រដ្ឋាភិបាលយោធាមីយ៉ាន់ម៉ាកំពុងទទួលបានការគាំទ្រពីរដ្ឋាភិបាលបរទេសនិងអង្គការអន្តរជាតិជាង ៦០ រួមទាំងទីភ្នាក់ងារអង្គការសហប្រជាជាតិមួយចំនួនផងដែរ។ នេះបើយោងតាមការសិក្សាស្រាវជ្រាវមួយរបស់អង្គការ Justice for Myanmar ដែលតាមដានការរំលោភសិទ្ធិមនុស្សនៅក្នុងប្រទេសមីយ៉ាន់ម៉ា។
អង្គការ Justice for Myanmar បានចេញផ្សាយរបាយការណ៍ថ្មីមួយកាលពីថ្ងៃទី ២៥ ខែមករាកន្លងទៅនេះ ដែលមានចំណងជើងថា «ការធ្វើឱ្យរបបផ្ដាច់ការរីកលូតលាស់ (Developing a Dictatorship)»។ របាយការណ៍នេះបានកត់ត្រារដ្ឋាភិបាលបរទេសនិងអង្គការអន្តរជាតិជាច្រើនដែលខ្លួនអះអាងថាបានផ្ដល់ជំនួយផ្នែកនយោបាយ បច្ចេកទេស និងហិរញ្ញវត្ថុដល់របបយោធាមីយ៉ាន់ម៉ា។
កាលពីថ្ងៃទី ១ ខែកុម្ភៈ ឆ្នាំ ២០២១ យោធាមីយ៉ាន់ម៉ាបានដណ្ដើមអំណាចនៅក្នុងរដ្ឋប្រហារ ដែលឈានទៅដល់ការទម្លាក់រដ្ឋាភិបាលដែលជ្រើសរើសតាមបែបប្រជាធិបតេយ្យរបស់អ្នកស្រី Aung San Suu Kyi។ រដ្ឋប្រហារនេះត្រូវបានប្រជាពលរដ្ឋមីយ៉ាន់ម៉ាប្រឆាំងយ៉ាងខ្លាំងដោយធ្វើការតវ៉ានៅទូទាំងប្រទេស។
អង្គការ Justice for Myanmar បានបញ្ជាក់នៅក្នុងរបាយការណ៍របស់ខ្លួនថា «រដ្ឋាភិបាលបរទេសចំនួន ២២ អង្គការអន្តររដ្ឋាភិបាលចំនួន ២៦ (ដែលក្នុងនោះរួមមានទាំងទីភ្នាក់ងារអង្គការសហប្រជាជាតិចំនួន ១៤ ផងដែរ) ស្ថាប័នហិរញ្ញវត្ថុបរទេសចំនួន ៨ និងអង្គការអន្តរជាតិផ្សេងទៀតចំនួន ៨» បានផ្ដល់ការគាំទ្រផ្នែកនយោបាយនិងហិរញ្ញវត្ថុដល់របបយោធាមីយ៉ាន់ម៉ា។
អង្គការនេះបានបន្ថែមថា ការគាំទ្រនេះធ្វើឡើង «ក្នុងទម្រង់ជាទំនាក់ទំនងការទូត គម្រោងផ្ដួចផ្ដើមអភិវឌ្ឍន៍ កិច្ចសហប្រតិបត្តិការបច្ចេកទេស និងទំនាក់ទំនងផ្នែកអចលនទ្រព្យ ក្នុងចំណោមទម្រង់ផ្សេងៗទៀត»។
របាយការណ៍របស់អង្គការនេះបានលើកឡើងថា រដ្ឋាភិបាលនៃប្រទេសរុស្ស៊ី ចិន ឥណ្ឌា ប៉ាគីស្ថាន បង់ក្លាដែស វៀតណាម ឡាវ និងថៃ ស្ថិតក្នុងចំណោមរដ្ឋាភិបាលដែលផ្ដល់ភាពស្របច្បាប់ដល់របបយោធាមីយ៉ាន់ម៉ាតាមរយៈការទទួលស្គាល់ជាផ្លូវការនូវរបបនេះថាជារដ្ឋាភិបាលនៃប្រទេសមីយ៉ាន់ម៉ា។
របាយការណ៍នេះក៏បានបញ្ជាក់ផងដែរថា៖ «ទីភ្នាក់ងារអង្គការសហប្រជាជាតិជាច្រើនដូចជាអង្គការយូនីសេហ្វ (UNICEF) ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (UNOCHA) អង្គការអន្តរជាតិទេសន្តរប្រវេសន៍ (IOM) អង្គការសុខភាពពិភពលោក (WHO) និងអង្គការស្បៀងអាហារនិងកសិកម្ម (FAO) បានប្រគល់សារតាំងរបស់ពួកគេ ឬក៏បានចុះហត្ថលេខាលើកិច្ចព្រមព្រៀងនានាជាមួយនឹងរបបយោធាមីយ៉ាន់ម៉ា»។
មន្ត្រីអង្គការសហប្រជាជាតិនៅទីក្រុង New York សហរដ្ឋអាមេរិក មិនបានឆ្លើយតបភ្លាមៗចំពោះសំណើសុំបញ្ចេញយោបល់ជុំវិញរឿងនេះនោះទេ ប៉ុន្តែទីភ្នាក់ងារនានាផ្នែកមនុស្សធម៌របស់អង្គការសហប្រជាជាតិជារឿយៗធ្វើការនៅក្នុងប្រទេសដែលត្រួតត្រាដោយរបបផ្ដាច់ការដើម្បីបន្តកិច្ចការជួយសង្គ្រោះជីវិត។
ទាក់ទិននឹងកិច្ចសហប្រតិបត្តិការផ្នែកបច្ចេកទេសជាមួយនឹងរបបយោធាមីយ៉ាន់ម៉ា របាយការណ៍នេះបានលើកឡើងនូវឈ្មោះរបស់ស្ថាប័នមួយចំនួនដូចជាបណ្ឌិតសភាការពារជាតិជប៉ុន (National Defense Academy of Japan) និងកងកម្លាំងការពារខ្លួនជប៉ុន (Japan Self-Defense Forces) ការិយាល័យកិច្ចការបរទេសរបស់រដ្ឋាភិបាលសហព័ន្ធអាល្លឺម៉ង់ (German Government Federal Foreign Office) និងមហាវិទ្យាល័យ Colombo Plan Staff College នៅទីក្រុងម៉ានីល ប្រទេសហ្វីលីពីន រួមជាមួយនឹងស្ថាប័នជាច្រើនទៀត។
គេមិនឃើញមានការឆ្លើយតបភ្លាមៗណាមួយពីរបបយោធាមីយ៉ាន់ម៉ាចំពោះរបាយការណ៍របស់អង្គការ Justice for Myanmar នេះទេ។
អ្នកស្រី Yadanar Maung អ្នកនាំពាក្យនៃអង្គការ Justice for Myanmar បានបញ្ជាក់នៅក្នុងសេចក្ដីថ្លែងការណ៍មួយដែលផ្ញើមកកាន់ VOA ថា៖ «ទម្រង់ជាច្រើននិងផ្សេងៗគ្នានៃការគាំទ្ររបស់អន្តរជាតិចំពោះរបបយោធាមីយ៉ាន់ម៉ាដែលយើងបានកត់ត្រា គឺបានជួយទ្រទ្រង់នូវឧក្រិដ្ឋកម្មសង្គ្រាមនិងឧក្រិដ្ឋកម្មប្រឆាំងនឹងមនុស្សជាតិជាបន្តរបស់របបយោធានេះ និងអូសបន្លាយបន្តទៅមុខទៀតនូវការដឹកនាំផ្ដាច់ការរបស់យោធា»។
នៅក្នុងសន្និសីទកាសែតដែលធ្វើឡើងដោយអង្គការ Justice for Myanmar កាលពីថ្ងៃទី ២៥ ខែមករាកន្លងទៅនេះ អ្នកស្រី Maung បាននិយាយថា៖ «វាមានរយៈពេល ២ ឆ្នាំហើយតាំងពីពេលដែលរដ្ឋប្រហារយោធាមីយ៉ាន់ម៉ាបានធ្វើឡើង។ មនុស្សជាង ២.៧០០ នាក់ត្រូវបានសម្លាប់ និងជាង ១៣.៦០០ នាក់នៅកំពុងជាប់ឃុំឃាំងនៅឡើយ»។
នៅក្នុងការបញ្ជាក់របស់អ្នកស្រីដែលផ្ញើមកកាន់ VOA អ្នកស្រីបានថ្លែងថា៖ «យើងចង់ឃើញមានការបញ្ចប់នូវការគាំទ្ររបស់រដ្ឋាភិបាលនិងអង្គការនានាចំពោះរបបយោធាមីយ៉ាន់ម៉ាខុសច្បាប់ មិនថាការគាំទ្រនោះធ្វើឡើងតាមរយៈការអញ្ជើញ [អ្នកតំណាងនៃរបបយោធានោះ] ឱ្យចូលរួមនៅក្នុងកិច្ចប្រជុំនិងការបណ្ដុះបណ្ដាលនានា ឬក៏ការគាំទ្រជាហិរញ្ញវត្ថុតាមរយៈអាជីវកម្មនោះឡើយ»។
អ្នកស្រីបានបន្ថែមថា៖ «វាដល់ពេលដែលសហគមន៍អន្តរជាតិត្រូវបង្កើនការគាំទ្រនិងឈរជាមួយនឹងប្រជាពលរដ្ឋមីយ៉ាន់ម៉ាតាមរយៈការកាត់បន្ថយការគាំទ្រចំពោះរបបយោធាមីយ៉ាន់ម៉ា និងតាមរយៈការទទួលស្គាល់រដ្ឋាភិបាលឯកភាពជាតិ (NUG) ជារដ្ឋាភិបាលស្របច្បាប់របស់មីយ៉ាន់ម៉ា»៕
ប្រែសម្រួលដោយលោក ជឹង ប៉ូជីន
