មួយថ្ងៃមុនពេលកិច្ចពិភាក្សាស្តីពីអាកាសធាតុអន្តរជាតិ អគ្គលេខាធិការអង្គការសហប្រជាជាតិ លោក Antonio Guterres បានទៅទស្សនាទ្វីបអង់តាក់ទិកដ៏សំខាន់ជាសាកលដើម្បីផ្ញើសារថា៖ «យើងពិតជាត្រូវតែធ្វើសកម្មភាពភ្លាមៗ»។ អង់តាក់ទិកជាកន្លែងដែលទឹកកកបានកករាប់លានឆ្នាំ កំពុងរលាយដោយសារតែការប្រែប្រួលអាកាសធាតុបង្កឡើងដោយមនុស្ស ។
លោក Guterres ថ្លែងនៅចុងសប្តាហ៍មុនថា «អ្វីកើតឡើងនៅអង់តាក់ទិកមិនស្ថិតនៅក្នុងទ្វីបអង់តាក់ទិកទេ» ។
បន្ថែមពីលើការបំផ្លាតពន្លឺព្រះអាទិត្យដ៏ច្រើន នៅឆ្ងាយពីផែនដី អង់តាក់ទិកសម្រួលអាកាសធាតុរបស់ភពផែនដី ដោយសារតែទឹកកក និងទឹកត្រជាក់របស់វាជំរុញចរន្តទឹកសមុទ្រដ៏សំខាន់។ នៅពេលដែលទឹកកក រលាយក្នុងបរិមាណដ៏ច្រើន វាបង្កើនកម្រិតទឹកសមុទ្រ និងផ្លាស់ប្តូរអ្វីៗដូចជាអំបិល និងជម្រករបស់សត្វសមុទ្រ។
នៅក្នុងសន្និសីទប្រចាំឆ្នាំនៃភាគីដែលត្រូវបានគេស្គាល់ថា COP ប្រទេសនានាត្រូវបានគេសន្មតថានឹងប្រមូលផ្តុំគ្នាដើម្បីធ្វើនិងពង្រឹងការប្តេជ្ញាចិត្តដោះស្រាយការប្រែប្រួលអាកាសធាតុប៉ុន្តែមកដល់ពេលនេះមិនទាន់មានប្រទេសគ្រប់គ្រាន់ដើម្បីបន្ថយការបំភាយឧស្ម័នដែលបណ្តាលឱ្យឡើងកំដៅទេ។
លោក Guterres បានធ្វើទស្សនកិច្ចផ្លូវការបីថ្ងៃទៅកាន់ទ្វីបភាគខាងត្បូង។ ប្រធានាធិបតីឈីលី លោកGabriel Boric បានរួមដំណើរទស្សនកិច្ចផ្លូវការទៅកាន់មូលដ្ឋានទ័ពអាកាស Eduardo Frei លើកោះ King George របស់ឈីលី។ អ្នកវិទ្យាសាស្ត្រ និងសមាជិកយោធាឈីលីបានប្រមូលផ្តុំជាមួយលោក Guterres នៅលើកប៉ាល់ដែលគេមើលផ្ទាំងទឹកកក និងសត្វស្លាបសមុទ្រ រួមទាំងសត្វ penguins នោះ។
លោក Guterres បានពណ៌នាអំពីសន្និសីទ COP28 ដែលចាប់ផ្តើមនៅថ្ងៃទី ៣០ ខែវិច្ឆិកានៅទីក្រុងឌូបៃ និងចប់ជាងពីរសប្តាហ៍ទៀតថា នេះជាឱកាសដែលប្រទេសនានា «សម្រេចចិត្តដំណាក់កាលចាកចេញពីឥន្ធនៈ ផូស៊ីលក្នុងពេលសមស្របមួយ» ដើម្បីការពារពិភពលោកពីការឡើងកំដៅ ១,៥ អង្សាសេលើសពីសីតុណ្ហភាពមុនឧស្សាហកម្ម។
អ្នកវិទ្យាសាស្ត្របានស្នើឲ្យកំណត់ព្រំដែនដ៏សំខាន់មួយដែលអាចចៀសវាងមហន្តរាយការប្រែប្រួលអាកាសធាតុសម្រាប់មនុស្សរាប់លាននាក់។ ប៉ុន្តែដំណាក់កាលបែបនេះមិនទាន់ឈានទៅរកកិច្ចព្រមព្រៀងផុសចេញពីសន្និសីទទាំងនេះទេមកទល់ពេលនេះ ហើយឥទ្ធិពលនៃក្រុមហ៊ុន និងប្រទេសប្រើឥន្ធនៈផូស៊ីលនៅមានជំហររឹងមាំ។
លោក Guterres បានថ្លែងថាសន្និសីទ COP28 ក៏ផ្តល់ឱកាសឱ្យប្រទេសនានាប្តេជ្ញាចិត្តចំពោះគម្រោងថាមពលកកើតឡើងវិញថែមទៀត និងធ្វើឱ្យប្រសើរឡើងនូវប្រសិទ្ធភាពថាមពលនៃបណ្តាញអគ្គិសនី និងបច្ចេកវិទ្យាដែលមានស្រាប់។
ខណៈលោក Sultan al-Jaber ប្រធានក្រុមហ៊ុនប្រេងជាតិ Abu Dhabi និងជាប្រធានកិច្ចពិភាក្សាឆ្នាំនេះ លោកអគ្គលេខាធិការអ.ស.ប.ថ្លែងថា ទំនាក់ទំនងរបស់លោកSultan ចំពោះវិស័យនេះផ្តល់ឱ្យលោក នូវ«ទំនួលខុសត្រូវកាន់តែធំ» ដើម្បីលើកទឹកចិត្តដល់ឧស្សាហកម្មឥន្ធនៈផូស៊ីល ធ្វើការវិនិយោគលើថាមពលស្អាតថែមទៀត។
