អគ្គលេខាធិការអង្គការអូតង់លោក Jens Stoltenberg បាននិយាយនៅថ្ងៃព្រហស្បតិ៍ម្សិលមិញថា កងកម្លាំងអ៊ុយក្រែនកំពុងរុលទៅមុខសន្សឹមៗ នៅចំពោះមុខនៃការប្រយុទ្ធដ៏ខ្លាំងក្លារបស់ខ្លួនប្រឆាំងនឹងកងទ័ពរុស្ស៊ី ហើយលោកបានជំរុញដល់ក្រុមសម្ព័ន្ធមិត្តទាំងអស់ឱ្យផ្តល់ជំនួយ បង្កើនការផលិតឧបករណ៍ការពារជាតិ និងបង្កើនការផ្តល់អាវុធយុទ្ធភណ្ឌដល់ប្រទេសអ៊ុយក្រែនបន្ថែមទៀត។
ថ្លែងជាមួយប្រធានាធិបតីអ៊ុយក្រែនលោក Volodymyr Zelenskyy លោក Stoltenberg បាននិយាយថា អង្គការអូតង់មានក្របខណ្ឌកិច្ចសន្សាក្នុងការផ្តល់គ្រាប់រំសេវសំខាន់ៗដល់ប្រទេសអ៊ុយក្រែន ដែលមានទឹកប្រាក់ប្រមាណ ២ពាន់ ៥រយ លានដុល្លារអាមេរិក។
លោក Stoltenberg បន្ថែមទៀតថា នេះជាផលប្រយោជន៍របស់អង្គការអូតង់ ក្នុងការផ្តល់ដល់អ៊ុយក្រែននូវអ្វីដែលខ្លួនត្រូវការ ដើម្បីឈ្នះសង្គ្រាមនឹងរុស្ស៊ី។
ដោយឡែកនៅក្នុងសហរដ្ឋអាមេរិកឯណោះវិញ ខណៈពេលដែលរដ្ឋាភិបាលសហរដ្ឋអាមេរិក អាចនឹងត្រូវបិទទ្វារក្នុងពេលឆាប់ៗខាងមុខនេះ កិច្ចប្រឹងប្រែងផ្តល់ជំនួយរបស់អាមេរិកទៅកាន់អ៊ុយក្រែនអាចមានការរអាក់រអួល។ នេះបើតាមការបញ្ជាក់ឱ្យដឹងរបស់អ្នកស្រី Sabrina Singh អ្នកនាំពាក្យរងក្រសួងការពារជាតិសហរដ្ឋអាមេរិក។
អ្នកនាំពាក្យរងក្រសួងការពារជាតិអាមេរិករូបនេះនិយាយថា អ្នកដែលប៉ះពាល់ដោយការបិទរដ្ឋាភិបាលអាមេរិក រួមមានមន្ត្រីស៊ីវិលក្រសួងការពារជាតិអាមេរិក ដែលពាក់ព័ន្ធនឹងការបណ្តុះបណ្តាលភាសារអង់គ្លេស ដល់ក្រុមអ្នកបើកបរយន្តហោះប្រយុទ្ធ F-16 របស់អ៊ុយក្រែន ដូចនេះបើមានការបិទរដ្ឋាភិបាលអាមេរិកមែននោះ នឹងអាចមានការប៉ះពាល់ដល់ការបណ្តុះបណ្តាលនេះ។ អ្នកស្រីបន្ថែមទៀតថា «មកដល់ពេលនេះ ខ្ញុំមិនមានអ្វីលម្អិតជាងនេះដើម្បីប្រាប់នោះឡើយ»។
ទន្ទឹមនឹងនេះដែរ ប្រទេសបារាំងបានសន្យាបន្តការគាំទ្ររបស់ខ្លួនដល់ប្រទេសអ៊ុយក្រែន ហើយប្រទេសទាំងពីរកំពុងជួបពិភាក្សាគ្នា ដើម្បីរក្សាការផ្តល់អាវុធដល់រដ្ឋាភិបាលអ៊ុយក្រែន។
គេនៅមិនទាន់ឃើញមានសេចក្តីលម្អិតណាមួយ អំពីអាវុធដែលបារាំងមានគម្រោងនឹងផ្តល់ដល់អ៊ុយក្រែននោះនៅឡើយ៕
លោក Jeff Seldin អ្នកឆ្លើយឆ្លងព័ត៌មានសន្តិសុខជាតិរបស់ VOA ចូលរួមចំណែកក្នុងសេចក្តីរាយការណ៍នេះ។ ព័ត៌មានមួយចំនួនត្រូវបានផ្តល់ដោយទីភ្នាក់ងារសារព័ត៌មាន The Associated Press, Agence France-Presse និង Reuters ។
