ទោះបីមានការបំពេញទស្សនកិច្ចនៅមូលដ្ឋានសមុទ្ររាមនៅថ្ងៃសុក្រនេះពីសំណាក់បេសកជនយោធាសហរដ្ឋអាមេរិក ក៏ភាគីទាំងពីរនៅបន្តខ្វែងគំនិតគ្នា ដោយខាងអាមេរិកបានរិះគន់កង្វះការទៅមើលឱ្យបានពេញលេញ នូវទីតាំងទ័ពជើងទឹកខ្មែរដែលនឹងបើកទទួលជំនួយចិនដើម្បីធ្វើទំនើបកម្មហេដ្ឋារចនាសម្ព័ន្ធនិងសមត្ថភាពទ័ពនាពេលខាងមុខ។
លោកវរសេនីយ៍ឯក Marcus Ferrara អនុព័ន្ធយោធាប្រចាំស្ថានទូតអាមេរិកនៅភ្នំពេញបានទៅដល់មូលដ្ឋានសមុទ្ររាមនៅថ្ងៃសុក្រ ក្រោមការយល់ព្រមពីសំណាក់ភាគីកម្ពុជាទៅនឹងសំណើដែលត្រូវបានលើកឡើងដោយអ្នកស្រី Wendy Shermanអនុរដ្ឋមន្ត្រីការបរទេសអាមេរិកអំឡុងដំណើរទស្សនកិច្ចរបស់ខ្លួននៅភ្នំពេញកាលពីថ្ងៃទី០១ ខែមិថុនា កន្លងទៅ។
ការរៀបចំដំណើរទស្សនកិច្ចនេះ មានឡើងខណៈកម្ពុជាព្យាយាមបញ្ជាក់បង្ហាញថាគម្រោងដែលជួយដោយចិនដើម្បីកែលម្អហេដ្ឋារចនាសម្ព័ន្ធនៅមូលដ្ឋានសមុទ្ររាម រួមមានការសង់ផែចតនាវាថ្មី រោងជាងជួសជុលទូក និងការបូមខ្សាច់បង្កើនជម្រៅនៅឈូងសមុទ្ររាមមិនមែនជាការទទួលវត្តមានយោធាចិនស្នាក់នៅបោះមូលដ្ឋានអចិន្ត្រៃយ៍នៅទីនោះទេ ដូចដែលអាមេរិកបារម្ភនោះទេ។
នៅក្នុងសេចក្ដីថ្លែងការណ៍មួយចេញផ្សាយនៅរសៀលថ្ងៃសុក្រនេះ ស្ថានទូតអាមេរិកនៅភ្នំពេញបានលើកឡើងថា៖ «នៅក្នុងពេលទស្សនកិច្ចដ៏ខ្លីនោះ មន្ត្រីយោធាកម្ពុជាមិនបានអនុញ្ញាតឲ្យលោកអនុព័ន្ធយោធាទៅមើលគ្រប់កន្លែង នៅក្នុងមូលដ្ឋានកងទ័ពជើងទឹកនោះទេ។ នៅពេលដឹងច្បាស់ថា លោកមិនត្រូវបានអនុញ្ញាតឲ្យចូលមើលបានអស់ លោកវរសេនីយឯក Ferrara បានបញ្ចប់ការដើរមើលហើយបានស្នើសុំឲ្យមន្ត្រីយោធាកម្ពុជាកំណត់ពេលទស្សនកិច្ចឡើងវិញ ដោយអនុញ្ញាតឲ្យមានការដើរមើលគ្រប់កន្លែង នៅក្នុងពេលខាងមុខឲ្យបានឆាប់បំផុត»។
យ៉ាងណាក៏ដោយ តាមរយៈសេចក្ដីថ្លែងការណ៍ដដែលស្ថានទូតអាមេរិកបានស្នើថាការមានដំណើរទស្សនកិច្ច«ញឹកញាប់»ពីសំណាក់បណ្ដាអនុព័ន្ធយោធាបរទេសដែលប្រចាំការនៅភ្នំពេញនឹងដើរតួនាទីសំខាន់ក្នុងការ«ឆ្ពោះទៅរកតម្លាភាពនិងការទុកចិត្តគ្នាទៅវិញទៅមកបានច្រើន»។
សហរដ្ឋអាមេរិកបានថ្លែងជាច្រើនដងថា វត្តមានយោធាចិននៅរាមឬនៅលើទឹកដីកម្ពុជានឹងបង្កជាបញ្ហាអស្ថិរភាពដល់សន្ដិសុខនិងស្ថិរភាពក្នុងតំបន់។
យ៉ាងណាក៏ដោយ ឧត្ដមនាវីទោ ម៉ី ឌីណា នាយសេនាធិការមូលដ្ឋានសមុទ្ររាមបានលើកឡើងថាពុំមានកន្លែងណាដែលមន្ត្រីទ័ពជើងទឹកកម្ពុជាហាមលោកវរៈសេនីយ៍ឯក Marcus Ferrara ទៅទស្សនានោះទេ។
មន្ត្រីទ័ពជើងទឹកកម្ពុជារូបនេះប្រាប់វីអូអេថា៖ «នរណាមិនបើក មិនទូលាយឱ្យវា វាឈរមើលពេញអស់ហើយហ្នឹង គេបើកឱ្យវាមើលទេតើហើយទៅមើលអីគេទៀត បើមូលដ្ឋានសមុទ្រមានតែប៉ុនមេដៃ ដីតែប៉ុន្មាន៥០ហិកតាហើយទៅរកមើលឯណាបើមិនទាន់មានអីផង ល្ហល្ហេវហើយនាំវាជូនដើរមើលអស់ហើយ និយាយជជែកគ្នាហើយ ក៏ប៉ុន្តែមិនដឹងគាត់យល់យ៉ាងម៉េច ដូចមិនយល់ដែរ គាត់ខ្លាចកម្ពុជាមានកំពង់ផែឬរោងជាងជួសជុល បែបគិតថាវាមិនចង់ឱ្យគេរស់ក៏មិនដឹង ខ្ញុំក៏មិនយល់»។
អ្នកនាំពាក្យស្ថានទូតអាមេរិកនៅភ្នំពេញ លោក Chad Roedemeier បដិសេធការសុំអត្ថាធិប្បាយរបស់វីអូអេ ដោយថាស្ថានទូតរក្សានូវសេចក្ដីថ្លែងការណ៍ដើមរបស់ខ្លួនថាលោកវរសេនីយ៍ឯកFerrara មិនត្រូវបានទទួលឱ្យធ្វើដំណើរពេញលេញក្នុងមូលដ្ឋានសមុទ្រនោះទេ។
ឧត្ដមសេនីយ៍ទោ ម៉ី ឌីណា បន្ថែមថា គម្រោងដែលជាជំនួយរបស់ចិននៅមូលដ្ឋានសមុទ្ររាមមិនមានវឌ្ឍនភាពអ្វីនោះទេ ដែលមានត្រឹមការវាស់វែងជាជំហានដំបូងសិនដោយសារតែការរំខានពីសំណាក់ជំងឺកូវីដ១៩ និងអាកាសធាតុមូសុងមិនសូវល្អ។
លោកបញ្ជាក់ថា៖ «ហើយណាមួយផែនការ វាមិនមែនធ្វើភ្លាម កើតភ្លាម វាមានការវាស់វែង គេហៅថារៀបចំទីតាំងហ្នឹង យ៉ាងម៉េចយ៉ាងម៉ាឱ្យវាសមរម្យតែប៉ុណ្ណឹងទេ»។
នៅពេលត្រូវបានសួរថា តើចិនអាចនឹងបញ្ជូនកម្លាំងយោធាឬវិស្វកម្មរបស់ខ្លួនមកសាងសង់សម្រេចគម្រោងឬយ៉ាងណា នាយសេនាធិការមូលដ្ឋានសមុទ្ររាមរូបនេះ បានថ្លែងថា៖ «អាហ្នឹងក្រុមហ៊ុនគាត់(ចិន)ដេញថ្លៃ យើងមិនទាន់ដឹង អាហ្នឹងរឿងរបស់គាត់។ គ្រាន់ថា កម្ពុជាគ្រាន់តែទទួលជំនួយទេ បណ្ដាប្រទេសណាក៏ដោយ ឱ្យតែគាត់ផ្ដល់ជំនួយមកយើងទទួលប៉ុន្តែថ្នាក់លើគាត់ជាអ្នកសម្រេចទទួល។ យើងថ្នាក់ក្រោមគ្រាន់តែចាំទទួលផលពីអ្វីដែលគេជួយទេ»៕
