សហរដ្ឋអាមេរិកកំពុងធ្វើការងារដើម្បីធានាថា ការដាក់ទណ្ឌកម្មសេដ្ឋកិច្ចរបស់ខ្លួន មិននាំឱ្យមានការរាំងស្ទះដល់ការនាំចេញស្បៀងអាហារនិងជីរបស់ប្រទេសរុស្ស៊ី ទៅកាន់ប្រទេសកំពុងអភិវឌ្ឍន៍ នៅក្នុងអំឡុងកិច្ចពិភាក្សាដើម្បីបន្តកិច្ចព្រមព្រៀង ដែលផ្តួចផ្តើមឡើងដោយអង្គការសហប្រជាជាតិ ស្តីពីការនាំចេញស្បៀងអាហារពីប្រទេសអ៊ុយក្រែន ដែលត្រូវអស់សុពលភាពនៅថ្ងៃទី១៩ ខែវិច្ឆិកាខាងមុខនេះ។
នៅក្នុងបទសម្ភាសន៍មួយក្នុងសប្តាហ៍នេះ លោក Ramin Toloui មន្ត្រីជាន់ខ្ពស់នៃក្រសួងការបរទេសទទួលបន្ទុកកិច្ចការសេដ្ឋកិច្ច បានប្រាប់វីអូអេថា វានឹងមានផលវិបាកធ្ងន់ធ្ងរលើសន្តិសុខស្បៀងអាហារក្នុងពិភពលោក ប្រសិនបើរុស្ស៊ីមិនព្រមបន្តកិច្ចព្រមព្រៀងនោះទេ។
លោកបាននិយាយកាលពីថ្ងៃពុធថា «នៅពេលដែលរុស្ស៊ីបានផ្អាកអនុវត្តកិច្ចព្រមព្រៀងនោះមួយរយៈពេលខ្លី កាលពី២សប្តាហ៍កន្លងទៅ យើងបានឃើញថាមានការកើនឡើងនូវតម្លៃស្បៀងអាហារយ៉ាងខ្លាំងនៅលើពិភពលោកនៅពេលនោះ។ ហើយនៅពេលដែលរុស្ស៊ីបានចូលរួមបន្តអនុវត្តវាឡើងវិញ ដែលជារឿងនាំឱ្យយើងសប្បាយចិត្តនោះ តម្លៃស្បៀងអាហារក្នុងសាកលលោក បានធ្លាក់ចុះវិញ»។
លោកបន្ថែមទៀតថា «ដូច្នេះផលវិបាកដែលកើតចេញពីការមិនបន្តកិច្ចព្រមព្រៀងនោះ គឺធំធេងណាស់។ យើងបានឃើញហើយនូវការឡើងថ្លៃស្បៀងអាហារក្នុងរយៈពេលខ្លីមួយ នៅពេលដែលរុស្ស៊ីបានផ្អាកកិច្ចសហប្រតិបត្តិការរបស់ខ្លួន»។
កិច្ចព្រមព្រៀងនាំគ្រាប់ធញ្ញជាតិចេញតាមសមុទ្រខ្មៅ ដែលអង្គការសហប្រជាជាតិនិងប្រទេសតួកគី បានជួយចរចារកាលពីខែកក្កដាកន្លងទៅ ដោយបានបង្កើតច្រករបៀងមួយ សម្រាប់ការនាំចេញនូវស្បៀងអាហារនិងជី ប៉ុន្តែប្រទេសរុស្ស៊ីនៅពេលនេះហាក់នៅមានភាពស្ទាក់ស្ទើរនៅឡើយ ក្នុងការបន្តកិច្ចព្រមព្រៀងនេះ នៅពេលដែលវាអស់សុពលភាព៕
សហរដ្ឋអាមេរិកព្រមានពីផលវិបាកធ្ងន់ធ្ងរ ប្រសិនបើគ្មានការបន្តកិច្ចព្រមព្រៀងនាំចេញគ្រាប់ធញ្ញជាតិអ៊ុយក្រែន
ក្រសួងការបរទេសអាមេរិក —
