ផ្គង់​ជីវភាព​ខ្លួន​ឯង និង​ផ្គត់ផ្គង់​គ្រួសារ​របស់​ពួកគេ។ លោក​និយាយ​ថា​ ការ​ទទួល​បាន​សេវាកម្ម​ចាំ​បាច់​ដូច​ជា​សេវា​សុខភាព​និង​ទឹក​ស្អាត​នៅ​មាន​កម្រិត។

លោក Mahecic បាន​និយាយ​ថា៖ «ប្រឈម​មុខ​នឹង​កាលៈទេសៈ​លំបាក​ទាំង​នេះ ប្រជាជន​កាន់​តែ​ងាក​ទៅ​រក​យន្តការ​ដោះស្រាយ​បែប​អវិជ្ជមាន ដូចជា​ការប្រកប​របរ​រក​ស៊ី​ផ្លូវ​ភេទ ដែលធ្វើ​ឲ្យ​ពួក​គេ​មាន​ហានិភ័យ​បន្ថែម​ទៀត​ទាំង​ផ្នែក​សុខភាព រងអំពើហិង្សា និង​ការ​កេង​ប្រវ័ញ្ច​ពី​សំណាក់​ក្រុម​ឧក្រិដ្ឋជន។​

អង្គការ UNHCR រាយការណ៍​ថា មេដឹក​នាំ​សហគមន៍​រំពឹងថា ​នឹង​មាន​ការ​កើន​ឡើង​យ៉ាង​ខ្លាំង​នូវ​ការ​បង្ខំ​ចិត្ត​ផ្លាស់​ទី​លំនៅ​ភ្លាមៗ​ បន្ទាប់​ពី​បទបញ្ជា​ស្នាក់​នៅ​ក្នុង​ផ្ទះ​ត្រូវ​បាន​ដក​ចេញ។ ឧត្តម​ស្នង​ការ​អង្គការ​សហប្រជាជាតិ​ទទួក​បន្ទុក​ជន​ភៀស​ខ្លួន ក៏​បាន​ឲ្យ​ដឹង​ថា​ ខ្លួន​កំពុង​ធ្វើ​ការ​ជា​មួយ​មន្ត្រី​រដ្ឋាភិបាល និង​ដៃគូ​ផ្សេង​ៗទៀត​នៅ​ក្នុង​ប្រទេស​ហុងឌូរ៉ាស និងអែលសាល់វ៉ាឌ័រ ដើម្បី​ការពារ​ប្រជាជន​ដែល​រង​ការ​គំរាម​កំហែង​ និង​រង​អំពើ​ហិង្សា៕

ប្រែ​សម្រួល​ដោយ សឿន វឌ្ឍនា

តួលេខនៃករណីឆ្លងជំងឺកូវីដ១៩

XS
SM
MD
LG