រដ្ឋាភិបាលអ៊ុយក្រែនបានច្រានចោលការចោទប្រកាន់របស់រដ្ឋាភិបាលរុស្ស៊ីដែលថា កងទ័ពអ៊ុយក្រែនប្រហែលជាអាចប្រើគ្រាប់បែកដែលមានផ្ទុកសារធាតុវិទ្យុសកម្ម និងបានចោទប្រកាន់រុស្ស៊ីវិញថា មានផែនការធ្វើដូច្នេះដើម្បីទម្លាក់កំហុសលើអ៊ុយក្រែនថាជាអ្នកធ្វើ។
រដ្ឋមន្ត្រីការបរទេសអ៊ុយក្រែនលោក Dmytro Kuleba បានបង្ហោះសារនៅលើ Twiter កាលពីថ្ងៃអាទិត្យថា៖ «ការភូតកុហករបស់រុស្ស៊ីដែលថាអ៊ុយក្រែនមានផែនការប្រើ «គ្រាប់បែកផ្ទុកសារធាតុវិទ្យុសកម្ម» គឺជារឿងមិនសមហេតុផលទាល់តែសោះ»។
ប្រធានាធិបតីអ៊ុយក្រែនលោក Volodymyr Zelenskyy បានបញ្ជាក់នៅក្នុងសុន្ទរកថារបស់លោកកាលពីយប់ថ្ងៃអាទិត្យថា រុស្ស៊ីគឺជាប្រទេសតែមួយគត់នៅក្នុងតំបន់ដែលមានសមត្ថភាពអាចប្រើប្រាស់អាវុធនុយក្លេអ៊ែរបាន។
លោកថ្លែងដូច្នេះថា៖ «ប្រសិនបើរុស្ស៊ីហៅទូរស័ព្ទមកនិងនិយាយថា អ៊ុយក្រែនកំពុងរៀបចំធ្វើអ្វីមួយ នោះវាមានន័យថា រុស្ស៊ីបានរៀបចំផែនការនោះរួចហើយ។ ខ្ញុំជឿថា នៅពេលនេះពិភពលោកគួរតែមានប្រតិកម្មឱ្យបានខ្លាំងបំផុតប្រឆាំងនឹងរុស្ស៊ីតាមដែលអាចធ្វើទៅបាន»។
ក្រសួងការពារជាតិរុស្ស៊ីបានបញ្ជាក់ថា រដ្ឋមន្ត្រីការពារជាតិរបស់ខ្លួនលោក Sergei Shoigu បានបញ្ជាក់នូវក្តីបារម្ភកាលពីថ្ងៃអាទិត្យទៅកាន់រដ្ឋមន្ត្រីការពារជាតិរបស់សហរដ្ឋអាមេរិក ចក្រភពអង់គ្លេស បារាំង និងតួកគី អំពីការបង្កហេតុដែលអាចធ្វើឡើងដោយប្រទេសអ៊ុយក្រែនតាមរយៈការប្រើ «គ្រាប់បែកផ្ទុកសារធាតុវិទ្យុសកម្ម»។
រដ្ឋមន្ត្រីការបរទេសរបស់សហរដ្ឋអាមេរិក ចក្រភពអង់គ្លេស និងបារាំង បានបញ្ជាក់សារជាថ្មីនៅក្នុងសេចក្តីថ្លែងការណ៍មួយកាលពីថ្ងៃអាទិត្យអំពីការគាំទ្ររបស់ពួកគេលើប្រទេសអ៊ុយក្រែន និងបានលើកឡើងថា រដ្ឋមន្ត្រីការពារជាតិនៃប្រទេសទាំង ៣ បានបញ្ជាក់យ៉ាងច្បាស់ចំពោះរដ្ឋមន្ត្រីការពារជាតិរុស្ស៊ីអំពីការច្រានចោលរបស់ពួកគេលើ «ការចោទប្រកាន់ដ៏ខុសស្រឡះយ៉ាងច្បាស់ក្រឡែតរបស់រុស្ស៊ីនេះ»៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារព័ត៌មាន Associated Press ទីភ្នាក់ងារព័ត៌មាន AFP និងទីភ្នាក់ងារព័ត៌មាន Reuters។
អ៊ុយក្រែនច្រានចោលការចោទប្រកាន់របស់រុស្ស៊ីរឿង«គ្រាប់បែកផ្ទុកសារធាតុវិទ្យុសកម្ម»
