ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

អ.ស.ប.​ថា​ មនុស្ស​​ស្លាប់​១៥​នាក់​​និង​បាត់​ខ្លួន​៤០០​នាក់​នៅក្នុង​អគ្គីភ័យ​នៅ​ជំរំ​ Rohingya ​ក្នុង​ប្រទេស​បង់ក្លាដែស


អគ្គីភ័យ​កើតឡើង​នៅ​ជំរំ​ជនភៀសខ្លួន Rohingya ក្នុង​ប្រទេស​បង់ក្លាដែស ថ្ងៃទី២២ ខែមីនា ឆ្នាំ២០២១។

ទីភ្នាក់ងារ​ជនភៀស​ខ្លួន​អង្គការ​សហប្រជាជាតិ​បាន​និយាយ​កាលពី​ថ្ងៃ​អង្គារ​ថា​ យ៉ាងហោច​ណាស់​មាន​មនុស្ស​១៥​នាក់​បាន​ស្លាប់​នៅក្នុង​អគ្គីភ័យ​ដ៏ធំមួយ​ដែល​ឆេះ​ជំរំជន​ភៀសខ្លួន​ Rohingya ​នៅក្នុង​ប្រទេស​បង់ក្លាដែស​ ខណៈ​ដែល​មនុស្សយ៉ាង​ហោចណាស់​ ៤០០​ នាក់​នៅ​បាត់ខ្លួន​នៅ​ឡើយ។

លោក ​Johannes Van der Klaauw​ មន្ត្រី​ឧត្តម​ស្នងការ​អង្គការ​សហប្រជាជាតិសម្រាប់​ជនភៀស​ខ្លួន​ដែលបាន​ចូលរួម​នៅក្នុង​សន្និសីទ​សារ​ព័ត៌មាន​សង្ខេបតាម​អ៊ីនធឺណិត​នៅ​ទីក្រុង​ហ្សឺណែវ​និយាយថា៖ «វា​ជា​អគ្គីភ័យ​ដ៏​ធំធេង​ ​ហើយ​អន្តរាយ​ណាស់។មនុស្ស​៤០០​នាក់​ទៀត​បាត់​ខ្លួន ដែលប្រហែលជា​ជាប់​ក្នុង​គំនរ​បាក់បែក»។ ​ លោក​បាន​និយាយ​ថា ​ឧត្តម​ស្នងការ​អង្គការ​សហប្រជាជាតិ​សម្រាប់​ជនភៀស​ខ្លួន​មាន​របាយការណ៍​អំពី​មនុស្ស​ជាង​ ៥៥០​ នាក់​បាន​រងរបួស ​និង​ប្រហែល​៤៥.០០០​នាក់​បាន​ផ្លាស់​ទីលំនៅ។​

មន្រ្តី​បង់ក្លាដែស​កំពុង​ស៊ើប​អង្កេត​មូលហេតុ​នៃ​ការ​ឆាបឆេះ​នេះ​ ហើយ​មន្ត្រី​ជួយ​សង្គ្រោះ និង​ក្រុម​គ្រួសារជនរងគ្រោះ​បាន​ដើរ​រើ​កម្ទេចកំទី​ដើម្បី​រកជន​រង​គ្រោះ​បន្ថែម​ទៀត។ អគ្គីភ័យ​នេះ​បាន​ឆាប​ឆេះ​ជំរំ​ Balukhali​ ក្បែរ​ទីប្រជុំជន​ Cox's Bazar នៅ​ភាគ​អាគ្នេយ៍​កាលពី​ល្ងាច​ថ្ងៃច័ន្ទ​ដោយ​ឆេះរាលដាល​ជម្រក​រាប់ពាន់ ​ខណៈ​ជនភៀសខ្លួន​នាំគ្នា​ប្រមូល​ទ្រព្យ​សម្បត្តិ​របស់​ពួក​គេ។​

លោក​ Aman Ullah​ ដែល​ជា​ជនភៀសខ្លួន​ Rohingya ​មកពីជំរំ​ Balukhali​ ប្រាប់​ទីភ្នាក់ងារ​ព័ត៌មាន ​Reuters​ ថា៖​ «អ្វីៗ​អន្តរាយ​អស់​ហើយ។​ មនុស្ស​រាប់ពាន់​នាក់​គ្មាន​ផ្ទះ​សម្បែង​ទេ។​ អគ្គីភ័យ​ត្រូវ​បាន​ពន្លត់ ​ក្រោយ​ពីឆេះ​រយៈពេល​៦​ម៉ោង​ ប៉ុន្តែផ្នែក​ខ្លះ​នៃ​ជំរំ​នេះ​នៅ​មាន​ផ្សែង​ពេញ​មួយ​យប់»។​

រហូតមក​ដល់​ពេលនេះ​ប៉ូលិស​បាន​បញ្ជាក់ថា អ្នក​ស្លាប់​មាន​ចំនួន ​៧​ នាក់។

លោក Zakir Hossain Khan​ មន្ត្រី​ប៉ូលិស​ជាន់ខ្ពស់​ បាន​ប្រាប់​ Reuters តាម​ទូរស័ព្ទ​ពី​ជំរំ​នោះ​ថា៖​ «គេ​នៅ​មិន​ទាន់​ដឹង​អំពី​មូលហេតុដែល​បណ្តាល​ឲ្យ​មាន​អគ្គីភ័យ​នេះ​នៅ​ឡើយ​ទេ​ ហើយ​អាជ្ញាធរ​កំពុង​ស៊ើប​អង្កេត។

លោក Sanjeev Kafley ប្រធាន​គណៈ​ប្រតិភូ​សហព័ន្ធ​អន្តរជាតិ​នៃ​កាកបាទ​ក្រហម​និង​អឌ្ឍចន្ទ​ក្រហម​ប្រចាំនៅ​ប្រទេស​បង់ក្លាដែស​បាន​និយាយ​ថា​ ជម្រក​ជាង​១៧.០០០​ត្រូវ​បាន​បំផ្លាញ​ ហើយ​មនុស្ស​រាប់ម៉ឺន​នាក់​បាន​ផ្លាស់​ទីលំនៅ។

លោក ​Kafley បាន​និយាយ​ថា​ បុគ្គលិក​និង​អ្នក​ស្ម័គ្រចិត្ត​កាកបាទ​ក្រហម​ជាង​មួយ​ពាន់​នាក់​បានធ្វើ​ការជាមួយ​ទីភ្នាក់ងារ​ពន្លត់​អគ្គីភ័យ​ដើម្បី​ពន្លត់​អគ្គិភ័យ​ដែល​រាលដាល​នៅ​ផ្នែក​ចំនួន​បួន​នៃ​ជំរំ​ដែល​មាន​មនុស្ស​ប្រមាណ​១២៤.០០០​នាក់៕

XS
SM
MD
LG