រដ្ឋមន្ត្រីការបរទេសអ៊ុយក្រែន លោក Dmytro Kuleba និយាយនៅថ្ងៃចន្ទនេះថា លោកជឿថាសហរដ្ឋអាមេរិក នឹងនៅតែអាចស្វែងរកដំណោះស្រាយចាំបាច់ ដើម្បីបន្តការគាំទ្រផ្នែកយោធាដល់ប្រទេសអ៊ុយក្រែន។
ថ្លែងប្រាប់ក្រុមអ្នកសារព័ត៌មានជាមួយ ប្រធានគោលនយោបាយកិច្ចការបរទេសសហភាពអឺរ៉ុប លោក Josep Borrell លោក Kuleba និយាយថា អ៊ុយក្រែនមានការពិភាក្សាគ្នាយ៉ាងស៊ីជម្រៅជាមួយសមាជិកសភាអាមេរិកទាំងពីរគណបក្សគឺបក្សសាធារណរដ្ឋនិងបក្សប្រជាធិបតេយ្យ។
លោកបានពណ៌នាពីការសម្រេចចិត្តរបស់សមាជិកសភាអាមេរិក ដែលមិនដាក់បញ្ចូលថវិកាគាំទ្រដល់អ៊ុយក្រែនក្នុងច្បាប់ថវិកាបណ្តោះអាសន្នរបស់ខ្លួន ដែលត្រូវបានអនុម័តកាលពីសៅរ៍កន្លងទៅនេះ ដើម្បីបញ្ចៀសការបិទរដ្ឋាភិបាលសហរដ្ឋអាមេរិកនោះ គឺជា «ឧប្បទ្វហេតុ»មួយ មិនមែនជាការផ្លាស់ប្តូរក្នុងប្រព័ន្ធសម្រាប់ការគាំទ្រនោះឡើយ។
ចំណែកឯ លោក Borrell វិញ ដែលកំពុងដឹកនាំកិច្ចប្រជុំមួយ នៃក្រុមប្រឹក្សាកិច្ចការបរទេសសហភាពអឺរ៉ុបក្នុងរដ្ឋធានីកៀវនៅថ្ងៃចន្ទនេះនិយាយថា លោកជឿថា នឹងមានដំណោះស្រាយមួយ ក្នុងការបន្តជំនួយសហរដ្ឋអាមេរិកមកឱ្យអ៊ុយក្រែនទៀត។
ច្បាប់ថវិកាបណ្តោះអាសន្នអាមេរិក ដែលឱ្យមានការបើករដ្ឋាភិបាលបន្តរហូតដល់ថ្ងៃទី១៧ខែវិច្ឆិកាខាងមុខនេះ បានដកចេញចំនុចនៃការផ្តល់ជំនួយបន្ថែមដល់ប្រទេសអ៊ុយក្រែន ដែលជាអាទិភាពមួយរបស់សេតវិមាននិងត្រូវបានប្រឆាំងកាន់តែខ្លាំងឡើងដោយសមាជិកសភានៃគណបក្សសាធារណរដ្ឋ។
នៅក្នុងសុន្ទរកថារបស់ខ្លួនកាលពីថ្ងៃអាទិត្យម្សិលមិញ ប្រធានាធិបតីអ៊ុយក្រែន លោក Volodymyr Zelenskyy និយាយថា គ្មានអ្វីដែលនឹងធ្វើឱ្យអ៊ុយក្រែនចុះខ្សោយពីការប្រយុទ្ធប្រឆាំងនឹងរុស្ស៊ីនោះឡើយ។
ប្រធានាធិបតីសហរដ្ឋអាមេរិក លោក Joe Biden បានជំរុញកាលពីថ្ងៃអាទិត្យ ឱ្យសមាជិកសភាអាមេរិកខាងបក្សសាធារណរដ្ឋគាំទ្រច្បាប់មួយ ដើម្បីផ្តល់ការគាំទ្របន្ថែមដល់ប្រទេសអ៊ុយក្រែន ដោយលោកលើកឡើងថា លោកមានការធុញទ្រាន់ខ្លាំងនឹងនយោបាយដ៏គ្រោះថ្នាក់ ដែលស្ទើរតែនាំទៅដល់ការបិទរដ្ឋាភិបាលសហរដ្ឋអាមេរិក៕
ព័ត៌មានខ្លះក្នុងសេចក្តីរាយការណ៍នេះដកស្រង់មកពីទីភ្នាក់ងារសារព័ត៌មានReuters និងAP។
