ការវាយប្រហារតាមដ្រូនរបស់រុស្ស៊ីបានសម្លាប់មនុស្សម្នាក់ និងធ្វើឱ្យខូចខាតហេដ្ឋារចនាសម្ព័ន្ធកំពង់ផែមួយចំនួននៅក្នុងតំបន់ Odesa របស់អ៊ុយក្រែន។ នេះបើតាមការលើកឡើងរបស់អភិបាលតំបន់ Odesa លោក Oleh Kiper នៅថ្ងៃព្រហស្បតិ៍នេះ។
លោក Oleh Kiper និយាយថា តំបន់ Odesa បានរងការវាយប្រហារអស់រយៈពេល២ម៉ោង ហើយខណៈដែលប្រព័ន្ធការពារដែនអាកាសអ៊ុយក្រែនបានបាញ់ទម្លាក់ដ្រូនវាយប្រហាររបស់រុស្ស៊ីភាគច្រើននោះ ក៏មានដ្រូនមួយចំនួនបានរួចផុតពីការបាញ់ទម្លាក់ផងដែរ។
លោកបានឱ្យដឹងថា ជនរងគ្រោះដែលបានស្លាប់នោះ ជាអ្នកបើកឡានធំ ហើយការវាយប្រហារនោះក៏បានធ្វើឱ្យខូចខាតឃ្លាំងឥវ៉ាន់មួយកន្លែង ជណ្តើរយន្តមួយ និងឡានធំៗមួយចំនួននៅជិតទន្លេ Danube ។
យោធាអ៊ុយក្រែននិយាយថា ការវាយប្រហារតាមអាកាសរបស់អ៊ុយក្រែន មានដ្រូន១៨គ្រឿង ដោយសំដៅទៅលើតំបន់ Odesa នៅភាគខាងត្បូងអ៊ុយក្រែន និងតំបន់ Khmelnytskyi នៅភាគពាយ័ព្យប្រទេស។
ដោយឡែកសមាជិកព្រឹទ្ធសភាសហអាមេរិកនៃគណបក្សសាធារណរដ្ឋ កាលពីថ្ងៃពុធម្សិលមិញបានបោះឆ្នោតរាំងខ្ទប់ថវិកាចំនួន១១០ពាន់លានដុល្លារអាមេរិក ដែលជាជំនួយសម្រាប់ប្រទេសអ៊ុយក្រែននិងអ៊ីស្រាអែល ក៏ដូចជាវិធានការសន្តិសុខមួយចំនួនសម្រាប់ព្រំដែននៅភាគខាងត្បូងអាមេរិកផងដែរ។
ប្រធានាធិបតីសហរដ្ឋអាមេរិក លោក Joe Biden បានស្នើសុំសភាអាមេរិកនូវទឹកប្រាក់ជិត១០៦ពាន់លានដុល្លារអាមេរិក ដើម្បីផ្តល់ហិរញ្ញប្បទានដល់ការធ្វើសង្គ្រាមនិងសម្រាប់សន្តិសុខព្រំដែនអាមេរិក។
ការបោះឆ្នោតលើសំណើសុំថវិកាក្នុងព្រឹទ្ធសភាអាមេរិកកាលពីថ្ងៃពុធម្សិលមិញ គឺមានសំឡេង៤៩ភាគរយគាំទ្រ និង៥១ភាគរយប្រឆាំង ដោយព្រឹទ្ធសភាត្រូវការសំឡេងគាំទ្រយ៉ាងតិច៦០សំឡេង ដើម្បីឱ្យសំណើច្បាប់សុំថវិកានេះអាចដំណើរការទៅមុខបាន។
កាលពីព្រឹកថ្ងៃពុធលោក Biden បានអង្វរដល់សភាអាមេរិកឱ្យអនុម័តជំនួយបន្ថែមដល់អ៊ុយក្រែន ដោយនិយាយថា ការខកខានមិនបានអនុម័តលើជំនួយដល់អ៊ុយក្រែន នឹងក្លាយជា«អំណោយដ៏វិសេស» ដែលអាមេរិកផ្តល់ឱ្យប្រធានាធិបតីរុស្ស៊ីលោក Putin ដែលបានធ្វើសង្គ្រាមអស់រយៈពេលជិត២ឆ្នាំហើយប្រឆាំងនឹងអ៊ុយក្រែននោះ។
ទន្ទឹមនឹងនេះ ក្រសួងការពារជាតិសហរដ្ឋអាមេរិក បានប្រកាសផ្តល់ជំនួយសន្តិសុខថ្មីដល់ប្រទេសអ៊ុយក្រែន ដែលជាជំនួយឧបករណ៍យោធាលើកទី៥២ របស់រដ្ឋបាលលោក Biden ដល់ប្រទេសអ៊ុយក្រែនចាប់តាំងពីខែសីហា ឆ្នាំ២០២១ មក។ ជំនួយនេះរួមមានប្រព័ន្ធការពារដែនអាកាស គ្រាប់កាំភ្លើងធំ អាវុធប្រឆាំងរថគ្រោះ និងឧករណ៍យោធាផ្សេងៗមួយចំនួនទៀត។
ក្រសួងយុត្តិធម៌អាមេរិកបានប្រកាសកាលពីថ្ងៃពុធថាបុរសរុស្ស៊ីបួននាក់ត្រូវបានចោទពីការធ្វើទារុណកម្មជនជាតិអាមេរិកាំងម្នាក់នៅពេលលុកលុយអ៊ុយក្រែនត្រូវបានចោទប្រកាន់ពីឧក្រិដ្ឋកម្មសង្គ្រាមនៅក្នុងករណីមួយបែបនេះ។
ករណីនេះកំណត់ការចោទប្រកាន់លើកទីមួយប្រឆាំងនឹងពួកសមាជិកកងទ័ពរុស្ស៊ីទាក់ទិននឹងអំពើឃោរឃៅក្នុងសង្គ្រាមរបស់ពួកគេប្រឆាំងនឹងប្រទេសអ៊ុយក្រែន ហើយជាលើកដំបូងហើយដែលក្រសួងយុត្តិធម៌បានធ្វើការចោទប្រកាន់តាមរយៈលក្ខន្តិកៈមានរយៈពេលជិត៣០ឆ្នាំមកហើយដែលដាក់ការធ្វើទារុណកម្មឬការធ្វើបាបដោយអមនុស្សធម៌នៅពេលមានសង្គ្រាមថាជាឧក្រិដ្ឋកម្ម។
ការចោទប្រកាន់ទាំងនេះជានិមិត្តរូបនៅពេលនេះដោយសារក្រសួងយុត្តិធម៌មិនទំនងជាអាចយកចុងចោទទាំងបួននាក់--ដែលនៅពេលនេះភៀសខ្លូនបាត់--យកមកឃុំឃាំងបានទេ។ តែពួកមន្ត្រីសហរដ្ឋអាមេរិកបានពណ៌នាករណីនេះថាជាពេលវេលាប្រវត្តិសាស្ត្រមួយក្នុងការស៊ើបអង្កេតរបស់ពួកគេអំពីឧក្រិដ្ឋកម្មសង្គ្រាមរុស្ស៊ី ហើយពួកគេយល់ថាអាចមានការចោទប្រកាន់ច្រើនថែមទៀតនៅពេលអនាគត។
ជនជាតិរុស្ស៊ីទាំងបួននាក់នេះត្រូវបានដឹងអត្តសញ្ញាណថាជាពួកសមាជិកកងយោធពលរុស្ស៊ីឬកងឯកភាពចំណុះរបស់រុស្ស៊ី។ បុរសពីរនាក់ក្នុងបណ្តាជនទាំងនេះត្រូវបានពណ៌នាថាជាមេបញ្ជាការយោធា។
ពួករុស្ស៊ីទាំងនេះត្រូវបានចោទប្រកាន់ថាបានចាប់ពង្រត់បុរសអាមេរិកាំងម្នាក់ពីផ្ទះលោកនៅក្នុងភូមិអ៊ុយក្រែនមួយកាលពីឆ្នាំ២០២២។ អាជ្ញាធរអាមេរិកាំងបាននិយាយថាជនជាតិអាមេរិកាំងនេះត្រូវបានវាយដំនិងសាកសួរចម្លើយនៅពេលត្រូវឃុំឃាំង១០ថ្ងៃនៅមន្ទីរយោធារុស្ស៊ីមួយ នៅមុនពេលត្រូវជម្លៀសជាមួយភរិយាលោកជាជនជាតិអ៊ុយក្រែន។
រដ្ឋមន្ត្រីក្រសួងសន្តិសុខមាតុភូមិលោក Alejandro Mayorkas បាននិយាយថាជនជាតិអាមេរិកាំងនេះបាននិយាយប្រាប់ពួកភ្នាក់ងារសហព័ន្ធដែលបានធ្វើដំណើរទៅអ៊ុយក្រែនកាលពីឆ្នាំទៅ ជាផ្នែកមួយនៃការស៊ើបអង្កេតអំពីការណ៍ដែលថាពួកទាហានរុស្ស៊ីបានចាប់ពង្រត់លោក បង្ខំលោកឱ្យស្រាតសម្លៀកបំពាក់ ភ្ជង់កាំភ្លើងដាក់ក្បាលលោកនិងវាយដំលោក។
ព័ត៌មានខ្លះសម្រាប់សេចក្តីរាយការណ៍នេះដកស្រង់ចេញពីទីភ្នាក់ងារសារព័ត៌មានAssociated Press, Agence France-Presse និង Reuters.
