សហរដ្ឋអាមេរិកនិងសម្ពន្ធមិត្តបានដាក់ទណ្ឌកម្មថែមទៀតលើប្រទេសមីយ៉ាន់ម៉ាកាលពីថ្ងៃអង្គារ ដោយកំណត់ខួបឆ្នាំទីពីរនៃរដ្ឋប្រហារក្នុងប្រទេសនេះដោយការដាក់ទណ្ឌកម្មលើមន្ត្រីថាមពលនិងសមាជិកក្រុមប្រឹក្សាយោធាក្នុងចំណោមក្រុមជនឯទៀតៗ។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន Reuters។
បើតាមសេចក្តីថ្លែងការណ៍របស់ក្រសួងហិរញ្ញវត្ថុសហរដ្ឋអាមេរិកថា រដ្ឋាភិបាលក្រុងវ៉ាស៊ីនតោនដាក់ទណ្ឌកម្មលើគណៈកម្មការសហភាពរៀបចំការបោះឆ្នោត សហគ្រាសរ៉ែ មន្ត្រីខាងថាមពលនិងក្រុមមន្ត្រីយោធាបច្ចុប្បន្ននិងក្រុមអតីតមន្ត្រីយោធា។ ទីភ្នាក់ងារសារព័ត៌មាន Reuters បានរាយការណ៍មុនគេអំពីសេចក្តីលម្អិតនៃចំណាត់ការទាំងនេះរបស់ស.រ.អ.។
អ្នកនាំពាក្យម្នាក់នៃក្រសួងហិរញ្ញវត្ថុអាមេរិកបាននិយាយថា ចំណាត់ការនេះជាលើកដំបូងដែលស.រ.អ.បានយកពួកមន្ត្រីសហគ្រាសប្រេងនិងឧស្ម័នមីយ៉ាន់ម៉ា MOGE ជាទីដៅនៃការដាក់ទណ្ឌកម្មតាមរយៈកម្មវិធីទណ្ឌកម្មបច្ចុប្បន្នប្រឆាំងនឹងមីយ៉ាន់ម៉ា។
ប្រទេសកាណាដា អូស្ត្រាលី និងចក្រភពអង់គ្លេស ក៏បានប្រកាសអំពីការដាក់ទណ្ឌកម្មរបស់ពួកគេនៅថ្ងៃអង្គារដែរ។
ពួកឧត្តមសេនីយ៍ជាន់ខ្ពស់មីយ៉ាន់ម៉ាបានដឹកនាំរដ្ឋប្រហារមួយកាលពីខែកុម្ភៈ ឆ្នាំ២០២១ នៅក្រោយការបែងចែកអំណាចគ្នា៥ឆ្នាំតាមរយៈប្រព័ន្ធនយោបាយស៊ីវិលដែលពួកយោធាបានបង្កើត ដែលបាននាំឱ្យមានកំណែទម្រង់មួយទសវត្សរ៍មិនធ្លាប់មានកាលពីពេលមុនៗ។
ប្រទេសមីយ៉ាន់ម៉ាក៏មានចលាចលជាមួយចលនាអ្នកតស៊ូបានប្រយុទ្ធប្រឆាំងនឹងក្រុមយោធាលើរណសិរ្សជាច្រើន បន្ទាប់ពីមានការបង្ក្រាបបង្ហូរឈាមលើក្រុមប្រឆាំងដែលបាននាំឲ្យមានការដាក់ទណ្ឌកម្មដោយពួកប្រទេសលោកខាងលិច។
នៅថ្ងៃពុធនេះ ពលរដ្ឋមីយ៉ាន់ម៉ាជាច្រើនរយនាក់បានធ្វើបាតុកម្មតវ៉ានៅពីខាងមុខស្ថានទូតមីយ៉ាន់ម៉ាក្នុងទីក្រុងបាងកក។ រីឯនៅក្នុងប្រទេសវិញអ្នកគាំទ្រចលនាប្រជាធិបតេយ្យបានធ្វើពហិការដោយបិទហាងទំនិញនានានៅទូទាំងប្រទេស។
ចំណាត់ការរបស់ស.រ.អ.កាលពីថ្ងៃអង្គារបានយកនាយកចាត់ចែងកិច្ចការនិងនាយករដ្ឋរងផ្នែកចាត់ចែងកិច្ចការនៃសហគ្រាស MOGE របស់រដ្ឋជាទីដៅនៃការដាក់ទណ្ឌកម្ម ដែលជាសហគ្រាសរដ្ឋមានប្រាក់ចំណូលច្រើនបំផុតរបស់ក្រុមប្រឹក្សាយោធា។ នេះបើតាមសេចក្តីថ្លែងការណ៍របស់ក្រសួងហិរញ្ញវត្ថុស.រ.អ.។
ក្នុងចំណោមជនរងការដាក់ទណ្ឌកម្មដោយរដ្ឋាភិបាលក្រុងវ៉ាស៊ីនតោន មានរដ្ឋមន្ត្រីថាមពលរបស់សហភាពលោក Myo Myint Oo ដែលក្រសួងហិរញ្ញវត្ថុបាននិយាយថា តំណាងរដ្ឋាភិបាលមីយ៉ាន់ម៉ាក្នុងការទាក់ទងខាងវិស័យថាមពលក្នុងថ្នាក់អន្តរជាតិនិងថ្នាក់ជាតិ និងក្នុងការចាត់ចែងកិច្ចការអង្គភាពរបស់រដ្ឋទាក់ទិននឹងការផលិតនិងការដឹកជញ្ជូនប្រេងនិងឧស្ម័នទៅលក់ឯប្រទេសក្រៅ។
សហគ្រាសរ៉ែទី១ និងសហគ្រាសរ៉ែទី២ ដែលទាំងពីរនេះជាសហគ្រាសរដ្ឋ និងគណៈកម្មការសហភាពរៀបចំការបោះឆ្នោត ក៏រងការដាក់ទណ្ឌកម្មដោយស.រ.អ.ដែរ៕
