អគ្គលេខាធិការអង្គការសហប្រជាជាតិ លោក Antonio Guterres បានប្រាប់ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃចន្ទថា វាមានសារៈសំខាន់ខាងសីលធម៌សម្រាប់រដ្ឋជាសមាជិកធ្វើប្រតិបត្តិការផ្តល់ជំនួយជាថ្មី ពីប្រទេសតួកគីទៅក្នុងភាគពាយ័ព្យប្រទេសស៊ីរី ដើម្បីជួយប្រជាជននៅទីនោះប្រមាណជាង៤លាននាក់។
លោកមានប្រសាសន៍ថា «វាជាសីលធម៌មួយ ក្នុងការដោះស្រាយការឈឺចាប់ និងទុក្ខលំបាករបស់ប្រជាជនប្រមាណ៤លាន១សែននាក់ ដែលកំពុងរស់នៅក្នុងតំបន់នោះ ហើយកំពុងត្រូវការជំនួយ និងការការពារ។ មនុស្សប្រមាណ៨០ភាគរយដែលត្រូវការជំនួយនៅភាគពាយ័ព្យប្រទេសស៊ីរីនោះគឺជាស្ត្រី និងកុមារ»។
ក្រុមប្រឹក្សា ដែលមាន១៥ប្រទេសនេះ ត្រូវធ្វើការសម្រេចចិត្ត នៅត្រឹមថ្ងៃទី១០ខែ កក្កដាថា តើត្រូវបន្តការអនុញ្ញាតឱ្យអង្គការសហប្រជាជាតិ និងដៃគូផ្តល់ជំនួយមនុស្សធម៌ ធ្វើការផ្តល់ជំនួយ ឬយ៉ាងណានោះ។ ជារៀងរាល់ខែ ក្រុមជំនួយមនុស្សធម៌បានចូលទៅដល់កន្លែងដែលពលរដ្ឋស៊ីរីកំពុងរស់នៅប្រមាណ២លាន៤សែននាក់ នៅភាគពាយ័ព្យដែលមិននៅក្នុងការគ្រប់គ្រងរបស់រដ្ឋាភិបាល ដោយផ្តល់ជំនួយចាំបាច់តាមរយៈច្រកព្រំដែន Bab al-Hawa ដោយឆ្លងពីប្រទេសតួកគី។
រដ្ឋាភិបាលស៊ីរី និងរុស្ស៊ីចង់ឱ្យជំនួយទាំងអស់ឆ្លងកាត់តាមរយៈរដ្ឋាភិបាល។
ប្រេសិតរងរបស់រុស្ស៊ីលោក Dmitry Polyanskiy បានប្រាប់ក្រុមប្រឹក្សាសន្តិសុខអង្គការសហប្រជាជាតិថា «យើងជឿជាក់ថា ការរៀបចំដែលសហការជាមួយរដ្ឋាភិបាលក្រុងដាម៉ាសនៃប្រទេស៊ីរី អាចធ្វើទៅបាន សម្រាប់ការផ្តល់ជំនួយទៅឱ្យតំបន់ទាំងអស់ក្នុងប្រទេសស៊ីរី។ នៅពេលដែលច្រកព្រំដែន Bab al-Hawa ត្រូវបិទនោះ ការផ្តល់ជំនួយដោយឆ្លងកាត់ព្រំដែនអាចនឹងកើនឡើង»។
ឡានដឹកជញ្ជូនជំនួយរាប់រយគ្រឿងបានឆ្លងកាត់ព្រំដែនមកពីប្រទេសតួកគីជារៀងរាល់ខែ ចូលទៅភាគពាយ័ព្យប្រទេសស៊ីរី ដោយដឹកស្បៀងអាហារសម្រាប់មនុស្សប្រមាណ១លាន៨សែននាក់។
តំណាងប្រទេសចិននៅក្រុមប្រឹក្សាសន្តិសុខក៏បានបង្ហាញសញ្ញាផងដែរថា ខ្លួនប្រហែលជាមិនគាំទ្រឱ្យបន្តជំនួយតាមច្រកព្រំដែនពីប្រទេសតួកគីនោះឡើយ។
ក្រោយសង្គ្រាមអស់ជាងមួយទសវត្សរ៍ ជំងឺរាតត្បាតកូវីដ១៩ និងវិបត្តិសេដ្ឋកិច្ចនោះ ប្រជាជនស៊ីរីប្រមាណ៩០ភាគរយកំពុងរស់នៅក្រោមបន្ទាត់ក្រីក្រ៕
