២២:៣៩
២០.១០.២០២២
ថ្ងៃព្រហស្បតិ៍ ទី ២០ ខែតុលា៖
- នៅពេលដែលទាហានអ៊ុយក្រែនរុលទៅមុខនៅលើសមរភូមិក្នុងប្រទេសខ្លួននោះ ពួកគេកំពុងចាប់បានរថយន្តយោធា និងអាវុធដែលត្រូវបានបោះបង់ចោលដោយទាហានរុស្ស៊ីរត់គេចខ្លួន ហើយទាហានអ៊ុយក្រែនកំពុងប្រើឧបករណ៍យោធាខ្លះនៃឧបករណ៍ទាំងនោះប្រឆាំងនឹងទាហានឈ្លានពាន។ នេះបើតាមក្រុមអ្នកវិភាគប្រាប់ទីភ្នាក់ងារព័ត៌មាន AFP។ រុស្ស៊ី និងប្រទេសជិតខាងភាគច្រើនប្រើឧបករណ៍ស្រដៀងគ្នាក្នុងសម័យសហភាពសូវៀត ដូច្នេះទាហានអ៊ុយក្រែនជារឿយៗមិនចាំបាច់ហ្វឹកហាត់ប្រើឧបករណ៍យោធាទាំងនោះទេ។ រុស្ស៊ីបានរឹបអូសយកទឹកដីអ៊ុយក្រែនជាច្រើនផ្នែកចាប់តាំងពីការឈ្លានពានតាំងពីចុងខែកុម្ភៈមក។ ក៏ប៉ុន្តែ កងកម្លាំងរបស់រដ្ឋាភិបាលក្រុងកៀវបានទប់ទល់មិនឱ្យរុលទៅមុខខ្លះៗ ហើយចាប់តាំងពីខែសីហាមកកងកម្លាំងអ៊ុយក្រែនបានដណ្តើមកាន់កាប់ទឹកដីដ៏ធំមកវិញនៅភាគឦសាន និងខាងត្បូងប្រទេស។ អ្នកវិភាគ ដែលសុំមិនបញ្ចេញឈ្មោះ ធ្វើការនៅក្រុមហ៊ុនរបស់ចក្រភពអង់គ្លេសឈ្មោះ Janes ដែលធ្វើការផ្នែកវិភាគការស៊ើបការណ៍សម្ងាត់ បាននិយាយថា៖ «អ៊ុយក្រែនបានរឹបអូសយកឧបករណ៍នោះយ៉ាងច្រើន»។ គេពិបាកដឹងពិតប្រាកដណាស់ថា តើឧបករណ៍ចំនួនប៉ុន្មានត្រូវបានរឹបអូសយកនោះ ក៏ប៉ុន្តែក្រុមហ៊ុន Janes បានប៉ាន់ស្មានថា យ៉ាងហោចណាស់មានរថយន្តចំនួន២០០គ្រឿង រថក្រោះ៤៥គ្រឿង រថយន្តទាហានថ្មើរជើងចំនួន៧០គ្រឿង និងកាំភ្លើងធំ៣០គ្រឿងដែរ។
- ប្រធានាធិបតីរុស្ស៊ី លោក Vladimir Putin កាលពីថ្ងៃពុធ បានបញ្ជាឱ្យពលរដ្ឋរុស្ស៊ីទាំងអស់គាំទ្រកិច្ចប្រឹងប្រែងធ្វើសង្គ្រាមនៅក្នុងប្រទេសអ៊ុយក្រែន នៅពេលដែលរដ្ឋបាលនៃតំបន់ Kherson ដែលតែងតាំងដោយរុស្ស៊ី បានប្រុងប្រៀបជម្លៀសមនុស្សនៅតំបន់តែមួយគត់ដែលរដ្ឋាភិបាលក្រុងមូស្គូបានកាន់កាប់អំឡុងការឈ្លានពានរបស់ខ្លួន។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។ រូបភាពរបស់មនុស្សប្រើប្រាស់ទូកជាច្រើនដើម្បីរត់ចេញពីទីក្រុងភាគខាងត្បូងនោះត្រូវបានផ្សព្វផ្សាយតាមទូរទស្សន៍រដ្ឋរុស្ស៊ី ដែលបានបង្ហាញពីមនុស្សយ៉ាងច្រើនរត់ចេញពីឆ្នេរខាងស្តាំទៅឆ្នេរខាងឆ្វេងនៃទន្លេ Dnipro ខណៈមានការព្យាយាមជម្លៀសជនស៊ីវិល មុនពេលតំបន់នោះក្លាយជាសមរភូមិ។ ប្រធានតំបន់ Kherson ដែលត្រូវបានលើកបន្តុកដោយរុស្ស៊ី បាននិយាយថា មនុស្សប្រហែលពី៥ម៉ឺនទៅ៦ម៉ឺននាក់នឹងត្រូវចាកចេញពីទីកន្លែងនេះក្នុងរយៈពេល៦ថ្ងៃ។ Kherson ជាតំបន់មួយនៃតំបន់៤របស់អ៊ុយក្រែនដែលត្រូវបានទាមទារជាឯកតោភាគីដោយរដ្ឋាភិបាលក្រុងមូស្គូ និងជាកន្លែងដែលលោក Putin បានប្រកាសច្បាប់អាជ្ញាសឹកកាលពីថ្ងៃពុធ។
- កងទ័ពអាកាសរុស្ស៊ីបានធ្វើផែនការហោះយាមល្បាតតាមព្រំដែនប្រទេសបេឡារុសដែលជាសម្ពន្ធមិត្តរបស់ខ្លួននៅថ្ងៃព្រហស្បតិ៍ នៅពេលដែលមានការព្រួយបារម្ភថា ប្រទេសបេឡារុសអាចមានតួនាទីកាន់តែសកម្មនៅក្នុងសង្គ្រាមនៅអ៊ុយក្រែន។ នេះបើតាមការបញ្ជាក់របស់រដ្ឋាភិបាលក្រុង Minsk រាយការណ៍ដោយទីភ្នាក់ងារព័ត៌មាន Reuters។ រុស្ស៊ីបានដាក់ពង្រាយកងទ័ពចំនួន៩ពាន់នាក់ និងឧបករណ៍យោធារាប់រយនៅប្រទេសបេឡារុស ដែលនៅជិតខាង បន្ទាប់ពីលោកប្រធានាធិបតី Alexander Lukashenko បាននិយាយកាលពីសប្តាហ៍មុនថា បេឡារុសបានរងការគំរាមកំហែងពីអ៊ុយក្រែន។
- ក្រសួងការពារជាតិរុស្ស៊ីបានបញ្ជាក់កាលពីថ្ងៃព្រហស្បតិ៍ថា កងទ័ពរបស់ខ្លួនបានបន្តវាយប្រហារលើទីតាំងយោធា និងថាមពលនៅក្នុងប្រទេសអ៊ុយក្រែន រយៈពេល២៤ម៉ោងចុងក្រោយនេះ។ ក្រសួងនេះក៏បាននិយាយដែរថា កងទ័ពរុស្ស៊ីបានវាយបកទៅលើកងទ័ពអ៊ុយក្រែននៅក្នុងតំបន់ Kherson ភាគខាងត្បូង ដែលនៅទីនោះពួកមន្ត្រីលើកបន្តុកដោយរុស្ស៊ីកំពុងជម្លៀសអ្នកស្រុករាប់ពាន់នាក់។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។
- ប្រទេសឥណ្ឌាបានចេញសេចក្តីណែនាំកាលពីថ្ងៃពុធ សុំឱ្យពលរដ្ឋចៀសវាងការធ្វើដំណើរទៅកាន់ប្រទេសអ៊ុយក្រែន ដោយលើកហេតុផលថា ស្ថានភាពសន្តិសុខនៅក្នុងប្រទេសនោះកាន់តែយ៉ាប់យ៉ឺន។ ស្ថានទូតឥណ្ឌានៅក្នុងប្រទេសអ៊ុយក្រែនបានបញ្ជាក់នៅក្នុងសេចក្តីថ្លែងការណ៍ដែលបានចេញផ្សាយតាម Twitter ហើយត្រូវបានរាយការណ៍ដោយទីភ្នាក់ងារព័ត៌មាន Reuters ថា «ពលរដ្ឋឥណ្ឌា រួមទាំងនិស្សិតដែលបច្ចុប្បន្ននេះស្ថិតនៅក្នុងប្រទេសអ៊ុយក្រែន ត្រូវចាកចេញឱ្យបានឆាប់រហ័សតាមមធ្យោបាយដែលអាចធ្វើបាន»៕
២២:១៦
១៩.១០.២០២២
ថ្ងៃពុធ ទី ១៩ ខែតុលា៖
- ពួកគណបក្សសាធារណរដ្ឋបាននិយាយកាលពីថ្ងៃអង្គារថា ពួកគេនឹងមិនផ្តល់ប្រាក់ដល់ប្រទេសអ៊ុយក្រែនដែលហែកហួរដោយសង្គ្រាមទៀតទេ ប្រសិនបើ ពួកគេធ្វើឱ្យជឿនលឿនដូចការរំពឹងទុកដើម្បីត្រួតត្រារដ្ឋសភានៅក្នុងការបោះឆ្នោតពាក់កណ្តាលអាណត្តិ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។ ការព្រមានមកពីលោក Kevin McCarthyមេដឹកនាំសំឡេងភាគតិចរបស់រដ្ឋសភាជាសញ្ញាផ្លូវការលើកដំបូងថា រដ្ឋាភិបាលក្រុងកៀវអាចប្រឈមនឹងការប្រយុទ្ធដ៏ស្វិតស្វាញដើម្បីទទួលបានថវិកានៅពេលដែលខ្លួនការពារការឈ្លានពានរបស់រុស្ស៊ីដែលបានទទួលការគាំទ្ររបស់គណបក្សទាំង២ចាប់ផ្តើមធ្លាក់ចុះនៅក្នុងសហរដ្ឋអាមេរិក។ លោក McCarthy សង្ឃឹមថានឹងក្លាយជាប្រធានរដ្ឋសភាដែលជាតួនាទីជាន់ខ្ពស់លំដាប់ទី៣នៅក្នុងនយោបាយសហរដ្ឋអាមេរិកបន្ទាប់ពីប្រធានាធិបតី និងអនុប្រធានាធិបតី ប្រសិនបើពួកសាធារណរដ្ឋកាន់កាប់រដ្ឋសភានៅឆ្នាំក្រោយ។ លោកបាននិយាយទៀតថា លោករំពឹងថា ពួកអ្នកបោះឆ្នោតនឹងដាក់ទណ្ឌកម្មពួកគណបក្សប្រជាធិបតេយ្យនៅក្នុងការបោះឆ្នោតខែវិច្ឆិកាចំពោះការធ្វេសប្រហែសបញ្ហាអាទិភាពនៅក្នុងប្រទេសដូចជាវិបត្តិអន្តោប្រវេសន៍ដែលកំពុងរីកកាន់តែធំឡើងនៅឯព្រំដែនភាគខាងត្បូង។
- សហភាពអឺរ៉ុបកំពុងធ្វើការឆ្ពោះទៅកាន់ការដាក់ទណ្ឌកម្មថ្មីទៀតលើប្រទេសអ៊ីរ៉ង់បន្ទាប់ពីប្រមូលបាន«ភស្តតាងគ្រប់គ្រាន់»ថា អ៊ីរ៉ង់កំពុងផ្គត់ផ្គង់ដ្រូនដ៏ប្រល័យទៅឱ្យរុស្ស៊ីដើម្បីប្រើប្រាស់នៅក្នុងប្រទេសអ៊ុយក្រែន។ នេះបើតាមការបញ្ជាក់របស់អ្នកនាំពាក្យសហភាពអឺរ៉ុបកាលពីថ្ងៃពុធហើយត្រូវបានរាយការណ៍ដោយទីភ្នាក់ងារព័ត៌មាន AFP។ លោកស្រី Nabila Massraliអ្នកនាំពាក្យរបស់ប្រធានគោលនយោបាយការបរទេសសហភាពអឺរ៉ុបលោកJosep Borrellបាននិយាយថា៖ «ឥឡូវនេះ យើងបានប្រមូលភស្តុតាងផ្ទាល់របស់យើងគ្រប់គ្រាន់ដែលការងារនេះកំពុងបន្តធ្វើនៅក្នុងក្រុមប្រឹក្សាអឺរ៉ុបដើម្បីធ្វើការឆ្លើយតបឱ្យច្បាស់និងខ្លាំង»។ ពួកអ្នកការទូតសហភាពអឺរ៉ុបបានប្រាប់ទីភ្នាក់ងារព័ត៌មានAFPថា មានការងារដែលកំពុងធ្វើនៅថ្ងៃពុធដើម្បីធ្វើបញ្ជីឈ្មោះរបស់បុគ្គលនិងអង្គភាពអ៊ីរ៉ង់ដែលមានជាប់ទាក់ទិននឹងដ្រូនដែលនឹងត្រូវបន្ថែមទៅក្នុងបញ្ជីខ្មៅដាក់ទណ្ឌកម្មរបស់សហភាពអឺរ៉ុប។ អ្នកការទូតម្នាក់បាននិយាយថា គេរំពឹងថា បញ្ជីឈ្មោះនោះនឹងត្រូវសម្រេចផ្តាច់ព្រ័ត្រនៅក្នុងជំនួបរបស់មេដឹកនាំអឺរ៉ុបដែលចាប់ផ្តើមនៅយប់ថ្ងៃព្រហស្បតិ៍។ សហភាពអឺរ៉ុបកាលពីថ្ងៃចន្ទបានដាក់ទណ្ឌកម្មជុំចុងក្រោយរបស់ខ្លួនលើអ៊ីរ៉ង់អំពីការ ស្លាប់របស់នាង Mahsa Amini អាយុ២២ឆ្នាំដែលត្រូវបានចាប់ខ្លួនដោយប៉ូលិសសីលធម៌ ហើយនឹងការបង្ក្រាបលើការតវ៉ាប្រឆាំងរបស់របបនេះដែលបានកើតមានឡើង។
- ប្រទេសរុស្ស៊ីទំនងនឹងត្រូវការពេលពី២ទៅ៤ឆ្នាំដើម្បីស្ថាបនាសមត្ថភាពយោធារបស់ខ្លួនឡើងវិញឱ្យខ្លាំងក្លាដូចមុនសង្គ្រាមអ៊ុយក្រែន។ នេះបើតាមការបញ្ជាក់របស់រដ្ឋមន្ត្រីការពារជាតិអេស្តូនីកាលពីថ្ងៃអង្គារដោយលោកបានជំរុញឱ្យបន្តដាក់សម្ពាធលើរដ្ឋាភិបាលក្រុងមូស្គូហើយត្រូវបានរាយការណ៍ដោយទីភ្នាក់ងារព័ត៌មាន AFP។ នៅក្នុងដំណើរទស្សនកិច្ចទៅកាន់រដ្ឋធានីវ៉ាស៊ីនតោន លោករដ្ឋមន្ត្រីការពារជាតិ Hanno Pevkurបានទស្សន៍ទាយពីសង្គ្រាមរយៈពេលយូរ ហើយបានជំរុញឱ្យប្រទេសលោកខាងលិចរួបរួមគ្នាជាមួយពលរដ្ឋអ៊ុយក្រែនរហូតទាល់តែពួកគេទទួលបានជ័យជម្នះសម្រាប់«ពិភពលោកសេរី»។
- នាយកទីភ្នាក់ងាររដ្ឋនុយក្លេអ៊ែររបស់អ៊ុយក្រែន Energoatomបាននិយាយកាលពីថ្ងៃពុធថា បុគ្គលិកប្រហែល៥០នាក់នៃរោងចក្រថាមពលនុយក្លេអ៊ែរ Zaporizhzhiaដែលត្រួតត្រាដោយរដ្ឋាភិបាលរុស្ស៊ីនៅក្នុងតំបន់ភាគខាងត្បូងប្រទេសអ៊ុយក្រែនបានត្រូវឃុំខ្លួនដោយពួករុស្ស៊ី។ លោកPetro Kotin បានប្រាប់ទីភ្នាក់ងារព័ត៌មាន AFPថា៖ «មនុស្សជាង១៥០នាក់មកពីរោងចក្រនោះបានត្រូវចាប់ខ្លួន»ចាប់តាំងពីការចាប់ផ្តើមនៃការឈ្លានពានរបស់រុស្ស៊ីកាលពីចុងខែកុម្ភៈមក។ លោកបាននិយាយទៀតថា បុគ្គលិកខ្លះត្រូវបានគេដោះលែង ក៏ប៉ុន្តែ មានបុគ្គលិកខ្លះទៀតនៅគេមិនទាន់ដឹងអំពីជោគវាសនារបស់ពួកគេទេ។ លោកបាននិយាយទៀតថា៖ «មនុស្សប្រហែល៥០នាក់នៅស្ថិតក្នុងការឃុំខ្លួននៅឡើយ។ ពួកគេជាបុគ្គលិករោងចក្រ»។
- ប្រទេសអ៊ីស្រាអែលនឹងមិនបញ្ជូនអាវុធទៅឱ្យអ៊ុយក្រែនទេ។ នេះបើតាមការបញ្ជាក់របស់រដ្ឋមន្ត្រីការពារជាតិអ៊ីស្រាអែលលោកBenny Gantz កាលពីថ្ងៃពុធ ក្នុងរយៈពេល២ថ្ងៃបន្ទាប់មក ក្រោយពីរុស្ស៊ីបានព្រមានថា ចំណាត់ការរបស់អ៊ីស្រាអែលដើម្បីធ្វើឱ្យប្រសើឡើងនូវកងកម្លាំងរបស់រដ្ឋាភិបាលក្រុងកៀវនឹងធ្វើឱ្យប៉ះពាល់យ៉ាងខ្លាំងដល់ទំនាក់ទំនងរវាងប្រទេសទាំង២។ នេះបើតាមសេចក្តីរាយការណ៍របស់ទីភ្នាក់ងារព័ត៌មានAFP។ បើតាមសេចក្តីថ្លែងការណ៍ពីការិយាល័យរបស់លោក លោកGantz បានប្រាប់ពួកឯកអគ្គរដ្ឋទូតសហភាពអឺរ៉ុបថា«គោលនយោបាយរបស់យើងជាមួយអ៊ុយក្រែនមិនមានការផ្លាស់ប្តូរទេ។ យើងនឹងបន្តគាំទ្រនិងរួបរួមជាមួយប្រទេសលោកខាងលិច ហើយយើងនឹងមិនផ្តល់សព្វាវុធនោះទេ។
២២:៤៥
១៨.១០.២០២២
ថ្ងៃអង្គារ ទី ១៨ ខែតុលា៖
- ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅថ្ងៃអង្គារនេះថា ការវាយប្រហារតាមអាកាសរបស់រុស្ស៊ីក្នុងរយៈពេលមួយសប្តាហ៍កន្លងទៅនេះ បានបំផ្លាញទីតាំងថាមពលរបស់អ៊ុយក្រែនអស់ប្រមាណ៣០ភាគរយ។ លោកបាននិយាយដូចនេះតែប៉ុន្មានម៉ោងប៉ុណ្ណោះបន្ទាប់ពីមានការវាយប្រហារថ្មីមួយទៀត ដែលបានកាត់ផ្តាច់ចរន្តអគ្គិសនីនៅតាមទីក្រុងនានាទូទាំងប្រទេសអ៊ុយក្រែននោះ។ រុស្ស៊ីបានវាយប្រហារចំទីតាំងថាមពលក្នុងរដ្ឋធានីកៀវ និងតំបន់នានាក្នុងទីក្រុងនៅទូទាំងប្រទេសអ៊ុយក្រែន ដែលបណ្តាលឱ្យមានការដាច់ចរន្តភ្លើង និងបង្អាក់ដល់ប្រព័ន្ធផ្គត់ផ្គង់ទឹកផងដែរ។ ការវាយប្រហារនេះកើតឡើងតែក្នុងរយៈពេលមួយថ្ងៃប៉ុណ្ណោះ បន្ទាប់ពីរដ្ឋធានីកៀវត្រូវទទួលរងការវាយប្រហារជាខ្លាំងដោយយន្តហោះដ្រូនអត្តឃាតនោះ។ ការវាយប្រហារកាលពីព្រលឹមថ្ងៃអង្គារនេះ បានចំទៅលើរដ្ឋធានីកៀវ និងទីក្រុង Kharkiv នៅភាគខាងកើត ហើយទីក្រុង Mykolaiv នៅភាគខាងត្បូង និងតំបន់ Dnipro និងតំបន់ Zhytomyr ភាគកណ្តាល។ ក្រុមមន្ត្រីអ៊ុយក្រែននិយាយថា មន្ទីរពេទ្យនានាដាច់ភ្លើងនិងបានប្រើប្រាស់ម៉ាស៊ីនភ្លើងជំនួសវិញ។ ប្រធានាធិបតីអ៊ុយក្រែនលោក Zelenskyy បានពណ៌នាការវាយប្រហាររបស់រុស្ស៊ីទៅលើគោលដៅហេដ្ឋារចនាសម្ព័ន្ធថាមពលជាច្រើនលើកច្រើនសារនេះ ថាជាសកម្មភាពមួយនៃ «ការវាយប្រហារភេរវកម្មរបស់រុស្ស៊ី»។ នេះបើតាមសេចក្តីរាយការណ៍របស់ទីភ្នាក់ងារព័ត៌មានAFP។
- វិមានក្រឹមឡាំងនៅថ្ងៃអង្គារនេះបានបដិសេធថា កងកម្លាំងរុស្ស៊ីមិនបានប្រើប្រាស់យន្តហោះដ្រូនដែលគ្មានមនុស្សបើក ដែលផលិតក្នុងប្រទេសអ៊ីរ៉ង់នោះឡើយ។ នេះបើតាមទីភ្នាក់ងារព័ត៌មាន Reuters។ មេដឹកនាំអ៊ុយក្រែនបានចោទប្រកាន់ប្រទេសរុស្ស៊ីថា បានប្រើប្រាស់យន្តហោះដ្រូនប្រភេទShahed-136 "kamikaze" ដែលផលិតក្នុងប្រទេសអ៊ីរ៉ង់ នៅក្នុងការវាយប្រហាររបស់ខ្លួនទៅលើរដ្ឋធានីកៀវនៃប្រទេសអ៊ុយក្រែន។ យន្តហោះដ្រូនប្រភេទនេះនឹងបំផ្ទុះខ្លួនវានៅពេលប៉ះនឹងឧបករណ៍អ្វីមួយ។ នៅពេលសួរថា តើប្រទេសរុស្ស៊ីមានបានប្រើប្រាស់យន្តហោះដ្រូនដែរឬទេនៅក្នុងប្រតិបត្តិការយោធារបស់ខ្លួនក្នុងប្រទេសអ៊ុយក្រែននោះ អ្នកនាំពាក្យវិមានក្រឹមឡាំងលោក Dmitry Peskov បាននិយាយថា វិមានក្រឹមឡាំងមិនមានព័ត៌មាននៃការប្រើប្រាស់ឧបករណ៍យោធារបស់កងទ័ពរុស្ស៊ីនោះឡើយ។
- ក្រុមហ៊ុនផលិតរថយន្ត Hyundai របស់ប្រទេសកូរ៉េខាងត្បូង កំពុងពិចារណាសម្រេចចិត្តលើប្រតិបត្តិការរបស់ខ្លួននៅក្នុងប្រទេសរុស្ស៊ី ដោយក្នុងនោះក៏រួមមានទាំងការអាចលក់រោងចក្ររបស់ខ្លួននៅទីនោះផងដែរ។ នេះបើយោងទៅលើបណ្តាញព័ត៌មានក្នុងស្រុក ហើយដែលត្រូវបានចេញផ្សាយបន្ដដោយទីភ្នាក់ងារព័ត៌មាន Reuters។ ក្រុមហ៊ុនផលិតរថយន្ត Hyundai កាលពីពេលថ្មីៗនេះ បានដាក់របាយការណ៍ទៅកាន់ថ្នាក់ដឹកនាំរបស់ក្រុមហ៊ុន ដោយវិភាគពីស្ថានភាពនិងការរំពឹងទុករបស់ខ្លួនក្នុងពេលអនាគតក្នុងប្រទេសរុស្ស៊ី។ នេះបើតាមកាសែត Dong-a Ilbo របស់កូរ៉េខាងត្បូង ដែលបានស្រង់ប្រភពឧស្សាហកម្មរថយន្តមួយ ដែលមិនបញ្ចេញឈ្មោះ។ រោងចក្រជាច្រើននៅក្នុងប្រទេសរុស្ស៊ី បានផ្អាកដំណើរការផលិតរបស់ខ្លួន និងផ្អាកបុគ្គលិកធ្វើការជាបណ្តោះអាសន្ន ដោយសារតែខ្វះគ្រឿងឧបករណ៍ដែលមានបច្ចេកទេសខ្ពស់ ដោយសារតែការដាក់ទណ្ឌកម្ម និងការចាកចេញនៃសហគ្រាសរោងចក្រប្រទេសលោកខាងលិចជាច្រើន ចាប់តាំងពីរុស្ស៊ីចូលឈ្លានពានប្រទេសអ៊ុយក្រែន កាលពីថ្ងៃទី២៤ ខែកុម្ភៈមក។
- ក្រសួងពាណិជ្ជកម្មសហរដ្ឋអាមេរិកបានឱ្យដឹងថា ខ្លួនបានចេញបទបញ្ជាមួយ ដោយបដិសេធសិទ្ធិនាំចេញរបស់ក្រុមហ៊ុនអាកាសចរណ៍រុស្ស៊ី Ural Airlines ដោយលើកឡើងពីអ្វីដែលជាការរំលោភបំពានទៅនឹងការនាំចេញដែលកំពុងកើតមានឡើង។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។ បទបញ្ជានេះ ក៏បានបញ្ឈប់នូវសិទ្ធិរបស់ក្រុមហ៊ុនអាកាសចរណ៍រុស្ស៊ីនេះមិនឱ្យចូលរួមនៅក្នុងប្រតិបត្តិការជំនួញ ដែលស្ថិតនៅក្រោមបទបញ្ញត្តិនៃការនាំចេញរបស់សហរដ្ឋអាមេរិកផងដែរ។ រដ្ឋបាលរបស់ប្រធានាធិបតីសហរដ្ឋអាមេរិក លោក Joe Biden បានបង្កើនការបង្រ្កាបទៅលើក្រុមហ៊ុនអាកាសចរណ៍រុស្ស៊ី បន្ទាប់ពីប្រទេសនេះចូលឈ្លានពានប្រទេសអ៊ុយក្រែនមក ដោយបដិសេធមិនលក់គ្រឿងបន្លាស់យន្តហោះ ការចុះចតចាក់សាំង និងសេវាកម្មផ្សេងៗមួយចំនួនទៀត។
- ប៉ូលិសក្នុងប្រទេសន័រវែសបាននិយាយកាលពីថ្ងៃចន្ទម្សិលមិញថា ខ្លួនបានចាប់ខ្លួនជនសង្ស័យជនជាតិរុស្ស៊ីចំនួន៤នាក់ ពីបទរំលោភបំពានទៅលើបម្រាមការថតរូប ខណៈពេលដែលប្រទេសនេះកំពុងមានការបារម្ភពីការធ្វើវិចេ្ឆទកម្មនៅទីតាំងហេដ្ឋារចនាសម្ព័ន្ធសំខាន់ៗមួយចំនួនរបស់ខ្លួននោះ។ នេះបើតាមការចេញផ្សាយរបស់ទីភ្នាក់ងារព័ត៌មានAFP ។ ប្រទេសន័រវែស កំពុងស្ថិតក្នុងភាពប្រុងជើងការខ្ពស់ បន្ទាប់ពីមានរបាយការណ៍ជាច្រើនស្តីពីការប្រទះឃើញយន្តហោះដ្រូនដែលគេមិនស្គាល់អត្តសញ្ញាណ បានហោះនៅជិតទីតាំងរុករកប្រេងនិងឧស្ម័ននៅក្នុងសមុទ្រ ដែលជារបស់ក្រុមហ៊ុនផលិតថាមពលដ៏ធំមួយនោះ។ ការចាប់ខ្លួនជនជាតិរុស្ស៊ីទាំង៤នាក់កាលពីថ្ងៃចន្ទនោះ កើតមានឡើងតែប៉ុន្មានថ្ងៃប៉ុណ្ណោះ បន្ទាប់ពីប៉ូលិសន័រវែសបានចាប់ជនជាតិរុស្ស៊ី២នាក់ នៅក្នុងព្រឹត្តិការណ៍២ដាច់ដោយឡែកពីគ្នាកាលពីសប្តាហ៍មុន។ ជនជាតិរុស្ស៊ីទាំង២នាក់នេះ ត្រូវបានចោទចោទប្រកាន់ពីបទបង្ហោះដ្រូនដើម្បីថតរូបភាពឬវីដេអូ។
២១:៥៨
១៧.១០.២០២២
ថ្ងៃចន្ទ ទី ១៧ ខែតុលា៖
- ក្រសួងការពារជាតិរុស្ស៊ីនិយាយនៅថ្ងៃចន្ទថា ខ្លួនបានធ្វើការវាយប្រហារទ្រង់ទ្រាយធំទៅលើគោលដៅយោធានិងហេដ្ឋារចនាសម្ព័ន្ធថាមពលនៅទូទាំងប្រទេសអ៊ុយក្រែន ដោយប្រើអាវុធ ដែលមានបច្ចេកវិទ្យាខ្ពស់។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។ នៅក្នុងសន្និសីទសារព័ត៌មានប្រចាំថ្ងៃរបស់ខ្លួន ក្រសួងការពារជាតិរុស្ស៊ីបាននិយាយថា ខ្លួនបានវាយចំទៅលើគោលដៅទាំងអស់ដែលបានគ្រោងទុក នៅក្នុងការវាយប្រហារទៅលើទីក្រុងនានារបស់ប្រទេសអ៊ុយក្រែន ក៏ដូចជារារាំងការប៉ុនប៉ងរបស់អ៊ុយក្រែនក្នុងការបំបែកការការពាររបស់ខ្លួននៅក្នុងតំបន់ Kherson ភាគខាងត្បូងផងដែរ។ មានមនុស្សជាច្រើនត្រូវបានសម្លាប់នៅក្នុងការវាយប្រហារតាមអាកាសរបស់រុស៊្សីទៅលើទីក្រុងនានារបស់អ៊ុយក្រែនកាលពីថ្ងៃចន្ទ។ នេះបើតាមការឱ្យដឹងរបស់រដ្ឋមន្ត្រីក្រសួងមហាផ្ទៃអ៊ុយក្រែន លោក Denys Monastyrskyi។
- ប្រធានអង្គការសិទ្ធិមនុស្សថ្មីរបស់អង្គការសហប្រជាជាតិ ដែលទើបចូលកាន់តំណែងនៅថ្ងៃចន្ទនេះ ស្របពេលដែលមានការវាយប្រហារតាមយន្តហោះដ្រូនរបស់រុស្ស៊ីទៅលើរដ្ឋធានីរបស់អ៊ុយក្រែននោះ បាននិយាយថា ការវាយប្រហារទៅលើជនស៊ីវិលនៅក្នុងប្រទេសអ៊ុយក្រែនត្រូវតែបញ្ឈប់។ «យើងបានឃើញរបាយការណ៍ពីសហការីរបស់យើងនៅក្នុងប្រទេសអ៊ុយក្រែន អំពីការវាយប្រហារដោយយន្តហោះដ្រូនទាំងនេះ ហើយវាមានសារៈសំខាន់ណាស់ ដែលជនស៊ីវិលមិនត្រូវបានគេយកធ្វើជាគោលដៅនៃការវាយប្រហារនោះឡើយ។ នេះជាការលំបាកនៅក្នុងតំបន់ដែលមានប្រជាជនរស់នៅដ៏ច្រើនក្នុងទីក្រុង។ នេះបើតាមការលើកបញ្ជាក់របស់លោក Volker Turk ជនជាតិអូទ្រីស ដែលជាឧត្តមស្នងការសិទ្ធិមនុស្សថ្មីរបស់អង្គការសហប្រជាជាតិ។ លោកបានថ្លែងប្រាប់ក្រុមអ្នកសារព័ត៌មានថា ការគោរពច្បាប់មនុស្សធម៌និងច្បាប់សិទ្ធិមនុស្សអន្តរជាតិ គឺ«ពិតជាមានសារសំខាន់ខ្លាំងណាស់ ដូចនេះការអំពាវនាវដ៏ធំមួយ គឺការបញ្ឈប់នូវភាពតានតឹង» ដែលកំពុងកើតមាន។
- អ្នកនាំពាក្យកងទ័ពអាកាសអ៊ុយក្រែន លោកYuriy Ihna និយាយនៅថ្ងៃចន្ទនេះថា កងទ័ពអ៊ុយក្រែន បានបំផ្លាញយន្តហោះដ្រូនរបស់រុស្ស៊ីចំនួន៣៧គ្រឿង ចាប់តាំងពីយប់ថ្ងៃអាទិត្យមក ដែលក្នុងនោះយន្តហោះដ្រូនចំនួនពី៨៥ទៅ៨៦ភាគរយ មានជាប់ពាក់ព័ន្ធនឹងការវាយប្រហារនានា។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។ លោកបានថ្លែងប្រាប់បណ្ដាញសារព័ត៌មានមួយថា៖ «នេះជាលទ្ធផលល្អមួយនៃការងារការពារដែនអាកាសរបស់យើង ហើយចំនួនយន្តហោះដ្រូនដែលនឹងត្រូវបំផ្លាញ នឹងមានការកើនឡើងក្នុងពេលខាងមុខនេះទៀត»។ លោកបានបន្ថែមថា យន្តហោះដ្រូនវាយប្រហារទាំងអស់ បានហោះចូលទឹកដីអ៊ុយក្រែនមកពីភាគខាងត្បូង។
- ប្រទេសអ៊ីរ៉ង់បាននិយាយនៅថ្ងៃចន្ទនេះថា ខ្លួនមិនបានផ្តល់យន្តហោះដ្រូន ទៅឱ្យប្រទេសរុស្ស៊ីដើម្បីប្រើប្រាស់ក្នុងការវាយប្រហារនៅក្នុងប្រទេសអ៊ុយក្រែននោះឡើយ។ នេះបើតាមទីភ្នាក់ងារព័ត៌មាន Reuters។ អ្នកនាំពាក្យក្រសួងការបរទេសអ៊ីរ៉ង់លោក Nasser Kanaani បានថ្លែងប្រាប់សន្និសីទសារព័ត៌មានប្រចាំសប្តាហ៍ថា៖ «ការផ្សព្វផ្សាយព័ត៌មានដែលថា អ៊ីរ៉ង់ផ្តល់យន្តហោះដ្រូនដល់ប្រទេសរុស្ស៊ីនោះ គឺមានមហិច្ឆតានយោបាយ ហើយដែលត្រូវបានចែកចាយដោយប្រភពព័ត៌មានលោកខាងលិច។ យើងមិនបានផ្តល់ប្រព័ន្ធអាវុធណាមួយដល់គូជម្លោះនៅក្នុងសង្គ្រាមនោះឡើយ»។
- អង្គការអូតង់នៅថ្ងៃចន្ទនេះ បានចាប់ផ្តើមធ្វើសមយុទ្ធនុយក្លេអ៊ែរប្រចាំឆ្នាំរបស់ខ្លួន ដែលបានត្រៀមជាយូរមកហើយ នៅទ្វីបអឺរ៉ុបភាគពាយ័ព្យ ខណៈពេលដែលភាពតានតឹងនៃសង្គ្រាមក្នុងប្រទេសអ៊ុយក្រែននៅតែបន្តកើតមាន ក៏ដូចជាការគំរាមកំហែងរបស់ប្រធានាធិបតីរុស្ស៊ីលោក Vladimir Putin ក្នុងការប្រើប្រាស់គ្រប់មធ្យោបាយទាំងអស់ក្នុងការពារបូរណភាពទឹកដីរុស្ស៊ីនោះ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AP។ ប្រទេសជាសមាជិកអង្គការអូតង់ចំនួន១៤ប្រទេស ក្នុងចំណោម៣០ប្រទេស មានគម្រោងនឹងចូលរួមនៅក្នុងសមយុទ្ធនុយក្លេអ៊ែរនេះ ដែលមានឈ្មោះថា Steadfast Noon។ អង្គការនៃសម្ព័ន្ធមិត្តយោធានេះបានឱ្យដឹងផងដែរថា សមយុទ្ធនេះក៏នឹងមានការចូលរួមផងដែរ ពីយន្តហោះប្រមាណចំនួន៦០គ្រឿង ដែលក្នុងនោះក៏មានយន្តហោះចម្បាំង យន្តហោះឈ្លបការណ៍ និងយន្តហោះផ្ទេរសាំងលើអាកាស ហើយសមយុទ្ធនេះនឹងប្រព្រឹត្តទៅរហូតដល់ថ្ងៃទី៣០ ខែតុលាខាងមុខនេះ។ សមយុទ្ធនេះក៏មានការចូលរួមពីយន្តហោះចម្បាំងដែលមានសមត្ថភាពផ្ទុកក្បាលគ្រាប់នុយក្លេអ៊ែរផងដែរ ប៉ុន្តែនឹងមិនធ្វើការទម្លាក់គ្រាប់ពិតនោះឡើយ។
- មានមនុស្សយ៉ាងហោចណាស់ចំនួន៦នាក់ត្រូវបានសម្លាប់ នៅក្នុងការវាយប្រហារដោយកងទ័ពរុស្ស៊ីនៅក្នុងទីក្រុងនៃតំបន់ Sumy ភាគខាងកើតប្រទេសអ៊ុយក្រែន។ នេះបើតាមការបញ្ជាក់របស់ក្រុមមន្ត្រីអ៊ុយក្រែននៅថ្ងៃចន្ទនេះ បន្ទាប់ពីមានយន្តហោះដ្រូនជាច្រើនគ្រឿងរបស់រុស្ស៊ីបានធ្វើការវាយប្រហារទៅលើរដ្ឋធានីកៀវ។ នេះបើតាមទីភ្នាក់ងារព័ត៌មាន AFP ។ រហូតមកដល់ពេលនេះចំនួនអ្នកស្លាប់ដោយសារការវាយប្រហារទៅលើទីតាំងអគារលំនៅដ្ឋានមួយកន្លែង បានកើនដល់៣នាក់ហើយ ហើយមនុស្សចំនួន១៩នាក់ ត្រូវបានជួយសង្គ្រោះ។ ការងារជួយសង្គ្រោះកំពុងត្រូវបានធ្វើឡើង។ នេះបើតាមអនុប្រធានការិយាល័យប្រធានាធិបតីអ៊ុយក្រែន លោក Kyrylo Tymoshenko ដែលបានបង្ហោះសារនៅលើបណ្តាញសង្គម។ ដោយឡែកនៅតំបន់ Sumy ភាគខាងកើតអ៊ុយក្រែន អភិបាលតំបន់និយាយថា មានមនុស្ស៣នាក់ត្រូវបានសម្លាប់ ហើយជាច្រើននាក់ផ្សេងទៀតបានរងរបួស។
- ទិន្នន័យក្រសួងកសិកម្មប្រទេសអ៊ុយក្រែនបានបង្ហាញឱ្យដឹងនៅថ្ងៃចន្ទនេះថា ការនាំចេញគ្រាប់ធញ្ញជាតិរបស់អ៊ុយក្រែននៅក្នុងរយៈពេល១៧ថ្ងៃ ក្នុងខែតុលានេះ មានការធ្លាក់ចុះតែប្រមាណ២,៤ភាគរយតែប៉ុណ្ណោះ ដែលទាបជាងរយៈពេលដូចគ្នាកាលពីឆ្នាំ២០២១ បើទោះបីជាមានការបិទកំពង់ផែអ៊ុយក្រែនជាច្រើនកន្លែង ក៏ដូចជាការឈ្លានពានរបស់ប្រទេសរុស្ស៊ីក្តី។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។ ការនាំចេញគ្រាប់ធញ្ញជាតិរបស់អ៊ុយក្រែន បានធ្លាក់ចុះជាខ្លាំង ចាប់តាំងពីខែកុម្ភៈមក ដោយសារតែសង្គ្រាមឈ្លានពានរបស់រុស្ស៊ី បានបិទកំពង់ផែអ៊ុយក្រែននៅក្នុងសមុទ្រខ្មៅជាច្រើនកន្លែង ដែលធ្វើឱ្យមានការប៉ះពាល់ដល់តម្លៃស្បៀងអាហារជាសាកល និងបង្កការព្រួយបារម្ភពីកង្វះស្បៀងអាហារនៅក្នុងទ្វីបអាហ្វ្រិកនិងតំបន់មជ្ឈិមបូព៌ា។