មួយឆ្នាំមុនពេលដែលអ្នកកាសែតអារ៉ាប៊ីសាអូឌីតគឺលោក Jamal Khashoggi ត្រូវបានសម្លាប់ ព្រះអង្គម្ចាស់រជ្ជទាយាទ Mohammed bin Salman បានប្រាប់ជំនួយការម្នាក់របស់ព្រះអង្គថា ព្រះអង្គនឹងបើ«គ្រាប់កាំភ្លើង»លើអ្នកកាសែតរូបនោះ ប្រសិនបើអ្នកកាសែតនោះមិនវិលត្រឡប់មកកាន់ប្រទេសអារ៉ាប៊ីសាអូឌីតវិញទេ ហើយនឹងបញ្ចប់ការរិះគន់របស់អ្នកកាសែតរូបនោះទៅលើរដ្ឋាភិបាលអារ៉ាប៊ីសាអូឌីត តែម្ដង។ នេះបើយោងតាមកាសែត The New York Times ដែលបានរាយការណ៍កាលពីថ្ងៃព្រហស្បតិ៍។
ព្រះរាជឱង្ការរបស់ព្រះអង្គម្ចាស់ រជ្ជទាយាទទៅកាន់មនុស្សជំនិតបំផុតម្នាក់របស់ព្រះអង្គកាលពីឆ្នាំ២០១៧នោះ ធ្វើឡើងមុនពេលដែលលោក Khashoggi ត្រូវបានសម្លាប់កាលពីខែតុលាឆ្នាំមុន នៅក្នុងស្ថានកុងស៊ុលរបស់អារ៉ាប៊ីសាអូឌីត ក្នុងទីក្រុងអ៊ីស្តង់ប៊ុល ប្រទេសតួកគី។ នេះបើផ្អែកតាមកាស The New York Times ដដែល ដែលបានស្រង់សម្ដីទាំងអតីតទាំងមន្ត្រីការបរទេសបច្ចុប្បន្នរបស់សហរដ្ឋអាមេរិក ដែលបានដឹងអំពីរបាយការណ៍ស៊ើបការណ៍សម្ងាត់។
កាសែត The New York Times បានរាយការណ៍ថា សំឡេងនៃព្រះរាជឱង្ការរបស់ព្រះអង្គម្ចាស់ រជ្ជទាយាទអង្គនេះត្រូវបានលួចថតបានដោយទីភ្នាក់ងារស៊ើបការណ៍សម្ងាត់របស់អាមេរិក។
អ្នកវិភាគរបាយការណ៍ស៊ើបការណ៍សម្ងាត់របស់សហរដ្ឋអាមេរិកបានបកស្រាយថា ព្រះរាជឱង្ការរបស់ព្រះអង្គម្ចាស់រជ្ជទាយាទអំពី«គ្រាប់កាំភ្លើង»នោះ តាមន័យធៀបមានន័យថា ព្រះអង្គម្ចាស់ Mohammed bin Salman មិនចាំបាច់ មានព្រះរាជឱង្ការឱ្យគេបាញ់សម្លាប់លោក Khashoggi ត្រង់ៗនោះទេ ប៉ុន្តែក្រុមអ្នកវិភាគគិតថាព្រះរាជឱង្ការនោះបានបង្ហាញពីព្រះទ័យរបស់ព្រះអង្គក្នុងការឱ្យគេសម្លាប់អ្នកកាសែតរូបនោះ ប្រសិនបើអ្នកកាសែតនោះមិនបានវិលត្រឡប់ទៅកាន់ព្រះរាជាណាចក្រ អារ៉ាប៊ីសាអូឌីត វិញទេនោះ។ នេះបើយោងតាមកាសែតthe New York Times៕
