ប្រធានាធិបតីសហរដ្ឋអាមេរិកលោក Donald Trump គ្រោងចុះហត្ថលេខាលើបទបញ្ជាប្រធានាធិបតីមួយនៅថ្ងៃអង្គារនេះ អំពីការកែទម្រង់មួយចំនួនលើផ្នែកប៉ូលិស។ មន្ត្រីជាន់ខ្ពស់មួយរូបនៃរដ្ឋបាលរបស់លោក Trump បានបញ្ជាក់ថា គោលបំណងនៃបទបញ្ជានេះគឺ «ដើម្បីវិនិយោគបន្ថែម និងផ្ដល់ការលើកទឹកចិត្តលើការអនុវត្តនីតិវិធីឲ្យបានត្រឹមត្រូវ»។
មន្ត្រីជាន់ខ្ពស់រូបនោះបានប្រាប់អ្នកកាសែតកាលពីថ្ងៃច័ន្ទម្សិលមិញថា ផ្នែកចម្បងគឺការបង្កើតអង្គភាពមួយចំនួនដើម្បីបណ្ដុះបណ្ដាលមន្ត្រីប៉ូលិសអំពីយុទ្ធសាស្ត្របញ្ជៀសមិនឲ្យមានជម្លោះ និងការប្រើប្រាស់កម្លាំងតាមស្ដង់ដារត្រឹមត្រូវ។
ផ្នែកមួយទៀតគឺជំរុញឲ្យមានការបង្កើតសេវាកម្មសម្រាប់អ្នកសហឆ្លើយតប ដែលជាប្រព័ន្ធមួយដែលអាជ្ញាធរនឹងចាប់ដៃគូជាមួយនឹងអ្នកធ្វើការផ្នែកសង្គម នៅពេលឆ្លើយតបទៅនឹងការហៅទូរស័ព្ទពាក់ព័ន្ធនឹងបញ្ហាអហិង្សា ជាពិសេសបញ្ហាផ្នែកសុខភាពផ្លូវចិត្ត និងបញ្ហាញៀនថ្នាំជាដើម។
ការធ្វើកំណែទម្រង់ប៉ូលិសថ្នាក់ជាតិទ្រង់ទ្រាយធំ កំពុងស្ថិតក្រោមការពិចារណារបស់សភា។
គណៈកម្មាធិការតុលាការនៃព្រឹទ្ធសភានឹងបើកកិច្ចប្រជុំលើបញ្ហានេះនៅថ្ងៃអង្គារនេះ ដោយមានការផ្ដល់សក្ខីកម្មពីមន្ត្រីអនុវត្តច្បាប់ និងមន្ត្រីសិទ្ធិស៊ីវិលមួយចំនួន។
សំណើឲ្យមានកំណែទម្រង់ប៉ូលិសនេះបានធ្វើឡើង បន្ទាប់ពីមានការតវ៉ានៅទូទាំងសហរដ្ឋអាមេរិកអស់ ៣ សប្ដាហ៍កន្លងមក ប្រឆាំងនឹងការស្លាប់របស់លោក George Floyd ពេលស្ថិតក្នុងសមត្ថកិច្ចរបស់ប៉ូលិស នៅក្នុងទីក្រុង Minneapolis រដ្ឋ Minnesota៕
