ការិយាល័យឧត្តមស្នងការសិទ្ធិមនុស្សអង្គការសហប្រជាជាតិកំពុងតែជំរុញឲ្យប្រទេសឥណ្ឌាលុបចោលច្បាប់ថ្មីស្ដីសញ្ជាតិរបស់ខ្លួន។ ការិយាល័យសិទ្ធិមនុស្សនោះបានឲ្យដឹងថា ច្បាប់នេះរើសអើងអ្នកកាន់សាសនាឥស្លាម។
ការតវ៉ាដ៏ហិង្សាបានផ្ទុះឡើងនៅក្នុងរដ្ឋ Assam និងរដ្ឋ Tripura ក្នុងប្រទេសឥណ្ឌាក្រោយពីមានការអនុម័តច្បាប់ថ្មីស្ដីពីសញ្ជាតិរបស់ឥណ្ឌាកាលពីពេលថ្មីៗនេះ។ ការតវ៉ានេះបានបង្កឲ្យមានមនុស្សស្លាប់ចំនួនបីនាក់ និងរបួសជាច្រើននាក់ទៀត ដោយរួមមានទាំងមន្ត្រីប៉ូលិសផងដែរ។
ការិយាល័យសិទ្ធិមនុស្សអង្គការសហប្រជាជាតិបានឲ្យដឹងថា ខ្លួនមានការសោកស្ដាយចំពោះការបង្ក្រាបដ៏សាហាវឃោរឃៅ ទៅលើអ្នកដែលតវ៉ាប្រឆាំងនឹងច្បាប់ថ្មីនេះ ដែលការិយាល័យនេះបានហៅច្បាប់នេះ ថាមានលក្ខណៈរើសអើងមូលដ្ឋាន។ ច្បាប់ដែលត្រូវបានធ្វើវិសោធនកម្មនេះផ្ដល់សិទ្ធិទទួលបានសញ្ជាតិដល់អ្នកកាន់សាសនាភាគតិចចំនួន៦សាសនា ដែលរត់ភៀសខ្លួនពីការធ្វើទុក្ខបុកម្នេញនៅក្នុងប្រទេសអាហ្វហ្កានីស្ថាន បង់ក្លាដែស និងប៉ាគីស្ថាន។
ប៉ុន្តែលោក Jeremy Laurence អ្នកនាំពាក្យរបស់ការិយាល័យសិទ្ធិមនុស្សអង្គការសហប្រជាជាតិបាននិយាយថា ច្បាប់នេះមិនផ្ដល់ការការពារដូចគ្នានេះចំពោះអ្នកកាន់សាសនាឥស្លាមនោះទេ។
លោក Laurence បានថ្លែងថា៖ «ច្បាប់ដែលបានធ្វើវិសោធនកម្មនេះទំនងជានឹងធ្វើឲ្យខូចការតាំងចិត្តចំពោះការសម្រេចឲ្យបាននូវសមភាព ដូចមានក្នុងច្បាប់នេះ ដែលត្រូវបានដាក់បញ្ចូលទៅក្នុងរដ្ឋធម្មនុញ្ញរបស់ឥណ្ឌា និងកាតព្វកិច្ចរបស់ឥណ្ឌា ក្រោមកិច្ចព្រមព្រៀងអន្តរជាតិស្ដីពីសិទ្ធិមនុស្សនិងសិទ្ធិនយោបាយ និងអនុសញ្ញាសម្រាប់លុបបំបាត់ការរើសអើងជាតិសាសន៍ ដែលឥណ្ឌាគឺជាប្រទេសហត្ថលេខី»។
លោក Laurence និយាយថា ច្បាប់ស្ដីពីសញ្ជាតិរបស់ឥណ្ឌា អាចបំពានកិច្ចព្រមព្រៀងអន្តរជាតិទាំងនេះ ដែលហាមឃាត់ការរើសអើងជាតិសាសន៍ ជនជាតិ ឬសាសនា។
លោកបាននិយាយយ៉ាងដូច្នេះថា៖ «ថ្វីត្បិតតែច្បាប់ចូលសញ្ជាតិរបស់ឥណ្ឌាដែលទូលំទូលាយជាងនេះនៅតែមានក៏ដោយ ក៏វិសោធនកម្មច្បាប់នេះនឹងមានលក្ខណៈរើសអើងទៅលើការទទួលបានសញ្ជាតិរបស់ប្រជាពលរដ្ឋ។ មិនថាស្ថានភាពអន្តោប្រវេសន៍របស់ពួកគេយ៉ាងណានោះទេ ជនអន្តោប្រវេសន៍ទាំងអស់មានសិទ្ធិទទួលបានការគោរព ការការពារ និងការបំពេញទៅតាមសិទ្ធិមនុស្សរបស់ពួកគេ»។
គណបក្សនយោបាយមូស្លីមមួយរួមជាមួយនឹងបណ្ដាមេធាវីនិងអង្គការសិទ្ធិមនុស្សនានា បានដាក់ពាក្យបណ្ដឹងប្រឆាំងនឹងច្បាប់នេះទៅកាន់តុលាការកំពូលក្នុងប្រទេសឥណ្ឌា ដោយបានអះអាងថា ច្បាប់នេះបំពានរដ្ឋធម្មនុញ្ញដែលមិនរើសអើងសាសនារបស់ប្រទេសឥណ្ឌា។ ការិយាល័យសិទ្ធិមនុស្សរបស់អង្គការសហប្រជាជាតិនេះបានឲ្យដឹងថា ខ្លួនសង្ឃឹមថា ចៅក្រមនឹងពិចារណាទៅលើថាតើច្បាប់នេះស្របជាមួយនឹងកាតព្វកិច្ចសិទ្ធិមនុស្សអន្តរជាតិរបស់ឥណ្ឌាដែរឬយ៉ាងណា៕
ប្រែសម្រួលដោយអ្នកស្រី ហុង ចិន្ដា
