បណ្តាញផ្លូវដែកចក្រភពអង់គ្លេសនៅសប្តាហ៍នេះប្រឈមមុខនឹងសកម្មភាពកូដកម្មដ៏ធំបំផុតក្នុងរយៈពេលជាង៣ ទសវត្សរ៍ជាប់ៗគ្នាទាក់ទងប្រាក់ខែ ខណៈប្រាក់ចំណូលខ្វះខាតដោយសារកំណើនអតិផរណា។ នេះបើតាមទីភ្នាក់ងារសារព័ត៌មាន AFP។
សហជីពផ្លូវដែក (RMT) បាននិយាយថា កម្មករជាង៥០.០០០នាក់នឹងចូលរួមក្នុងកូដកម្មថ្នាក់ជាតិរយៈពេលបីថ្ងៃ ស្របពេលមានព្រឹត្តិការណ៍សំខាន់ៗ រួមទាំងពិធីបុណ្យតន្ត្រី Glastonbury ផងដែរ។ សាលារៀនកំពុងព្រមានថា សិស្សរាប់ពាន់នាក់ដែលប្រឡងទូទាំងប្រទេសក៏នឹងរងផលប៉ះពាល់ផងដែរ។
សហជីពផ្លូវដែកអះអាងថា កូដកម្មគឺចាំបាច់ ដោយសារប្រាក់ខែមិនអាចទប់ទល់នឹងអតិផរណា ដែលឡើងខ្លាំងរយៈពេល៤០ឆ្នាំនេះ។ ការងារក៏មានហានិភ័យផងដែរខណៈចរាចរណ៍អ្នកដំណើរមិនទាន់បានកើនឡើងវិញពេញលេញ បន្ទាប់ពីលុបចោលការបិទសកម្មភាពសង្គមទប់ទល់ការរាតត្បាតនៃជំងឺកូវីដ១៩។ ប្រទេសនានាជុំវិញពិភពលោកកំពុងរងការប៉ះពាល់ដោយសារអតិផរណាខ្ពស់រាប់ទសវត្សរ៍ ដោយសារសង្រ្គាមនៅអ៊ុយក្រែន និងវិបត្តិថាមពលប្រេងឥន្ធនៈ និងការដំឡើងថ្លៃម្ហូបអាហារ។
កូដកម្មត្រូវបានគ្រោងធ្វើសម្រាប់ថ្ងៃអង្គារ ថ្ងៃព្រហស្បតិ៍ និងថ្ងៃសៅរ៍ដែលជាជម្លោះដ៏ធំបំផុតក្នុងបណ្តាញផ្លូវដែករបស់ចក្រភពអង់គ្លេសចាប់តាំងពីឆ្នាំ ១៩៨៩។ នេះបើយោងតាមសហជីពផ្លូវដែក។ សហជីពនេះក៏បានប្រកាសថា កម្មករដែលជាសមាជិករបស់ខ្លួននៅTube ដែលជាបណ្តាញផ្លូវរថភ្លើងក្រោមដីក្នុងទីក្រុងឡុងដ៍ នឹងមិនធ្វើការរយៈពេល ២៤ ម៉ោងនៅថ្ងៃអង្គារ។
ទោះជាយ៉ាងណាក៏ដោយ ប្រតិបត្តិករផ្លូវដែកព្រមានពីការរំខានពេញមួយសប្តាហ៍ ព្រោះផ្លូវខ្លះ ទោះបីជាមិនប៉ះពាល់ដោយកូដកម្ម ក៏ប៉ុន្តែត្រូវបន្ថយសេវាកម្ម។ លោក Andrew Haines នាយកប្រតិបត្តិនៃបណ្តាញផ្លូវដែក(Network Rail) ដែលគ្រប់គ្រងផ្លូវដែករបស់ប្រទេសនេះបាននិយាយថា «ការចរចាមិនបានរីកចម្រើនដូចដែលខ្ញុំរំពឹងទុកទេ ដូច្នេះយើងត្រូវតែត្រៀមសម្រាប់កូដកម្មផ្លូវដែកថ្នាក់ជាតិហើយនឹងការខូចខាតដែលអាចនឹងកើតមាន។ យើង និងសហការីដែលកំពុងប្រតិបត្តិការរថភ្លើងរបស់យើង កំពុងត្រៀមលក្ខណៈដើម្បីដំណើរការសេវាកម្មឱ្យបានល្អបំផុតតាមដែលយើងអាចធ្វើបាន សម្រាប់អ្នកដំណើរ និងអ្នកដឹកទំនិញនៅសប្តាហ៍ក្រោយ បើទោះបីជាមានកូដកម្មរបស់សហជីពផ្លូវដែកក៏ដោយ»។
កូដកម្មទំនងជានឹងធ្វើឱ្យមានភាពវឹកវរក្នុងការធ្វើដំណើរក្នុងវិស័យអាកាសចរណ៍ផងដែរ បន្ទាប់ពីក្រុមហ៊ុនអាកាសចរណ៍ត្រូវបានបង្ខំឱ្យកាត់បន្ថយជើងយន្តហោះដោយសារកង្វះបុគ្គលិក ដែលបណ្តាលឱ្យមានការពន្យារពេលយូរ និងធ្វើឲ្យអ្នកដំណើរខកចិត្ត។
កម្មកររាប់ពាន់នាក់ត្រូវបានបណ្តេញចេញពីការងារនៅក្នុងឧស្សាហកម្មអាកាសចរណ៍ក្នុងអំឡុងពេលជំងឺកូវីដ១៩រាតត្បាត ប៉ុន្តែវិស័យនេះកំពុងជួបការលំបាកក្នុងការជ្រើសរើសបុគ្គលិក ខណៈដែលតម្រូវការផ្នែកធ្វើដំណើរកើនឡើង បន្ទាប់ពីលុបចោលការរាំងខ្ទប់ដោយសារជំងឺរាតត្បាត៕
