អ្នកស្រី Agnes Callamard អ្នករាយការណ៍ពិសេសរបស់អង្គការសហប្រជាជាតិទទួលបន្ទុកឃ្លាំមើលការសម្លាប់ក្រៅប្រព័ន្ធតុលាការ ការប្រហារជីវិតនិងដោយមិនរើសមុខ បានឲ្យដឹងថា ឃាតកម្មលើរូបលោក Jamal Khashoggi គឺជាឧក្រិដ្ឋកម្មអន្តរជាតិ ដែលផ្ដល់សិទ្ធិឲ្យរដ្ឋាភិបាលផ្សេងៗទៀតកាត់ទោសជនសង្ស័យក្រោមការទាមទារយុត្តាធិការជាសកល។
អ្នកស្រីបាននិយាយថា៖ «ខ្ញុំបានអំពាវឲ្យប្រទេសជាសមាជិកដែលបានបង្កើតដែនយុត្តាធិការជាសកល ដើម្បីចាត់វិធានការចាំបាច់ និងស៊ើបអង្កេតលើជនទាំងឡាយណាដែលពាក់ព័ន្ធទៅនឹងបទឧក្រិដ្ឋនេះ មិនថាអ្នកដែលពាក់ព័ន្ធនៅកន្លែងកើតហេតុ និងអ្នកដែលយើងមានភស្តុតាងគ្រប់គ្រាន់ថាជាអ្នកដែលនៅពីក្រោយឧក្រិដ្ឋកម្មនេះ»។
អ្នកស្រី Callamard ស្វាគមន៍ការថ្កោលទោសខ្លាំងៗពីសំណាក់សហគមន៍អន្តរជាតិចំពោះករណីឃាតកម្មលើលោក Khashoggi កាលពីខែតុលា នៅក្នុងស្ថានកុងស៊ុលអារ៉ាប៊ីសាអូឌីត នៅទីក្រុងអ៊ីស្តង់ប៊ុល ប្រទេសតួកគី។ ប៉ុន្តែអ្នកស្រីបានប្រាប់ VOA ថាសកម្មភាពឆ្លើយតបទៅនឹងឧក្រិដ្ឋកម្មនេះ ត្រូវបានផ្ដោតតែទៅលើបុគ្គល និងមិនបានផ្ដោតលើរដ្ឋាភិបាល ដែលជាអ្នកនៅពីក្រោយខ្នងការសម្លាប់អ្នកកាសែតអារ៉ាប៊ីសាអូឌីតក្រៅប្រព័ន្ធតុលាការនោះទេ។
អ្នកស្រីបាននិយាយថា៖ «សហគមន៍អន្តរជាតិមិនបានគិតពីបញ្ហានេះទេ។ ពួកគេចាត់វិធានយ៉ាងលឿនទៅលើជនសង្ស័យប្រមាណ ១៥ ទៅ ១៧ នាក់ ឲ្យទទួលទណ្ឌកម្ម...សហគមន៍អន្តរជាតិមិនបានផ្ដោតទៅលើអ្នកបញ្ជាទេ។ ដូច្នេះ ការដាក់ទណ្ឌកម្មចំពោះបុគ្គលទាំងនោះ គ្រាន់តែជាការបង្វែរដានពីមេក្លោងប៉ុណ្ណោះ»។
អ្នកស្រីបានឲ្យដឹងទៀតថា អ្នកស្រីមិនជឿទេថា រាជទាយាទ Mohammad bin Salman មិនបានដឹងពីអំពើហិង្សា ដែលបានកើតឡើងក្នុងពេលកន្លងទៅ មុនការឈានដល់ការធ្វើឃាតលោក Khashoggi។
«ខ្ញុំជឿថា រាជទាយាទ គឺជាប្រធានបទនៃការស៊ើបអង្កេតឲ្យបានស៊ីជម្រៅលើករណីឧក្រិដ្ឋកម្មនេះ ដើម្បីកំណត់ថាតើ រាជទាយាទរូបនេះ ជាអ្នកទទួលខុសត្រូវចំពោះរឿងនេះឬយ៉ាងណា»។
លោក Adel Bin Ahmed រដ្ឋមន្ត្រីក្រសួងការបរទេសអារ៉ាប៊ីសាអូឌីត បានចេញសេចក្ដីថ្លែងការណ៍បន្ទាន់មួយ ចោទប្រកាន់អ្នកស្រី Callamard ថាបានបានចេញផ្សាយរបាយការណ៍គ្មានមូលដ្ឋាន និងមិនត្រឹមត្រូវ។ លោកបាននិយាយថា របាយការណ៍នេះលំអៀង និងមិនអាចទុកចិត្តបាន ដោយសារតែរបាយការណ៍ផ្អែកលើព័ត៌មានចុះចេញផ្សាយតាមប្រព័ន្ធផ្សព្វផ្សាយ និងអ្នកជំនាញដែលមិនបញ្ចេញឈ្មោះ។
ប៉ុន្តែអ្នកស្រី Callamard ដែលជាអ្នករាយការណ៍ពិសេសរបស់អង្គការសហប្រជាជាតិរូបនេះបានប្រាប់ VOA ថា អ្នកស្រី គាំទ្រភស្តុតាងដែលបានបង្ហាញនៅក្នុងរបាយការណ៍ 101 ទំព័ររបស់អ្នកស្រី។ អ្នកស្រីនិយាយថា អ្នកស្រីមិនបានបង្ហាញឈ្មោះប្រភព ដោយបារម្ភពីបញ្ហាសុវត្ថិភាពរបស់ពួកគេ។ អ្នកស្រីបន្ថែមថា អ្នកស្រីបានតាមដានយ៉ាងដិតដល់ រាល់ប្រភពព័ត៌មានដែលអ្នកស្រីបានប្រមូលមក។
អ្នកស្រី Callamard លើកឡើងថា អ្នកស្រីមានឆន្ទៈប្រគល់ជូនព័ត៌មាននេះទៅទីភ្នាក់ងារស៊ើបអង្កេតឧក្រិដ្ឋកម្មអន្តរជាតិ។ ប៉ុន្តែអ្នកស្រីនិយាយថា អ្នកស្រីនឹងមិនប្រគល់ព័ត៌មាននេះទៅកាន់អាជ្ញាធរអារ៉ាប៊ីសាអូឌីត ដោយហេតុថាអ្នកស្រីមិនអាចទុកអាជ្ញាធរអារ៉ាប៊ីសាអូឌីតបានឡើយ ជាពិសេសបញ្ហាសុវត្ថិភាពរបស់ប្រភពព័ត៌មានរបស់អ្នកស្រី៕
ប្រែសម្រួលដោយ សឿន វឌ្ឍនា
