ប្រធានាធិបតីអ៊ុយក្រែនលោក Volodymyr Zelenskyy គ្រោងជួបជាមួយថ្នាក់ដឹកនាំសហរដ្ឋអាមេរិកនៅរដ្ឋធានីវ៉ាស៊ីនតោននៅថ្ងៃព្រហស្បតិ៍នេះ ស្របពេលដែលលោកស្វះស្វែងរកការគាំទ្របន្ថែមទៀតសម្រាប់ការប្រយុទ្ធរបស់ប្រទេសអ៊ុយក្រែនប្រឆាំងនឹងការឈ្លានពានរបស់រុស្ស៊ី។
លោក Zelenskyy គ្រោងនឹងជួបជាមួយនឹងថ្នាក់ដឹកនាំសភាអាមេរិកទាំងខាងគណបក្សប្រជាធិបតេយ្យនិងគណបក្សសាធារណរដ្ឋ និងជួបពិភាក្សាជាមួយនឹងរដ្ឋមន្ត្រីការពារជាតិអាមេរិកលោក Lloyd Austin នៅក្រសួងការពារជាតិអាមេរិក មុនពេលលោកជួបជាមួយនឹងប្រធានាធិបតីអាមេរិកលោក Joe Biden នៅសេតវិមាន។
រដ្ឋបាលរបស់លោក Biden បានស្នើសភាឱ្យអនុម័តជំនួយយោធានិងមនុស្សធម៌ចំនួន ២៤ ពាន់លានដុល្លារសម្រាប់ប្រទេសអ៊ុយក្រែន។
អ្នកនាំពាក្យក្រុមប្រឹក្សាសន្តិសុខជាតិសេតវិមានលោក John Kirby បានប្រាប់អ្នកកាសែតកាលពីថ្ងៃពុធថា ថវិកាជំនួយនេះដែលរួមមានទាំងថវិកាជាង ២០ ពាន់លានដុល្លារសម្រាប់ផ្នែកការពារជាតិ នឹងជះ «ផលខ្លាំងក្លាលើការប្រយុទ្ធរបស់អ៊ុយក្រែន» នៅក្នុងរយៈពេលប៉ុន្មានខែខាងមុខនេះ។
សមាជិកសភាខាងគណបក្សសាធារណរដ្ឋមួយចំនួន ដែលក្នុងនោះរួមមានទាំងប្រធានរដ្ឋសភាលោក Kevin McCarthy ផងដែរ បានប្រឆាំងនឹងការគាំទ្របន្ថែមសម្រាប់អ៊ុយក្រែន។
លោក Mitch McConnell មេដឹកនាំគណបក្សសាធារណរដ្ឋនៅព្រឹទ្ធសភា បាននិយាយកាលពីថ្ងៃពុធថា លោកនឹងបង្ហាញអំណះអំណាងសម្រាប់ «ការគាំទ្រជាបន្តលើបុព្វហេតុអ៊ុយក្រែននេះថាមិនមែនធ្វើឡើងដោយចេញពីភាពសប្បុរសនោះទេ ប៉ុន្តែគឺចេញពីការផ្ដោតជាចម្បងលើផលប្រយោជន៍របស់សហរដ្ឋអាមេរិក»។
លោក McConnell បានរិះគន់លោក Biden ដោយបាននិយាយថាលោកស្ទាក់ស្ទើរនៅក្នុងការបង្ហាញហេតុផលដែលថា សហរដ្ឋអាមេរិកមាន «ចំណាប់អារម្មណ៍ជាចម្បងលើជ័យជម្នះរបស់អ៊ុយក្រែននិងសន្តិសុខរបស់អឺរ៉ុប»៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AFP។
