ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី
ទិដ្ឋភាព​អគារ​ចងចាំ​សង្គ្រាម​លោក​លើក​ទីពីរ ដែល​រង​ការ​បំផ្លិចបំផ្លាញ​ដោយសារ​ការ​ប្រយុទ្ធគ្នា​រវាង​អ៊ុយក្រែន​និង​រុស្ស៊ី​នៅ​ភូមិ Dolyna ក្នុង​តំបន់ Donetsk ប្រទេស​អ៊ុយក្រែន ថ្ងៃទី ៣ ខែវិច្ឆិកា ឆ្នាំ២០២២។

LIVE BLOG: ព្រឹត្តិការណ៍ថ្មីៗអំពីការ​ឈ្លានពាន​របស់​រុស្ស៊ី​លើ​អ៊ុយក្រែន ៣ វិច្ឆិកា ២០២២

រុស្ស៊ីបានចូលឈ្លានពានអ៊ុយក្រែន តាំងពីថ្ងៃទី២៤ ខែកម្ភៈ មក។ សូមតាមដានព្រឹត្តិការណ៍ថ្មីៗប្រចាំថ្ងៃទាក់ទងនឹងវិបត្តិអ៊ុយក្រែន នៅ​លើ​ទំព័រ Live Blog ដែលផ្សាយផ្ទាល់នេះ។

21:59 27.10.2022

ថ្ងៃព្រហស្បតិ៍ ទី២៧ ខែតុលា៖

  • ប្រទេស​អ៊ីរ៉ង់​អាច​ជំរុញ​ការ​ចូលរួម​របស់​ខ្លួន​នាពេល​ឆាប់ៗ​ខាង​មុខ​នេះ ​ជាមួយ​រុស្ស៊ីក្នុងការឈ្លានពាន​ប្រទេស​អ៊ុយក្រែន។ នេះ​បើ​តាម​ការវិភាគ​មួយ​ដែល​ត្រូវ​បាន​ចេញ​ផ្សាយ​ដោយ​ទស្សនាវដ្តី​គោលនយោបាយ​ការបរទេស​ (Foreign Policy)។ បន្ថែម​ទៅ​លើ​ការ​ផ្គត់​ផ្គង់យន្តហោះ​ដ្រូន​ដែល​គ្មាន​មនុស្ស​បើក​ទៅ​ឱ្យ​រុស្ស៊ី​ ដែល​អ៊ីរ៉ង់បានបដិសេធ​នោះ​ ប្រទេស​អ៊ីរ៉ង់ក្នុង​ពេល​ឆាប់ៗ​ខាង​មុខ​នេះ ​អាច​លក់​គ្រាប់មីស៊ីល​បាលីស្ទិក​ចម្ងាយ​ខ្លីប្រភេទ Fateh-110​ និង​ Zulfiqar​ ទៅ​ឱ្យ​រុស្ស៊ី​ ដើម្បី​បំពេញការផ្គត់ផ្គង់​របស់​រុស្ស៊ី​ដែល​គ្រឿង​សព្វាវុធ​មីស៊ីល​របស់​ខ្លួន​កំពុង​តែ​ខើច​ទៅៗ។​ កងកម្លាំង​ឆ្មាំ​បដិវត្តន៍​អ៊ីរ៉ង់ ​ត្រូវ​បាន​ដាក់​ពង្រាយ​រួច​ហើយនៅ​ក្នុង​ប្រទេស​អ៊ុយក្រែន​និង​ប្រទេស​បេឡារុស្ស​ ដើម្បី​ហ្វឹកហ្វឺន​កងកម្លាំង​រុស្ស៊ី​ប្រើប្រាស់​យន្តហោះដ្រូន​របស់​អ៊ីរ៉ង់។ នេះ​បើ​តាម​សេចក្តី​រាយការណ៍ព័ត៌មាន​មួយ​ចំនួន។​ ​ទីភ្នាក់ងារ​សារព័ត៌មានប្រទេស​អ៊ីស្រាអែល​កាល​ពី​សប្តាហ៍​មុន​ បាន​រាយការណ៍​ថា ទាហាន​អ៊ីរ៉ង់​១០​នាក់​ បាន​ស្លាប់​ក្នុង​ពេល​ដែល​កងទ័ព​អ៊ុយក្រែន​ វាយ​ប្រហារ​ទៅ​លើ​កងទ័ព​រុស្ស៊ី។​
  • តំបន់ជុំវិញ​ទីក្រុង Kherson ​ដែលស្ថិត​ក្នុង​ចំណោម​ទីក្រុង​មួយ​ចំនួន​ ដែលត្រូវ​បាន​គ្រប់គ្រង​តាំងពី​ដំបូង​នៃ​ការចូលឈ្លានពាន​របស់​កងកម្លាំង​រុស្ស៊ីកាល​ពី​ចុងខែ​កុម្ភៈ​នោះ​ ពេល​នេះ​កំពុង​រង​ការប្រយុទ្ធ​គ្នា​ដ៏​ខ្លាំងក្លា​ ខណៈ​ពេល​ដែល​ទាហាន​អ៊ុយក្រែន​ កំពុង​ព្យាយាម​ដណ្តើម​យកមក​វិញ។ នេះ​បើ​តាម​ការ​ចេញ​ផ្សាយ​របស់​កាសែត​The New York Times ។ ​ទំនប់​វារីអគ្គិសនីមួយដែល​ស្ថិត​នៅ​ក្បែរ​នោះ​ គឺ​ជា​ទីតាំង​ឆ្លងកាត់​ចុងក្រោយ​ដ៏​សំខាន់​មួយ​របស់​កងទ័ព​រុស្ស៊ី​ ដើម្បី​ប្រើប្រាស់​ឆ្លង​ទន្លេ Dnipro។ ប្រសិន​បើ​កងទ័ព​អ៊ុយក្រែនដណ្តើម​គ្រប់គ្រង​បាន​ទំនប់​វារីអគ្គិសនី​នោះ​ កងទ័ព​រុស្ស៊ី​រាប់ពាន់​នាក់​ ប្រហែល​ជា​ត្រូវ​ជាប់គាំង​ ​គ្មាន​ផ្លូវណា​ផ្សេងដក​ទ័ព​ថយ​ក្រោយ​នោះ​ឡើយ។​
  • សេចក្តី​រាយការណ៍​ព័ត៌មាន​នានានិង​បណ្តាញ​សង្គម​ក្នុង​ប្រទេស​រុស្ស៊ី​ បានបង្ហាញ​ថា​ កងទ័ព​រុស្ស៊ី​ជា​ច្រើន​នាក់​ដែល​កំពុង​ត្រូវ​បាន​បញ្ជូនទៅ​កាន់​សមរភូមិ​ប្រយុទ្ធនៅ​ក្នុង​ប្រទេស​អ៊ុយក្រែន​នោះ ពុំ​មានឧបករណ៍​យោធា​គ្រប់គ្រាន់ ​ឬ​ទទួល​បាន​ការបណ្តុះ​បណ្តាល​ល្អ​ត្រឹមត្រូវ​នោះ​ឡើយ។​ នេះ​បើ​យោង​ទៅ​លើ​ទី​ភ្នាក់ងារ​សារព័ត៌មាន ​AP ។​ ប្រធានាធិបតីរុស្ស៊ី​ លោក Vladimir Putin ​កាលពី​ខែ​មុន​ បាន​បញ្ជា​ឱ្យជ្រើស​រើសទ័ពចំនួន​៣​សែន​នាក់​បន្ថែម​ទៀត​ ដើម្បី​ជំរុញ​ការវាយប្រយុទ្ធ​នៅ​ក្នុង​ប្រទេស​អ៊ុយក្រែន។​ នៅ​ក្នុង​ពិធី​ថតរូបមួយ​ក្នុង​បន្ទាយ​យោធាមួយ​កន្លែង​កាល​ពី​ដើម​សប្តាហ៍​នេះ​ លោក Putin ​ត្រូវ​បាន​គេ​ឃើញ​ឈរ​ថត​ជា​មួយ​ក្រុមទាហាន​រុស្ស៊ី​ក្នុង​ឯកសណ្ឋាន​កងទ័ពថ្មីៗ ដែលបំពាក់​ដោយ​ឧបករណ៍​យោធា​ប្រយុទ្ធ​ ដែល​រួម​មាន​មួក​ការពារនិង​អាវក្រោះ​ផង​ដែរ​។​ ប៉ុន្តែ​សារព័ត៌មាន​និងក្រុម​សិទ្ធិមនុស្ស​ឯករាជ្យ​ បាន​លើក​ឡើង​ថា ការជ្រើស​រើស​កងទ័ព​ថ្មី​នោះ​មិន​ត្រូវបាន​ធ្វើឡើង​ល្អ​ទេ​ហើយ​ក្រុម​ទាហាន​រុស្ស៊ី​ ដែលទើប​ត្រូវ​បាន​បញ្ជូន​ទៅ​កាន់​សមរភូមិ​ប្រយុទ្ធ​នោះ ​ពុំ​មានការបណ្តុះ​បណ្តាល​និង​សម្ភារៈ​យោធាគ្រប់គ្រាន់​នោះ​ឡើយ។​ ​កងទ័ព​ទើបចូល​ថ្មី​ បាន​បង្ហោះ​រូបភាព​នៅ​លើ​បណ្តាញ​សង្គម​ ដែល​បង្ហាញ​ពី​អាវុធ​ចាស់ៗ​ដែល​មាន​ច្រេះ​ចាប់​ និង​ស្ថានភាព​រស់​នៅ​មិន​ល្អ។
  • អាជ្ញាធរដែល​ត្រូវ​បាន​តែងតាំង​ដោយ​រុស្ស៊ី​នៅ​ក្នុង​តំបន់​ Zaporizhzhia​ ក្នុង​ប្រទេស​អ៊ុយក្រែន​ បាន​បញ្ជា​ឱ្យ​មាន​ការត្រួត​ពិនិត្យទៅ​លើ​ប្រព័ន្ធទូរស័ព្ទ​ដៃ​របស់​ប្រជាពលរដ្ឋ​នៅ​ក្នុង​តំបន់​នោះ ​ដោយ​ប្រកាស​អនុវត្ត​ការដាក់​កំហិត​របស់​យោធា​ នៅ​ក្រោម​ច្បាប់​អាជ្ញាសឹក​ថ្មី ដែល​បាន​ប្រកាសដាក់​ឱ្យ​ប្រើប្រាស់​ដោយ​ប្រធានាធិបតី​រុស្ស៊ី​លោក​Vladimir Putin។ ​លោក Vladimir Rogov ​ដែល​ជា​មន្ត្រី​ដែល​ត្រូវ​បាន​តែងតាំង​ដោយ​រុស្ស៊ីក្នុង​តំបន់ Zaporizhzhia ​បានថ្លែង​ថា​៖ «ចាប់ពី​ពេល​នេះ​ទៅ​ក្នុង​តំបន់​Zaporizhzhia ​មន្ត្រី​អនុវត្ត​ច្បាប់​ បាន​ចាប់ផ្តើម​ធ្វើការ​ត្រួតពិនិត្យជា​រួម ទៅ​លើ​ការប្រើប្រាស់​ទូរស័ព្ទ​ចល័តរបស់​ប្រជាពលរដ្ឋនៅ​ក្នុង​តំបន់​នេះ​»។ ​លោក​និយាយ​ថា​ អ្នក​ប្រើ​ទូរស័ព្ទ​នានា ដែលមាន​ភ្ចាប់​ប្រភព​ឃោសនាផ្សេងៗ​ នៃ​របប​ភេរវកម្ម​ក្រុងកៀវ​នោះ​ នឹង​ត្រូវ​ទទួល​ការ​ព្រមាន​ជា​មុន​សិន​ មុន​នឹង​ទទួល​រង​ការផាក​ពិន័យ»។ នេះ​បើតាម​ទី​ភ្នាក់ងារ​សារព័ត៌មានAFP។ ​
  • វិមាន​ក្រឹមឡាំង​និយាយ​នៅ​ថ្ងៃ​ព្រហស្បតិ៍​នេះ​ថា​ បើយោង​ទៅ​លើ​ប្រធានាធិបតី​រុស្ស៊ី​ លោក Vladimir Putin ​ប្រទេស​អ៊ុយក្រែន​ បាន​ដក​ខ្លួន​ចេញ​ពី​ការចរចា​សន្តិភាព​ជាមួយ​រុស្ស៊ី​ កាលពី​ខែ​មីនា​កន្លង​ទៅ​នេះ ដោយសារ​មាន​បញ្ជា​មក​ពីសហរដ្ឋ​អាមេរិក។​ «ខ្លឹមសារ​នៃ​កិច្ចចរចា​នោះ​ ត្រូវ​បាន​ត្រៀម​រួច​រាល់​ហើយ ​ ស្រាប់តែ​ភ្លាមៗ​នោះ ​ខាង​ភាគី​អ៊ុយក្រែន​ បាន​សម្រេច​ចិត្ត​ដក​ខ្លួន​ចេញពី​ការចរចា​ ហើយ​ភាគី​ខាង​ប្រទេស​អ៊ុយក្រែន​ បាន​ប្រកាស​ពី​ការមិនចង់​បន្ត​ការចរចា​របស់​ខ្លួន»។ នេះ​បើ​តាមអ្នក​នាំពាក្យ​វិមាន​ក្រឹមឡាំង​ លោក Dmitry Peskov ​ដែល​បាន​ប្រាប់​ក្រុម​អ្នក​សារព័ត៌មាន​ ដោយ​បន្ថែម​ថា​ លោក Putin ​បាន​ចាត់​ទុក​ថា​ វា​ច្បាស់​ណាស់​ដែល​ថា​ ការសម្រេច​ចិត្ត​ឈប់​ចរចារបស់​ភាគី​ប្រទេស​អ៊ុយក្រែននោះ ​គឺ«ធ្វើ​ឡើង​ដោយ​មាន​បញ្ជា​ពីរដ្ឋាភិបាល​ក្រុង​វ៉ាស៊ីនតោន» ។ នេះ​បើ​តាម​សេចក្តី​រាយការណ៍​របស់​ទី​ភ្នាក់ងារ​សារព័ត៌មាន​ AFP។
02:17 26.10.2022

ថ្ងៃអង្គារ ទី២៥ ខែតុលា៖

  • ប្រធានាធិបតី​ប្រទេស​អាល្លឺម៉ង់​លោក Frank-Walter Steinmeier បាន​អញ្ជើញ​ទៅដល់​រដ្ឋធានី​កៀវ​នៃ​ប្រទេស​អ៊ុយក្រែន​កាលពី​ថ្ងៃ​អង្គារ។ នេះ​បើ​តាម​អ្នកនាំពាក្យ​របស់​លោក​បាន​ប្រាប់​ទីភ្នាក់ងារ​ព័ត៌មាន AFP​ ដើម្បី​បញ្ជាក់​ពី​ដំណើរ​ទស្សនកិច្ច​មិន​ប្រាប់​ឱ្យ​ដឹង​ជាមុន​របស់​លោក​ទៅកាន់​ប្រទេស​អ៊ុយក្រែន។ ដំណើរ​ទស្សនកិច្ច​នេះគឺជា​ទស្សនកិច្ច​លើក​ដំបូង​របស់​លោក​ទៅកាន់​ប្រទេស​អ៊ុយក្រែន​ចាប់តាំង​ពី​រុស្ស៊ី​បាន​ឈ្លានពាន​ប្រទេស​អ៊ុយក្រែន​កាលពី​ខែ​កុម្ភៈ​មក ហើយ​បាន​កើត​មាន​ឡើង ៥ខែ​បន្ទាប់ពី​លោកSteinmeier ដែល​នៅ​ពេល​នោះ​ស្ថិត​នៅក្រោម​ការរិះគន់​យ៉ាង​ខ្លាំង​ចំពោះគោលនយោបាយ​បន្ធូរបន្ថយ​ការតានតឹង​អស់​ជា​ច្រើន​ឆ្នាំ​របស់​លោក​ជាមួយ​រដ្ឋាភិបាល​ក្រុង​មូស្គូ​ដែល​ត្រូវ​បាន​ធ្វើ​ព្រងើយ​កន្តើយ​ដោយ​រដ្ឋាភិបាល​ក្រុង​កៀវ។ លោក​ប្រធានាធិបតី​ក៏​បាន​លុបចោល​ដំណើរ​ទស្សនកិច្ច​នៅ​នាទី​ចុងក្រោយ​កាលពី​សប្តាហ៍​មុន​ដោយសារ​ហេតុផល​សន្តិសុខ​ដែល​បាន​បណ្តាល​ឱ្យ​មាន​ការរិះគន់​ពី​គណបក្ស​ប្រឆាំង​របស់​អាល្លឺម៉ង់។ តាម​ការ​បញ្ជាក់​របស់​អ្នក​នាំ​ពាក្យ​របស់​លោក លោក​ប្រធានាធិបតី​បាន​និយាយ​ថា៖ «ខ្ញុំ​រំពឹង​នឹង​មាន​ជំនួប​របស់​ខ្ញុំជាមួយ​ប្រធានាធិបតី​អ៊ុយក្រែន​លោក Volodymyr Zelenskyy នៅ​ក្នុង​រដ្ឋធានី​កៀវ»។ មុន​ជួប​លោក​ប្រធានាធិបតី Zelenskyy លោក Steinmeierនឹង​ទៅ​បំពេញ​ទស្សនកិច្ច​នៅទីក្រុង​មួយ​នៅ​ភាគ​ខាង​ជើង​អ៊ុយក្រែន​នៅ​ជិត​ព្រំដែន​ប្រទេស​បេឡារុស​ដែល​អ៊ុយក្រែន​និយាយ​ថា ខ្លួន​បាន​រំដោះ​ពី​កងទ័ព​រុស្ស៊ី ក៏ប៉ុន្តែ បាន​បំផ្លិច​បំផ្លាញ​ហេដ្ឋារចនាសម្ព័ន្ធ។
  • រដ្ឋាភិបាល​អ៊ុយក្រែន​កាលពី​ថ្ងៃ​ចន្ទ​បាន​ចោទប្រកាន់​រុស្ស៊ី​ពី​ការ​មាន​បំណង​អូស​បន្លាយ​ការ​មក​ដល់​នៃ​កប៉ាល់​ដឹក​ទំនិញ​ចំនួន១៦៥គ្រឿង​ពី​ប្រទេស​តួកគី​ដែល​កំពុង​ធ្វើ​ដំណើរ​ទៅកាន់​កំពង់ផែ​នានា​របស់​អ៊ុយក្រែន​ដើម្បី​ដឹក​គ្រាប់​ធញ្ញជាតិ។ នេះ​បើ​តាម​សេចក្តី​រាយការណ៍​របស់​ទីភ្នាក់ងារ​ព័ត៌មាន AFP។ ក្រសួង​ការបរទេស​អ៊ុយក្រែន​បាន​និយាយ​ថា​ ពួក​អធិការ​របស់​រុស្ស៊ី​«បាន​អូសបន្លាយ​ពេល​ការត្រួត​ពិនិត្យ​កប៉ាល់​ទាំង​នោះ។ ជា​លទ្ធផល កប៉ាល់​ជាង១៦៥គ្រឿង​បាន​ជាប់គាំងជា​ជួរ​នៅជិត​ច្រក​សមុទ្រ Bosphorus ហើយ​ចំនួន​នេះ​បន្ត​កើន​ឡើង​ជា​រៀង​រាល់​ថ្ងៃ»។ ក្រសួង​ការបរទេស​អ៊ុយក្រែន​បាន​បញ្ជាក់​ទៀត​ថា៖ «យើង​មាន​ហេតុផល​ជឿ​ថា ការអូស​បន្លាយ​ពេល​ក្នុង​ការធ្វើ​អធិការកិច្ច​របស់​រុស្ស៊ី​ដល់​កប៉ាល់​របស់​កម្មវិធី​កិច្ច​ផ្តួចផ្តើម​គ្រាប់​ធញ្ញជាតិ​ជា​ហេតុផល​នយោបាយ។ កប៉ាល់​ទាំង​នោះ​បាន​រង់ចាំ​ដើម្បី​ទទួល​បាន​ការអនុញ្ញាត​ដំណើរការ​ពិនិត្យ​ការសង្ស័យ​ដែល​តម្រូវ​នៅ​ក្រោម​កិច្ចព្រមព្រៀង​ដែល​គាំទ្រ​ដោយ​តួកគី​និង​អង្គការ​សហប្រជាជាតិ​ដែល​មាន​គោលបំណង​យក​គ្រាប់​ធញ្ញជាតិ​អ៊ុយក្រែន​ទៅកាន់​ទីផ្សារ​បរទេស​ហើយ​និង​បន្ធូរបន្ថយ​ការភ័យខ្លាច​នៃ​វិបត្តិ​ចំណី​អាហារ​សាកលលោក។
  • ប្រធានាធិបតី​អ៊ុយក្រែន​លោក Volodymyr Zelenskyy កាលពី​ថ្ងៃ​អង្គារ​បាន​សុំ​ឱ្យ​សហ​គមន៍​អន្តរជាតិ​រ៉ាប់រង​ឱនភាព​ថវិកា​ដែល​គេ​រំពឹងទុក​ចំនួន៣៨ពាន់​លាន​ដុល្លារ​នៅ​ឆ្នាំ​ក្រោយ​សម្រាប់​ប្រទេស​ដែល​ហែកហួរ​ដោយ​សង្គ្រាម​របស់​លោក ដោយការឈ្លានពានរបស់​រដ្ឋាភិបាល​ក្រុង​មូស្គូ​ក៏​បាន​ធ្វើ​ឱ្យ​ប៉ះពាល់​យ៉ាង​ខ្លាំង​ដល់​សេដ្ឋកិច្ច​ដែរ។ នេះ​បើ​តាម​សេចក្តី​រាយការណ៍​របស់​ទីភ្នាក់ងារ​ព័ត៌មានAFP។ ការបាញ់​ផ្តក់​ដ៏​ប្រល័យ​របស់​រុស្ស៊ី​បានបង្កើន​ខ្លាំង​ឡើង​នៅ​ទីក្រុង Bakhmut ភាគ​ខាង​កើត​តំបន់ Donbas ជា​ទីកន្លែង​ដែល​អ្នក​កាសែត AFP បាន​ឃើញ​ផ្សែង​លេចចេញ​ពី​សមរភូមិ​ដែល​មាន​ការ​ប្រយុទ្ធ​គ្នា​ដ៏​ខ្លាំង​រវាង​កងកម្លាំង​រដ្ឋាភិបាល​ក្រុង​មូស្គូ​និង​កង​កម្លាំង​រដ្ឋាភិបាល​ក្រុង​កៀវ​ដើម្បី​ព្យាយាម​កាន់កាប់​តំបន់​នោះ។ ហើយ​ពួក​អាជ្ញាធរ​ដែល​លម្អៀង​ខាង​រុស្ស៊ី​នៅ​ក្នុង​ទីក្រុង Melitopol ភាគ​ខាង​កើត​អ៊ុយក្រែន​ដែលឥឡូវនេះ​ត្រូវ​បាន​ត្រួតត្រា​ដោយ​កងកម្លាំង​របស់​រដ្ឋាភិបាល​ក្រុង​មូស្គូ​បាន​និយាយ​ថា គ្រាប់បែក​បង្កប់​ក្នុង​រថយន្ត​មួយ​គ្រឿង​បាន​ផ្ទុះ​នៅ​ជិត​ការិយាល័យ​របស់​បណ្តាញ​ព័ត៌មាន​ក្នុង​ស្រុក​ដែល​បាន​ធ្វើ​ឱ្យ​មនុស្ស៥នាក់​រង​របួស។ នៅឯ​សន្និសីទ​អន្តរជាតិ​សម្រាប់​កសាង​ប្រទេស​អ៊ុយក្រែន​ឡើង​វិញ​នៅ​ក្នុង​ទីក្រុង​បែរឡាំង​នៃ​ប្រទេស​អាល្លឺម៉ង់ លោក​ប្រធានាធិបតីZelensky បាន​ជំរុញ​ឱ្យ​ពួក​មេដឹកនាំ​អឺរ៉ុប​ផ្តល់​ការគាំទ្រ​ខាង​ហិរញ្ញវត្ថុ​កាន់តែ​ច្រើន​ឡើង​សម្រាប់​ប្រទេស​របស់​លោក​អស់​រយៈពេល​ជាង៨ខែ​ក្រោយពី​ប្រធានាធិបតី​រុស្ស៊ី​លោកVladimir Putin បាន​បញ្ជូន​កងទ័ព​រុស្ស៊ី​ចូល​ក្នុង​ប្រទេស​អ៊ុយក្រែន។
  • សហរដ្ឋ​អាមេរិក​កំពុង​ពិចារណា​បញ្ជូន​ឧបករណ៍​ការពារ​ដែន​អាកាស​ប្រភេទ HAWK ចំណាស់ៗ​ពី​ឃ្លាំង​របស់​ខ្លួន​ទៅ​កាន់​ប្រទេស​អ៊ុយក្រែន​ដើម្បី​ជួយ​អ៊ុយក្រែន​ការពារ​ទប់ទល់​នឹង​ការវាយ​ប្រហារ​ដោយ​ដ្រូន​និង​កាំជ្រួច Cruise របស់​រុស្ស៊ី។ នេះ​បើ​តាម​មន្ត្រី២ រូប​របស់​សហរដ្ឋ​អាមេរិក​ដែល​បាន​ប្រាប់​ទីភ្នាក់ងារ​ព័ត៌មាន Reuters។ កាំជ្រួច​មីស៊ីល​បាញ់​ស្ទាក់​ប្រភេទ HAWK នឹង​ត្រូវ​ធ្វើ​បច្ចុប្បន្នភាព​ដល់​ប្រព័ន្ធ​ការពារ​កាំជ្រួច​មីស៊ីល Stinger ដែល​ជា​ប្រព័ន្ធ​ការពារ​ដែន​អាកាស​តូច​ជាង ​មាន​វង់​ប្រតិបត្តិការ​ខ្លី​ជាង ​ដែល​សហរដ្ឋ​អាមេរិក​បាន​បញ្ជូន​រួចហើយ​ដើម្បី​ទប់ទល់​ការឈ្លានពាន​របស់​រដ្ឋាភិបាល​ក្រុង​មូស្គូ។ រដ្ឋាភិបាល​រុស្ស៊ី​កាលពី​ថ្ងៃ​អង្គារ​បាន​បង្កើន​ការ​អះអាង​របស់​ខ្លួន​ថា រដ្ឋាភិបាល​ក្រុង​កៀវ​មាន​គម្រោង​ប្រើ​«គ្រាប់បែក​វិទ្យុសកម្ម» (dirty bomb) ​នៅ​ក្នុង​ប្រទេស​អ៊ុយក្រែន​ដោយ​បាន​ព្រមាន​ប្រទេស​លោក​ខាង​លិច​ពី​ភាព​គ្រោះថ្នាក់​ដោយ​បដិសេធគោលជំហរ​របស់​រដ្ឋាភិបាលក្រុង​មូស្គូ​នោះ។ នេះ​បើ​តាម​សេចក្តី​រាយការណ៍​របស់​ទីភ្នាក់ងារ​ព័ត៌មាន Reuters។ ពួក​មន្ត្រី​ជា​ច្រើន​របស់​ប្រទេស​អ៊ុយក្រែន សហរដ្ឋ​អាមេរិក ចក្រភព​អង់គ្លេស​និង​បារាំង​បាន​ច្រានចោល​ការអះអាង​របស់​រដ្ឋាភិបាល​ក្រុង​មូស្គូ​ដែល​ថា រដ្ឋាភិបាល​ក្រុង​កៀវ​អាច​កំពុង​ប្រុងប្រៀប​ចុច​បំផ្ទុះ​ឧបករណ៍​វិទ្យុ​សកម្ម​នៅ​ក្នុង​ប្រទេស​អ៊ុយក្រែន៕
22:59 24.10.2022

ថ្ងៃចន្ទ ទី ២៤ ខែតុលា៖

  • បណ្ដា​បស្ចិម​ប្រទេស​បាន​ចោទប្រកាន់​រុស្ស៊ី​កាល​ពី​ថ្ងៃចន្ទ​ថា​បាន​រៀប​គម្រោង​គម្រាម​ប្រើប្រាស់​គ្រាប់​បែកដែល​មាន​ផ្ទុក​សារធាតុ​នុយក្លេអ៊ែរ​នៅ​ក្នុង​សង្គ្រាម​នៅ​អ៊ុយក្រែន ខណៈ​ដែល​រុស្ស៊ី​បាន​ជម្លៀស​ជនស៊ីវិល​ចេញ​ពី​ទីក្រុង​មួយ​នៅ​ប៉ែក​ខាង​ត្បូង​អ៊ុយក្រែន ដែល​គេ​រំពឹង​ថា​នឹង​មាន​សង្គ្រាម​ធំ​មួយ​កើតឡើង។ នេះ​បើ​យោង​តាម​សេចក្ដីរាយការណ៍​របស់​ទីភ្នាក់ងារ​ព័ត៌មាន Reuters។ ដោយ​កងកម្លាំង​អ៊ុយក្រែន​បាន​វាយ​រុល​ទៅ​មុខ​នៅ​ក្នុង​ខេត្ត Kherson ដែល​កាន់​កាប់​ដោយ​រុស្ស៊ី លោក Sergei Shoigu រដ្ឋមន្ត្រី​ការពារ​ប្រទេស​រុស្ស៊ី បាន​ហៅ​ទូរសព្ទ ទៅ​កាន់​សមភាគី​បស្ចិម​ប្រទេស​កាល​ពី​ថ្ងៃ​អាទិត្យ ដើម្បី​ប្រាប់​ពួកគេ​ថា រុស្ស៊ី​សង្ស័យ​ថា​អ៊ុយក្រែន​មាន​ផែនការ​ប្រើប្រាស់​នូវ​អ្វី​ដែល​គេ​ហៅ​ថា «គ្រាប់បែក​ដែល​មាន​ផ្ទុក​សារធាតុ​វិទ្យុ​សកម្ម»។
  • យោធា​រុស្ស៊ី​និយាយ​ថា ខ្លួន​បាន​ត្រៀម​កងកម្លាំង​របស់​ខ្លួន​រួចរាល់​ដើម្បី​តបត​នឹង​ការប្រើប្រាស់​ «គ្រាប់បែក​ដែល​មាន​ផ្ទុក​សារធាតុ​វិទ្យុ​សកម្ម»​ពី​អ៊ុយក្រែន នៅ​ក្នុង​វាយប្រហារ​បោក​បញ្ឆោត​មួយ​ដែល​នឹង​ចោទប្រកាន់​ថា​ជា​ស្នាដៃ​របស់​រុស្ស៊ី។ ការ​អះអាង​នេះ​ត្រូវ​បាន​បដិសេធ​ខ្លាំងៗ​ដោយ​សហរដ្ឋ​អាមេរិក​និង​ក្រុម​សម្ព័ន្ធមិត្ត​របស់​ខ្លួន។ នេះ​បើ​យោង​តាម​សេចក្ដីរាយការណ៍​របស់​ទីភ្នាក់ងារ​ព័ត៌មាន AP។ លោក​ឧត្តមសេនីយ៍ Igor Kirillov ប្រធាន​កងកម្លាំង​ការពារ​ការវាយប្រហារ​ដោយ​សារធាតុ​វិទ្យុសកម្ម ជាតិ​គីមី និង​ជីវសាស្ត្រ​របស់​យោធា​រុស្ស៊ី​ បាន​ថ្លែង​កាល​ពី​ថ្ងៃ​ចន្ទ​ថា យោធា​រុស្ស៊ី​បាន​ត្រៀម​ខ្លួន​រួចរាល់​ដើម្បី​ធ្វើ​ប្រតិបត្តិការ​ក្នុង​ករណី​ដែល​មាន​ការ​វាយប្រហារ​ដោយ​ប្រើ​សារធាតុ​វិទ្យុសកម្ម។
  • អាជ្ញាធរ​រុស្ស៊ី​និយាយ​ថា កងកម្លាំង​អ៊ុយក្រែន​បាន​បាញ់​គ្រាប់​រ៉ុក្កែត​ទៅ​លើ​រោងចក្រ​ផលិត​វារី​អគ្គិសនី​ដ៏​ធំ​មួយ​នៅ​តំបន់ Kherson នៅប៉ែក​ខាង​ត្បូង​នៃ​ប្រទេស​អ៊ុយក្រែន។ នេះ​បើ​តាម​ទីភ្នាក់ងារ​ព័ត៌មាន AP។ ទីភ្នាក់ងារ​ព័ត៌មាន​នានា​របស់​រុស្ស៊ី​បាន​ផ្សព្វផ្សាយ​ព័ត៌មាន​ដោយ​យោង​តាម​សេចក្ដីថ្លែងការណ៍​មួយ​ពី​ទីភ្នាក់ងារ​សង្គ្រោះ​បន្ទាន់​ថ្នាក់​តំបន់​កាល​ពី​ថ្ងៃ​ចន្ទ ដោយ​និយាយ​ថា យោធា​អ៊ុយក្រែន​បាន​បាញ់​រ៉ុក្កែត​ចំនួន ១៩ គ្រាប់​ទៅ​លើ​រោងចក្រ Kakhovka និង​បាន​បាញ់​ចំ​គោលដៅ​ចំនួន ៣ គ្រាប់។ នៅ​មិន​ទាន់​មាន​ព័ត៌មាន​លម្អិត​ភ្លាមៗ​អំពី​តួលេខ​ជនរងគ្រោះ​នៅ​ឡើយ​ទេ ហើយ​ការ​ខូចខាត​ក៏​កំពុង​ត្រូវ​បាន​គេ​វាយតម្លៃ។
  • រដ្ឋមន្ត្រី​ការបរទេស​អ៊ុយក្រែន​លោក Dmytro Kuleba កំពុង​តែ​ជំរុញ​ឱ្យ​អង្គការ​ថាមពល​បរមាណូ​អន្តរជាតិ​របស់​អង្គការ​សហប្រជាជាតិ​បញ្ជូន​ជា​បន្ទាន់​នូវ​ក្រុម​ការងារ​អធិការកិច្ច​ទៅ​កាន់​ប្រទេស​អ៊ុយក្រែន​ដើម្បី​តបត​នឹង​ការ​អះអាង​របស់​រដ្ឋាភិបាល​ក្រុង​មូស្គូ​ដែលថា អ៊ុយក្រែន​កំពុង​តែ​ត្រៀម«បង្ក​រឿង»​ដោយ​ប្រើ​ «គ្រាប់បែក​ដែល​មាន​ផ្ទុក​សារធាតុ​វិទ្យុ​សកម្ម»។ នេះ​បើ​យោង​តាម​សេចក្ដីរាយការណ៍​របស់​ទីភ្នាក់ងារ​ព័ត៌មាន AP។ លោក Kuleba និយាយ​កាល​ពី​ថ្ងៃ​ចន្ទ​ថា លោក​បាន​លើក​សំណើ​ដូចនេះ​តាមរយៈ​ការ​ហៅ​ទូរសព្ទ​ជាមួយ​នឹង​លោក Rafael Grossi ប្រធាន​អង្គការ​ថាមពល​បរមាណូ​អន្តរជាតិ។ លោក Kuleba និយាយថា​ លោក Grossi បាន​ព្រមព្រៀង​ថា​នឹង​បញ្ជូន​ក្រុមអធិការកិច្ច​មួយ​ទៅ​កាន់​អ៊ុយក្រែន។ លោកKuleba បាន​ថ្លែង​បន្ថែម​ថា «​អ៊ុយក្រែន​មិនដូច​រុស្ស៊ី​នោះ​ទេ។ អ៊ុយក្រែន​តែងតែ​មាន​តម្លាភាព។ យើង​គ្មាន​អ្វី​ដែល​ត្រូវ​លាក់បាំង​នោះ​ទេ»។
  • រដ្ឋបាល​តំបន់ Kherson នៃ​ប្រទេស​អ៊ុយក្រែន ដែល​តែងតាំង​ដោយ​រុស្ស៊ី បាន​និយាយ​កាល​ពី​ថ្ងៃ​ចន្ទ​ថា ខ្លួន​បាន​រៀបចំ​បុរសមួយ​ចំនួន​នៅ​ក្នុង​តំបន់​នេះ​ឱ្យ​ចូលរួម​ក្នុង​ក្រុម​សកម្មប្រយុទ្ធ។ នៅ​ក្នុង​កំណត់ហេតុ​មួយ​លើ Telegram អាជ្ញាធរ​បាន​និយាយ​ថា បុរស​ទាំង​នោះ​មាន​«ឱកាស»​ចូលរួម​ជាមួយ​នឹង​ក្រុម​ការពារ​ដែនដី​ប្រសិន​បើ​ពួកគេ​ជ្រើសរើស​បន្ដ​រស់នៅ​ក្នុង​តំបន់ Kherson ដោយ​ស្ម័គ្រចិត្ត។ នេះ​បើ​យោង​តាម​សេចក្ដីរាយការណ៍​របស់​ទីភ្នាក់ងារ​ព័ត៌មាន Reuters។
  • ប្រធានាធិបតី​បារាំង​លោក Emmanuel Macron បាន​និយាយ​កាល​ពី​ថ្ងៃអាទិត្យ​ថា ព្រះវិហារ​សាសនា​គ្រិស្ត​និកាយ Orthodox របស់​រុស្ស៊ី អនុញ្ញាត​ឱ្យ​អាជ្ញាធរ​រុស្ស៊ី​ពង្វក់​ថា​ ការ​ធ្វើ​សង្គ្រាម​របស់​ខ្លួន​នៅ​ក្នុង​ប្រទេស​អ៊ុយក្រែន​ជា​រឿង​ត្រឹមត្រូវ ហើយ​លោក Macron បាន​ជំរុញ​ឱ្យ​ព្រះវិហារ​នេះ​ប្រឆាំង​នឹង​សម្ពាធ​របៀប​នេះ។ នេះ​បើ​យោង​តាម​សេចក្ដីរាយការណ៍​របស់​ទីភ្នាក់ងារ​ព័ត៌មាន Reuters។ លោក Macron ដែល​កំពុង​ធ្វើ​ទស្សនកិច្ច​ផ្លូវការ​នៅ​ក្នុង​ប្រទេស​អ៊ីតាលី បាន​ថ្លែង​យ៉ាង​ដូច្នេះ​នៅ​ក្នុង​សុន្ទរកថា​មួយ​នៅឯ​សន្និសីទ​សារព័ត៌មាន​អន្តរជាតិមួយ ដែល​រៀបចំ​ឡើង​ដោយ Italy's Sant' Egidio Community ដែល​ជា​អង្គការ​សប្បុរសធម៌​មួយ​នៅ​ទូទាំង​ពិភពលោក។
  • នាយករដ្ឋមន្ត្រី​អ៊ុយក្រែន​លោក Denys Shmyhal បាន​និយាយ​កាល​ពី​ថ្ងៃ​ចន្ទ​ថា អ៊ុយក្រែន​ប៉ាន់ស្មាន​ថា ​ការ​ស្ដារ​ប្រទេស​ឡើង​វិញ​ក្រោយ​សង្គ្រាម​បញ្ចប់​នឹង​ត្រូវ​ការ​ប្រាក់​ជិត ៧៥០ ពាន់​លាន​ដុល្លារ។ នេះ​បើ​យោង​តាម​សេចក្ដីរាយការណ៍​របស់​ទីភ្នាក់ងារ​ព័ត៌មាន Reuters។ លោក​ Shmyhal បាន​ថ្លែង​យ៉ាង​ដូច្នេះ​នៅ​ក្នុង​វេទិកា​ជំនួញ​មួយ​រវាង​អាល្លឺម៉ង់​និង​អ៊ុយក្រែន។ លោក​ក៏​បាន​លើក​ឡើង​អំពី​លទ្ធភាព​នៃ​ការ​វិនិយោគ​ទៅ​លើ​វិស័យ​កសិកម្ម​របស់​អ៊ុយក្រែន និង​បាន​ថ្លែង​អំណរគុណ​ដល់​អាល្លឺម៉ង់​ចំពោះ​ការ​ផ្ដល់​ការការពារ​ដែនអាកាស​ដល់​អ៊ុយក្រែន។
  • អធិការបតី​អាល្លឺម៉ង់​លោក Olaf Scholz និយាយ​ថា ការ​ស្ដារ​ប្រទេស​អ៊ុយក្រែន​ឡើង​វិញ​នឹង​ក្លាយ​ជា​«កិច្ចការ​របស់​មនុស្ស​មួយ​ជំនាន់» ដែល​គ្មាន​ប្រទេស ម្ចាស់​ជំនួយ ឬ​ស្ថាប័ន​អន្តរជាតិ​ណា​មួយ​អាច​ធ្វើ​ការងារ​នេះ​តែ​ម្នាក់​ឯង​បាន​ទេ។ លោក Scholz បាន​ថ្លែង​ដូច្នេះ​កាល​ពី​ថ្ងៃ​ចន្ទ នៅ​ក្នុង​វេទិកា​ជំនួញ​អាល្លឺម៉ង់​អ៊ុយក្រែន ក្នុង​រយៈពេល​មួយ​ថ្ងៃ​ក្រោយ​មក បន្ទាប់​ពី​លោក​និង​ប្រធាន​គណៈកម្មការ​ប្រតិបត្តិ​សហភាព​អឺរ៉ុប​បាន​ធ្វើ​ជា​ម្ចាស់​ផ្ទះ​រៀបចំ​ជំនួប​មួយ​ជាមួយ​នឹង​អ្នក​ជំនាញ​ដើម្បី​ជួយ​ប្រមែប្រមូល​ការ​គាំទ្រ​អន្តរជាតិ​សម្រាប់​ជួយ​ស្ដារ​ប្រទេស​អ៊ុយក្រែន​ឡើង​វិញ។ នេះ​បើ​យោងតាម​ទីភ្នាក់ងារ​ព័ត៌មាន​ AP។
  • រដ្ឋមន្ត្រី​ការពារ​ជាតិ​រ៉ូម៉ានី​លោក Vasile Dincu បាន​លាលែង​ពី​តំណែង​កាល​ពី​ថ្ងៃ​ចន្ទ ដោយ​និយាយ​ថា លោក​មិន​អាចធ្វើការ​ជាមួយ​នឹង​ប្រធានាធិបតី​រ៉ូម៉ានី​បានទេ។ ការ​លាលែង​ពី​តំណែង​នេះ​ត្រូវ​បាន​ធ្វើ​ឡើង​ក្នុង​រយៈពេល​ប៉ុន្មាន​សប្ដាហ៍​បន្ទាប់​ពី​លោក​និយាយ​ថា ឱកាស​តែ​មួយ​គត់​របស់​អ៊ុយក្រែន​ក្នុង​ការ​បញ្ចប់​សង្គ្រាម​នេះ​គឺ​ត្រូវ​ចរចា​ជាមួយ​នឹង​រុស្ស៊ី។ នេះ​បើ​យោង​តាម​ទីភ្នាក់ងារ​ព័ត៌មាន​ Reuters។
  • ការិយាល័យ​ប្រធានាធិបតី​អ៊ុយក្រែន​បាន​ឱ្យ​ដឹង​នៅ​ថ្ងៃ​ចន្ទ​នេះ​ថា ជនស៊ីវិល​យ៉ាង​ហោច​ណាស់​ចំនួន ៦ នាក់​ត្រូវ​បាន​សម្លាប់ ហើយ​មនុស្ស​ចំនួន ៥ នាក់​ផ្សេង​ទៀត​បាន​រងរបួស​ដោយសារ​ការ​វាយប្រហារ​របស់​រុស្ស៊ី​លើ​តំបន់​មួយ​ចំនួន​ក្នុង​ប្រទេស​អ៊ុយក្រែន​នៅ​ក្នុង​រយៈពេល ២៤ ម៉ោង​ចុងក្រោយ​នេះ។ នេះ​បើ​យោង​តាម​សេចក្ដីរាយការណ៍​របស់​ទីភ្នាក់ងារ​ព័ត៌មាន AP។
22:53 21.10.2022

ថ្ងៃសុក្រ ទី ២១ ខែតុលា៖

  • ប្រធានាធិបតី​តួកគី​លោក Tayyip Erdogan បាន​ត្រូវ​បណ្តាញ​ព័ត៌មាន​ដកស្រង់​សម្តី​មក​ចុះផ្សាយ​កាលពី​ថ្ងៃសុក្រថា លោក​មិនឃើញ​មាន​ឧបសគ្គ​ដើម្បី​បន្ត​កិច្ចព្រមព្រៀង​ដែល​សម្រប​សម្រួល​ដោយ​អង្គការ​សហប្រជាជាតិ​ដើម្បី​អនុញ្ញាត​ឱ្យ​នាំចេញ​គ្រាប់​ធញ្ញជាតិ​របស់​អ៊ុយក្រែន​តាម​សមុទ្រ​ខ្មៅ​នោះ​ទេ បន្ទាប់ពី​ការពិភាក្សា​ជាមួយ​សមភាគី​រុស្ស៊ី​និង​អ៊ុយក្រែន​របស់​លោក​មក។ នេះ​បើ​តាម​សេចក្តីរាយការណ៍​របស់​ទីភ្នាក់ងារ​ព័ត៌មាន Reuters។ បណ្តាញ​ព័ត៌មាន NTV បាន​ដកស្រង់​សម្តី​លោក Erdogan នៅពេល​ដែល​លោក​បាន​ប្រាប់​ពួក​អ្នក​យកព័ត៌មាន​នៅ​លើ​យន្តហោះ​របស់​លោក​ដែល​វិល​ត្រឡប់​មកពី​ប្រទេស​អាស៊ែបៃហ្សង់​វិញ​ថា៖ «មិន​មាន​ឧបសគ្គ​ដើម្បី​បន្ត​កិច្ចព្រមព្រៀង​នោះ​ទេ។ ខ្ញុំ​មើល ឃើញ​ការបន្ត​កិច្ចព្រមព្រៀង​នេះនៅ​ក្នុង​ការចរចា​ដែល​ខ្ញុំ​បាន​ធ្វើ​ជាមួយ​ប្រធានាធិបតី​រុស្ស៊ី​លោក Putin»។ បណ្តាញ​ព័ត៌មាន NTV ក៏​បាន​ដក​ស្រង់​សម្តី​លោក Erdogan មក​ចុះផ្សាយ​ដែរ​ថា គ្រាប់​ធញ្ញជាតិ​និង​ស្បៀងអាហារជាង​៨លាន​តោន​បាន​ត្រូវ​នាំចេញ​នៅ​ក្រោម​កិច្ចព្រមព្រៀង​ដែល​បាន​ចុះ​ហត្ថលេខា​កាលពី​កក្កដា។
  • ប្រធានាធិបតី​រុស្ស៊ី​លោក Vladimir Putin ​បាន​បើកចំហ​សម្រាប់​ការ​ចរចាជា​មួយ​ប្រទេស​អ៊ុយក្រែន​ ចាប់តាំង​ពី​ដំបូង​មក​ម្ល៉េះ​ ហើយ​រឿង​នេះ​មិន​មាន​ការ​ផ្លាស់​ប្តូរ​អ្វី​នោះ​ឡើយ។​ ​ នេះ​បើ​យោង​ទៅ​លើ​ការ​បញ្ជាក់​របស់​អ្នក​នាំពាក្យ​វិមាន​ក្រឹមឡាំង​លោក Dmitry Peskov ដែល​បានថ្លែង​ប្រាប់​ក្រុម​អ្នក​សារព័ត៌មាននៅ​ថ្ងៃ​សុក្រ​នេះ ដោយ​យោង​ទៅ​លើ​ការ​ថ្លែងរបស់​ ​ប្រធានាធិបតី​ប្រទេស​តួកគី​ លោក Recep Tayyip Erdogan។ នេះ​បើតាម​ការ​ចេញ​ផ្សាយ​របស់​ទី​ភ្នាក់ងារ​ព័ត៌មាន​ AP។ ​ប្រធានាធិបតី​តួកគី​ បាន​និយាយ​ថា​ លោកPutin ហាក់​ដូច​ជា​មាន​ការ​បន្ទន់​ឥរិយបទនិង​បើក​ចំហរ​ច្រើន​ជាង​មុន​ក្នុង​ការ​ចរចា។​ «យើង​នៅ​តែ​មាន​សង្ឃឹម​ជុំវិញ​រឿង​នេះ» ដោយ​លោកនិយាយ​យោង​ទៅដល់លទ្ធភាព​នៃ​ការ​ចរចាដើម្បី​បញ្ចប់​ជម្លោះ​នៅក្នុង​ប្រទេស​អ៊ុយក្រែន។​ ​ ​
  • រុស្ស៊ី​បាន​បញ្ជាក់​កាលពី​ថ្ងៃ​សុក្រ​ថា កងទ័ព​អ៊ុយក្រែន​បាន​សម្លាប់​មនុស្ស​យ៉ាងតិច​ណាស់៤នាក់ ហើយ​នឹង​ធ្វើ​ឱ្យ​របួស​ជាង​១៣នាក់​ទៀត​នៅ​ក្នុង​ការវាយ​ប្រហារ​ដោយ​កាំជ្រួច​មីស៊ីល​មួយ​ទៅ​លើ​ជន​ស៊ីវិល​ដែល​កំពុង​ជម្លៀស​ចេញ​ពី​តំបន់ Kherson ដែល​ត្រួតត្រា​ដោយ​រុស្ស៊ី។ មន្ត្រី​អ៊ុយក្រែន​ម្នាក់​បាន​ទទួល​ស្គាល់​ការវាយ​ប្រហារ​នេះ ក៏ប៉ុន្តែ បាន​និយាយ​ថា ការណ៍​នេះ​បាន​កើត​មាន​ឡើង​បន្ទាប់ពី​បម្រាម​គោលចរណ៍​ស៊ីវិល។ នេះ​បើ​តាម​សេចក្តីរាយការណ៍​របស់​ទីភ្នាក់ងារ​ព័ត៌មាន Reuters។ ពួក​អាជ្ញាធរ​ដែល​លើក​បន្តុប​ដោយ​រុស្ស៊ី​នៅ​ក្នុង​តំបន់​ភាគ​ខាង​ត្បូង​ប្រទេស​អ៊ុយក្រែន​ដែល​រដ្ឋាភិបាល​ក្រុង​មូស្គូ​បាន​ធ្វើ​ជា​ឧបសម្ព័ន្ធ​របស់​ខ្លួន​កាលពី​ខែ​មុន​កំពុង​ជម្លៀស​មនុស្ស​ប្រមាណ​ពី​៥ម៉ឺន​ទៅ​៦ម៉ឺន​នាក់ឆ្លង​កាត់ទន្លេ Dnipro មុនពេល​ការវាយ​បក​របស់​អ៊ុយក្រែន​ដែល​ត្រូវ​បាន​គេ​រំពឹងទុក។
  • ប្រធានាធិបតីអ៊ុយក្រែន​លោក Volodymyr Zelenskyy បានអំពាវនាវដល់​ប្រទេស​លោក​ខាង​លិច ឱ្យ​ព្រមាន​ដល់ប្រទេស​រុស្ស៊ី​កុំ​ឱ្យបំផ្ទុះ​ទំនប់​ទឹក​ដ៏​ធំ​មួយ​ ដែល​នឹងធ្វើ​ឱ្យ​លិចលង់នៅ​តំបន់​ជា​ច្រើន​នៅ​ភាគខាង​ត្បូង​អ៊ុយក្រែន​ ខណៈ​ដែលកងកម្លាំង​របស់​លោក​ កំពុង​ត្រៀម​ខ្លួន​ដើម្បី​រុញ​ច្រាន​កងកម្លាំង​រុស្ស៊ី​ឱ្យ​ចេញ​ពី​តំបន់ Kherson ដែល​ជា​ផ្នែក​មួយ​នៃការ​ប្រយុទ្ធ​ដ៏​សំខាន់​បំផុតនៅ​ក្នុង​សមរភូមិ​នោះ។ នេះ​បើតាម​សេចក្តី​រាយការណ៍​របស់​ទី​ភ្នាក់ងារ​ព័ត៌មាន ​Reuters។​ នៅ​ក្នុងការ​ថ្លែង​សុន្ទរកថាតាម​ទូរទស្សន៍​ លោក Zelenskyy បាន​និយាយ​ថា កងកម្លាំង​រុស្ស៊ីបាន​បង្កប់​គ្រឿង​ផ្ទុះ​ជា​ច្រើន​គ្រាប់​នៅក្នុង​ទំនប់​ទឹក Nova Kakhovka ​ដែល​ជាទំនប់​ស្តុក​ទឹកធំមួយ​ សម្រាប់​ការប្រើប្រាស់នៅ​ក្នុង​តំបន់​ភាគ​ខាងត្បូង​អ៊ុយក្រែន​ ហើយ​ប្រទេស​រុស្ស៊ី​មាន​គម្រោង​នឹង​បំផ្ទុះ​ទំនប់​ទឹក​នេះ ដើម្បី​បិទបាំងការដក​ថយ​របស់​ពួក​គេក្នុង​សមរភូមិ​ប្រយុទ្ធ។ ​
  • ប្រទេស​រុស្ស៊ីបាន​បញ្ជូន​កងទ័ព​ជា​ច្រើន​ពាន់នាក់​ដែល​ទើបជ្រើសរើស​ថ្មី ដើម្បី​ពង្រឹងការ​ការពាររបស់​ខ្លួន​នៅក្នុង​តំបន់ Kherson ភាគ​ខាង​ត្បូង​អ៊ុយក្រែន​ ដែលនៅ​ទីនោះ​កងកម្លាំង​អ៊ុយក្រែន​ កំពុងមាន​ប្រៀប​យ៉ាង​ខ្លាំងក្នុង​ការរុល​ទៅ​មុខ​ នៅក្នុង​ការ​ប្រយុទ្ធ​វាយបក​ដើម្បី​យក​ទឺក​ដី​ ដែល​កាន់​កាប់​ដោយ​កងកម្លាំង​រុស្ស៊ី​មកវិញ។​ នេះ​បើ​តាម​ការ​ផ្សាយ​របស់​វិទ្យុអឺរ៉ុប​សេរី។​ មាន​កងទ័ព​រុស្ស៊ី​ថ្មីៗ​រហូត​ដល់​ចំនួន​២ពាន់​នាក់​ បាន​មក​ដល់តំបន់ Kherson ដើម្បី​ជំនួសនិង​បំពេញ​កន្លែងកងទ័ព​ចាស់​ និង​ពង្រឹង​អង្គភាព​យោធានៅ​លើសមរភូមិជួរមុខ។​ នេះ​បើ​តាម​សេចក្តី​ថ្លែងការណ៍​មួយ​របស់​នាយសេនាធិការយោធា​អ៊ុយក្រែននៅ​ថ្ងៃ​សុក្រ​នេះ។
  • ជាង៣០ឆ្នាំ​បន្ទាប់ពី​ការដួលរលំវាំងនន​ដែក​មក ប្រទេសហ្វាំងឡង់​មាន​គម្រោងកសាង​របង​លួសបន្លា​នៅ​តាម​បណ្តោយ​ព្រំដែន​របស់​ខ្លួន​ជាមួយ​រុស្ស៊ី​ដែល​បែងចែក​តំបន់​ខាង​កើត​និង​ខាង​លិច​បន្ទាប់ពី​សង្គ្រាម​នៅ​ក្នុង​ប្រទេស​អ៊ុយក្រែន។ នេះ​បើ​តាម​សេចក្តីរាយការណ៍​របស់​ទីភ្នាក់ងារ​ព័ត៌មាន AFP។ សមាជិក​ដែល​គេ​រំពឹង​ថា​នឹង​ចូល​ក្នុង​អង្គការ​អូតង់​នេះ បាន​ប្រកាស​នៅ​សប្តាហ៍​នេះ​ពី​ផែនការ​ដែល​មាន​ការគាំទ្រ​យ៉ាង​ខ្លាំង​ពី​សភា​ដើម្បី​ជំនួស​របង​ឈើ​របស់​ខ្លួន​ដែល​ធ្វើ​ឡើង​ដើម្បី​បញ្ឈប់​សត្វពាហនៈ​កុំ​ឱ្យ​ឆ្លងកាត់​នៅ​តាម​បណ្តោយ​ព្រំដែន​ដែល​មាន​ប្រវែង​១ពាន់​៣រយ​គីឡូម៉ែត្រ​ដោយ​ដាក់​របង​លួស​បន្លា​ដើម្បី​កុំ​ឱ្យជនជាតិ​រុស្ស៊ី​និង​ជន​ចំណាកស្រុក​ចូលក្នុង​ប្រទេសហ្វាំងឡង់។ អ្នក​ស្រី​នាយក​មន្ត្រី Sanna Marin បាន​ប្រាប់​ពួក​អ្នក​យកព័ត៌មាន​នៅ​រដ្ឋធានី​ហែល​ស៊ិនគី​ថា «យើង​សង្ឃឹម​ថា ការងារ​នេះ​អាច​ចាប់ផ្តើម​បាន​ឆាប់រហ័ស​ទៅ​តាម​លទ្ធភាព​ដែល​អាច​ធ្វើ​បាន»។ ហ្វាំងឡង់​បាន​ឃើញ​ជនចំណាក​ស្រុក​រុស្ស៊ី​ដ៏​ច្រើន​ក្នុង​ខែ​កញ្ញា​បន្ទាប់ពី​ការបញ្ជា​របស់​ប្រធានាធិបតី​រុស្ស៊ី​លោក Vladimir Putin ឱ្យ​កេណ្ឌ​កងទ័ព​មុនពេល​ខ្លួន​រឹតត្បិត​ច្រកចេញ​ចូល​របស់​ខ្លួន។
  • ប្រធានាធិបតី​សហរដ្ឋ​អាមេរិក​លោក Joe Biden កាលពី​ថ្ងៃ​ព្រហស្បតិ៍​បាន​រិះគន់​គូប្រជែង​ខាង​គណបក្ស​សាធារណរដ្ឋ​ចំពោះ​ការស្នើ​ថា ថវិកា​របស់​សហរដ្ឋ​អាមេរិក​សម្រាប់​ប្រទេស​អ៊ុយក្រែន​អាច​ត្រូវ​កាត់បន្ថយ​បន្ទាប់ពី​ការបោះឆ្នោត​សភា​ពាក់​កណ្តាល​អាណត្តិ​នៅ​ខែ​ក្រោយ​នេះ។ នេះ​បើ​តាម​សេចក្តីរាយការណ៍​របស់​ទីភ្នាក់ងារ​ព័ត៌មាន AFP។ លោក​ប្រធានាធិបតី Biden បាន​និយាយ​នៅ​ក្នុង​យុទ្ធនាការ​ឃោសនា​បោះឆ្នោត​មួយ​នៅ​ក្នុង​រដ្ឋ Pennsylvania ថា៖ «ពួកគេ​បាន​និយាយ​ថា ប្រសិនបើ​ពួកគេ​ឈ្នះ ពួកគេ​មិន​ទំនង​ផ្តល់​ថវិកា បន្ត​ផ្តល់​ថវិកា​ដល់​អ៊ុយក្រែន​ទេ»។ លោក​ប្រធានាធិបតី​និយាយ​ទៀត​ថា «ជន​ទាំង​នោះ​មិន​យល់។ បញ្ហា​នោះ​ធំ​ជាង​អ៊ុយក្រែន​ទៅ​ទៀត។ វា​ជា​បញ្ហា​អឺរ៉ុប​ខាង​កើត។ វា​ជា​បញ្ហា​អង្គការ​អូតង់។ វា​ប្រាកដ​ជា​មាន​ផលវិបាក​ធ្ងន់ធ្ងរណាស់»។ លោក Biden និយាយ​ទៀត​ថា៖ «ពួកគេ​មិន​យល់​ពី​គោលនយោបាយ​ការបរទេស​អាមេរិក»។ មន្ត្រី​ជាន់​ខ្ពស់​ខាង​គណបក្ស​សាធារណរដ្ឋ​លោក Kevin McCarthy បាន​និយាយ​កាលពី​ថ្ងៃ​អង្គារ​ថា ប្រសិនបើ​គណបក្ស​របស់​លោក​ធ្វើ​ឱ្យ​ជឿនលឿន​ខ្លាំង​នៅ​ក្នុង​ការបោះឆ្នោត​ពាក់​កណ្តាល​អាណត្តិ​ដូច​ការរំពឹង​ទុក ខ្លួន​នឹង​មិន​ផ្តល់​ថវិកា​ដល់​អ៊ុយក្រែន​ដែល​ហែកហួរ​ដោយ​សង្គ្រាម​នោះ​ទេ។
  • ប្រទេស​តួកគី​បាន​និយាយ​កាលពី​ថ្ងៃ​សុក្រ​ថា ការលុបចោល​ការដាក់​ទណ្ឌកម្ម​របស់​ប្រទេស​លោក​ខាង​លិច​លើ​ប្រទេស​នានា​រួមទាំង​ប្រទេស​អ៊ីរ៉ង់​និង​វ៉េណេស៊ុយអេឡានឹងបន្ធូរ​បន្ថយវិបត្តិ​ថាមពល​សាកលលោក​ដែល​បណ្តាល​មក​ពី​ការឈ្លានពាន​របស់​រុស្ស៊ី​លើ​អ៊ុយក្រែន។ នេះ​បើ​តាម​សេចក្តីរាយការណ៍​របស់​ទីភ្នាក់ងារ​ព័ត៌មាន AFP។ វ៉េណេស៊ុយអេឡា​បាន​រង​ការដាក់​ទណ្ឌកម្ម​ការលក់​ប្រេង​ពី​សហរដ្ឋ​អាមេរិក​ចាប់តាំង​ពី​ឆ្នាំ២០១៩​មក ​ហើយ​អ៊ីរ៉ង់​បាន​ស្ថិត​ក្រោម​ការដាក់​ទណ្ឌកម្ម​របស់​សហរដ្ឋ​អាមេរិក​នៅពេល​ដែល​ការចរចា​រវាង​រដ្ឋាភិបាល​ក្រុង​តេហេរ៉ង់​និង​រដ្ឋាភិបាល​ក្រុង​វ៉ាស៊ីនតោន​អំពី​ការធ្វើ​ឱ្យ​មាន​កិច្ចព្រមព្រៀង​នុយក្លេអ៊ែរ​ឆ្នាំ២០១៥​ ឡើង​វិញ​បាន​ជាប់គាំង។
  • នៅ​ថ្ងៃ​សុក្រ​នេះ​ ប្រទេស​អ៊ីរ៉ង់​បានជូន​ដំណឹង​ដល់​ពលរដ្ឋ​របស់​ខ្លួន​មិន​ឱ្យទៅ​ប្រទេស​អ៊ុយក្រែន​ និង​បានប្រាប់​ដល់​ពលរដ្ឋ​អ៊ីរ៉ង់​ដែលកំពុង​ស្ថិត​នៅ​ក្នុងប្រទេស​អ៊ុយក្រែន​ ឱ្យ​ចាកចេញ​ពី​ប្រទេស​នេះ។ នេះ​បើ​តាមការ​ផ្សព្វផ្សាយ​របស់ទី​ភ្នាក់ងារ​ព័ត៌មាន​ផ្លូវ​ការ​ប្រទេស​អ៊ីរ៉ង់។​ ការ​ប្រកាស​នេះ​ ត្រូវ​បានធ្វើ​ឡើង​មួយ​ថ្ងៃ​បន្ទាប់​ពី​សហរដ្ឋ​អាមេរិក​ បាន​ចោទ​ប្រកាន់អ៊ីរ៉ង់​ថា​បាន​ជួយ​ដល់​ប្រទេស​រុស្ស៊ី​ ក្នុង​ការ​ប្រើប្រាស់​យន្តហោះ​ដ្រូននៅ​ក្នុង​ប្រទេស​អ៊ុយក្រែន​នោះ។​ នេះ​បើ​តាម​សេចក្តី​រាយការណ៍​របស់​ទី​ភ្នាក់ងារ​ព័ត៌មាន​ Reuters។​ សេចក្តី​ជូន​ដំណឹង​របស់​ក្រសួង​ការបរទេស​អ៊ីរ៉ង់​ មិន​បាននិយាយ​យោង​ទៅ​លើ​ការ​ចោទ​ប្រកាន់​របស់​សហរដ្ឋអាមេរិកនោះ​ឡើយ។ សេចក្តី​ជូន​ដំណឹង​នេះ​ បាន​ផ្តល់​លេខ​ទូរស័ព្ទ​របស់​ស្ថានទូត​អ៊ីរ៉ង់​ក្នុង​រដ្ឋធានី​កៀវ​ ដើម្បី​ឱ្យ​ពលរដ្ឋ​របស់​ខ្លួន​ទាក់ទង​ដើម្បី​សាកសួរ​ព័ត៌មាន។ ​
  • ប្រធានាធិបតី​ប្រទេស​តួកគី​លោក Tayyip Erdogan ត្រូវ​បាន​សារព័ត៌មានស្រង់សម្តី​មក​ចុះ​ផ្សាយនៅ​ថ្ងៃ​សុក្រ​នេះ​ថា​ លោក​នឹង​ជួបជា​មួយ​នាយករដ្ឋមន្ត្រី​ប្រទេស​ស៊ុយអែត​លោក​ Ulf Kristersson ដើម្បី​ពិភាក្សា​គ្នារឿង​ការ​សុំ​ចូល​ជា​សមាជិក​របស់​អង្គការអូតង់​របស់​ប្រទេសនេះ​ ក៏​ដូចជា​ការ​ពិភាក្សា​ទៅ​លើ​ការ​ធ្វើ​បត្យាប័ន​មនុស្ស​មួយ​ចំនួន​ ដែល​រដ្ឋាភិបាល​ក្រុង​អង់ការ៉ា​ ​គិត​ថា​ជាភេរវជននោះ។​ នេះបើតាម​ទី​ភ្នាក់ងារ​ព័ត៌មាន ​Reuters។​ លោក Erdogan ក៏​បាន​និយាយផង​ដែរ​ថា​លោក​ Kristersson​ ដែល​ទើប​តែ​ត្រូវ​បាន​តែងតាំង​ក្នុង​ពេល​ថ្មីៗ​នេះ ជា​នាយករដ្ឋមន្ត្រី​នៃ​ប្រទេសស៊ុយអែត​នោះ​ បាន​តាំងចិត្តថា​នឹង​ប្រយុទ្ធប្រឆាំង​នឹង​អំពើ​ភេរវកម្ម។​ នេះ​បើតាម​ការ​ផ្សាយ​របស់​ទូរទស្សន៍ NTV របស់​ប្រទេស​តួកគី។​

ព័ត៌មាន​​​​​​ផ្សេង​​​ទៀត

XS
SM
MD
LG