មេបញ្ជាការរងរបស់ទីបញ្ជាការអង្គការសហប្រជាជាតិបាននិយាយនៅថ្ងៃចន្ទនេះថាខ្លួនបានចាប់ផ្តើមសន្ទនាជាមួយកូរ៉េខាងជើងអំពីទាហានអាមេរិកាំងម្នាក់ដែលបានរត់ចូលក្នុងប្រទេសកូរ៉េខាងជើងកាលពីសប្តាហ៍មុនដែលឆ្លងកាត់ព្រំដែនដែលមានការ ការពារយ៉ាងខ្លាំងរបស់កូរ៉េទាំង២។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន AP។
លោកឧត្តមសេនីយ៍ឯក Andrew Harrisonបាននិយាយថាដំណើរការនេះបានចាប់ផ្តើមតាមរយៈខ្សែគមនាគមន៍ដែលបានបង្កើតឡើងនៅក្រោមកិច្ចព្រមព្រៀងឈប់បាញ់គ្នាដើម្បីបញ្ឈប់ការប្រយុទ្ធក្នុងសង្គ្រាមកូរ៉េពីឆ្នាំ១៩៥០ដល់១៩៥៣។ លោកបាននិយាយទៀតថាសុខុមាលភាពរបស់ពលឯកTravis King នៅតែជាការព្រួយកង្វល់ដ៏ចម្បងមួយរបស់ទីបញ្ជាការ ក៏ប៉ុន្តែ បានបដិសេធផ្តល់ព័ត៌មានលម្អិតបន្ថែមទៀត ដោយលើកឡើងពីភាពរសើបនៃការពិភាក្សា។
កូរ៉េខាងជើងបានរក្សាការស្ងៀមស្ងាត់ជាសាធារណៈអំពីលោក Kingដែលបានឆ្លង កាត់ព្រំដែនកាលពីថ្ងៃអង្គារសប្តាហ៍មុនខណៈដែលលោកត្រូវធ្វើដំណើរទៅកាន់បន្ទាយ Fort Bliss រដ្ឋ Texasសហរដ្ឋអាមេរិក។
ពួកមន្ត្រីសហរដ្ឋអាមេរិកបានសម្តែងការព្រួយកង្វល់អំពីសុខុមាលភាពរបស់លោកហើយបាននិយាយថាកូរ៉េខាងជើងមិនអើពើសំណើរបស់ពួកគេអំពីព័ត៌មានអំពីលោក King។
ពួកអ្នកវិភាគនិយាយថាកូរ៉េខាងជើងរង់ចាំអស់ជាច្រើនសប្តាហ៍ឬថែមទាំងរាប់សិបខែដើម្បីផ្តល់ព័ត៌មានដ៏សំខាន់អំពីលោក Kingដើម្បីបង្កើនអានុភាពនិងបន្ថែមភាពបន្ទាន់ដល់ការខំប្រឹងប្រែងរបស់សហរដ្ឋអាមេរិកដើម្បីឱ្យមានការដោះលែងលោក។
អ្នកវិភាគខ្លះនិយាយថាកូរ៉េខាងជើងអាចព្យាយាមដើម្បីទទួលបានសម្បទានពីរដ្ឋាភិបាលក្រុងវ៉ាស៊ីនតោនដូចជាភ្ជាប់ការដោះលែងលោក Kingទៅនឹងសហរដ្ឋអាមេរិកដើម្បីកាត់បន្ថយសកម្មភាពយោធារបស់អាមេរិកជាមួយប្រទេសកូរ៉េខាងត្បូង៕
