ប្រធានាធិបតីតួកគីលោក Recep Tayyip Erdoganបាននិយាយនៅថ្ងៃពុធនេះថាលោកជឿថាកិច្ចព្រមព្រៀងដែលអនុញ្ញាតឱ្យគ្រាប់ធញ្ញជាតិអ៊ុយក្រែននាំចេញកាត់តាមសមុទ្រខ្មៅនឹងនៅស្ថិតជាធរមានហួសថ្ងៃផុតកំណត់នៅថ្ងៃសៅរ៍ខាងមុខនេះទៀត។
លោកប្រធានាធិបតី Erdoganបានប្រាប់ក្រុមអ្នកយកព័ត៌មាននៅឯសន្និសីទកំពូលG-20នៅលើកោះបាលីប្រទេសឥណ្ឌូណេស៊ីថា មានការចរចាកំពុងបន្តធ្វើឡើងអំពីការបន្តកិច្ចព្រមព្រៀងនេះ ហើយថាលោកមានគម្រោងនិយាយជាមួយប្រធានាធិបតីរុស្ស៊ីលោក Vladimir Putin បន្ទាប់ពីចាកចេញពីសន្និសីទកំពូលនេះ។
អង្គការសហប្រជាជាតិនិងតួកគីបានសម្របសម្រួលឱ្យមានកិច្ចព្រមព្រៀងនេះជាមួយប្រទេសអ៊ុយក្រែននិងរុស្ស៊ី កាលពីខែកក្កដាដើម្បីអនុញ្ញាតឱ្យអ៊ុយក្រែននាំចេញគ្រាប់ធញ្ញជាតិចេញពីសមុទ្រខ្មៅរបស់ខ្លួន ដោយប្រើកប៉ាល់ដែលត្រូវបានត្រួតពិនិត្យនៅក្នុងប្រទេសតួកគីហើយរុស្ស៊ីនឹងនាំចេញម្ហូបអាហារនិងជី។
អង្គការសហប្រជាជាតិនិយាយថា គ្រាប់ធញ្ញជាតិនិងគ្រឿងចំណីអាហារប្រហែល១១ លានតោនទៀត បានត្រូវនាំចេញទៅកាន់ប្រទេសចំនួន៤២ចាប់តាំងពីកិច្ចព្រមព្រៀងនោះបានចាប់ផ្តើមអនុវត្តមក។
រុស្ស៊ីបានចាប់ផ្តើមវាយប្រហារតាមអាកាសលើអ៊ុយក្រែនកាលពីថ្ងៃអង្គារ ដោយសំដៅ លើតំបន់ចំនួន១០ រួមទាំងរដ្ឋធានីកៀវផង នៅក្នុងកិច្ចប្រតិបត្តិការយោធាដើម្បីសងសឹកដល់ភាពជោគជ័យដ៏ធំបង្អស់មួយរបស់អ៊ុយក្រែន ដែលបានកាន់កាប់ទីក្រុង Kherson ភាគខាងត្បូងដែលជាទីក្រុងដ៏សំខាន់មួយកាលពីសប្តាហិ៍មុន។
ការប្រកាសភាពអាសន្ននៃការវាយប្រហារតាមអាកាសរបស់រុស្ស៊ីនេះ បានបន្លឺនៅទូទាំងប្រទេសអ៊ុយក្រែន។ ការវាយប្រហារជិត១០០រួមទាំងការវាយប្រហារដោយកាំជ្រួចមីស៊ីលបានកើតមានកើតឡើងបន្ទាប់ពីមានភាពស្ងប់ស្ងាត់ប៉ុន្មានថ្ងៃ នៅក្នុងប្រទេសអ៊ុយក្រែន បន្ទាប់ពីការដកថយរបស់រុស្ស៊ីចេញពីទីក្រុង Khersonហើយអ៊ុយក្រែនបានកាន់កាប់ទីក្រុងនោះ ដែលកងកម្លាំងរុស្ស៊ីបានកាន់កាប់កាលពីដំបូងនៅក្នុងសង្គ្រាមរយៈពេល៩ខែកន្លងទៅ។
នៅឯជំនួបរបស់ក្រុមមេដឹកនាំប្រទេសដែលមានឧស្សាហកម្មជឿនលឿន G-20 នៅលើកោះបាលី ប្រទេសឥណ្ឌូណេស៊ី ទីប្រឹក្សាសន្តិសុខជាតិរបស់សេតវិមានលោក Jake Sulivan បានថ្កោលទោសការវាយប្រហារតាមអាកាសរបស់រុស្ស៊ីនោះ៕
ប្រធានាធិបតីតួកគីមើលឃើញការបន្តកិច្ចព្រមព្រៀងគ្រាប់ធញ្ញជាតិរបស់អ៊ុយក្រែន
