ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក​ ត្រាំ​ នឹង​ប្រកាស​ស្ថានភាព​ជាតិ​មាន​អាសន្ន​នៅពេល​លោក​ចុះហត្ថលេខា​លើ​សេចក្តី​ព្រាង​ច្បាប់​ស្តី​ពី​សន្តិសុខ​ព្រំដែន


អ្នក​ល្បាត​ព្រំ​ដែន​ដើរ​នៅជិត​បង្គោល​ព្រំ​ដែន​នៅ​ទីក្រុង Tijuana ប្រទេស​ម៉ិកស៊ិក កាល​ពី​ថ្ងៃ​ទី​៥ ខែ​កុម្ភៈ ២០១៩។

លោក​ប្រធានាធិបតី ដូណាល់ ត្រាំ គ្រោង​នឹង​ប្រកាស​ស្ថាន​ភាព​ជាតិ​មាន​អាសន្ន​ដើម្បី​ឱ្យ​លោក​អាច​ចៀស​វៀង​សភា​ហើយ​អាច​ទទួល​ប្រាក់​សម្រាប់​កសាង​ជញ្ជាំង​មួយ​តាម​ព្រំដែន​ជាមួយ​ប្រទេស​ម៉ិកស៊ិក។​

សេត​វិមាន​បាន​និយាយ​ថា​លោក ​ត្រាំ​ នឹង​ថ្លែង​សុន្ទរកថា​អំពី​សន្តិសុខ​ជាតិ​និង​វិបត្តិ​មនុស្សធម៌​នៅ​លើ​ព្រំដែន​ខាង​ត្បូង​របស់​អាមេរិក​នៅ​ព្រឹក​ថ្ងៃ​សុក្រ​នេះ​នៅ​ម៉ោង​១០​ក្នុង​សួន​ផ្កា​កុលាប។

សភា​តំណាង​រាស្ត្រ​អាមេរិកាំង​និង​ព្រឹទ្ធសភា​ស.រ.អា.​បាន​អនុម័ត​សេចក្តី​ព្រាង​ច្បាប់​អំពី​សន្តិ​សុខ​ព្រំដែន​កាល​ពី​យប់​ថ្ងៃ​ព្រហស្បតិ៍​ដើម្បី​ផ្តល់​ប្រាក់​កាស​សម្រាប់​ឱ្យ​រដ្ឋាភិបាល​មាន​ដំណើរ​ការ​និង​ដើម្បី​បញ្ចៀស​ការ​បិទ​រដ្ឋាភិបាល​សហព័ន្ធ​មួយ​លើក​ទៀត។ លោក ត្រាំ មាន​ពេល​វេលា​រហូត​ដល់​ពាក់​កណ្តាល​អធ្រាត្រ​ថ្ងៃ​សុក្រ​នេះ​ដើម្បី​ចុះ​ហត្ថលេខា​លើ​សេចក្តី​ព្រាង​ច្បាប់​នេះ​ ហើយ​សេតវិមាន​បាន​និយាយ​កាល​ពី​ថ្ងៃ​ព្រហស្បតិ៍​ថា ​លោក​នឹង​ចុះ​ហត្ថលេខា។​

សេចក្តី​ព្រាង​ច្បាប់​នេះ​ផ្តល់​ឱ្យ​លោក​នូវ​ប្រាក់​តែ​១,៣០០​លាន​ដុល្លារ​ដើម្បី​ស្ថាបនា​របាំង​មួយ​នៅ​តាម​ព្រំដែន​តែ​ប្រវែង​៩០គ.ម.​ប៉ុណ្ណោះ គឺ​តិច​ជាង​ប្រាក់​ចំនួន​៥,៧០០​លាន​ដុល្លារ​ដែល​លោក​ចង់​បាន។​

ក៏​ប៉ុន្តែ​ការ​ប្រកាស​ស្ថានភាព​ជាតិ​មាន​អាសន្នផ្តល់​អំណាច​ឱ្យ​លោក ត្រាំ​ ក្នុងការ​ផ្ទេរ​ប្រាក់​ពី​កន្លែង​ឯទៀត​ក្នុងថវិកា​សហព័ន្ធ​ហើយ​ប្រើប្រាស់​ទឹក​ប្រាក់នេះ​សម្រាប់​កសាង​ជញ្ជាំង​ព្រំដែន។

ប្រសិន​បើ​លោក​ប្រធានាធិបតី​ប្រកាស​ស្ថានភាព​ជាតិ​មាន​អាសន្ន ពួក​ប្រជា​ធិបតេយ្យ​និង​ជន​ឯទៀតៗ​ប្រាកដ​ជា​នឹង​ដាក់​បណ្តឹង​ក្នុង​តុលាការ​ប្រឆាំង​នឹង​លោក—ដែល​ជា​ចំណាត់​ការ​មួយ​អាច​ពន្យារ​ពេល​ការ​ស្ថាបនា​ពិត​ប្រាកដ​ជា​ច្រើន​ឆ្នាំ។

លោក​ស្រី​ Nancy Pelosi ​ប្រធាន​សភា​តំណាង​រាស្ត្រអាមេរិកាំង​និង​លោក ​Chuck Schumer ​មេដឹកនាំ​ក្រុម​ប្រជាធិបតេយ្យនៅ​ក្នុង​ព្រឹទ្ធសភា​ស.រ.អា.​បាន​មាន​ប្រសាសន៍​នៅ​ក្នុង​សេចក្តី​ថ្លែងការណ៍​រួម​មួយ​ថា​ «ការ​ប្រកាស​ស្ថានភាព​ជាតិ​មាន​អាសន្ន​អាច​ជា​សកម្មភាព​មួយ​មិន​ត្រឹម​ត្រូវ​តាម​ច្បាប់​ទេ ជា​ការ​រំលោភ​ធ្ងន់​ធ្ងរ​មួយ​ទៅ​លើ​អំណាច​តំណែង​ប្រធានាធិបតីនិង​ជា​ការ​ប៉ុន​ប៉ង​មួយ​ដើម្បី​បង្វែរ​ការ​យក​ចិត្ត​ទុក​ដាក់​ពី​ការ​ពិត​ជាក់​ស្តែង​ដែល​ប្រធានាធិបតី ត្រាំ មិន​បាន​ធ្វើ​តាម​ការ​សន្យា​របស់​លោក​ដែល​ថា​ឱ្យ​ប្រទេស​ម៉ិកស៊ិក​ បង់​ប្រាក់​សម្រាប់​ការ​ស្ថាបនា​ជញ្ជាំង​របស់​លោក​នេះ»។

លោក​ស្រី​ Pelosi ​និងលោក​ Schumer ​មាន​ប្រសាសន៍​ថា​ ជញ្ជាំង​ព្រំដែន​គ្មាន​ប្រសិទ្ធិ​ភាព​ប្រឆាំង​នឹង​អន្តោប្រវេសន៍​ខុស​ច្បាប់​ទេ​ ហើយ​អស់​ប្រាក់ច្រើន​ថែម​ទៀត​ផង។​ ពួក​ប្រជាធិបតេយ្យ​ច្រើន​នាក់​និយាយ​ថា​ គ្មាន​ស្ថានភាព​អាសន្ន​នៅ​តាម​ព្រំដែន​ទេ​ដោយ​ពួក​គេ​បាន​ចោទ​ប្រកាន់​លោក ត្រាំ​ ថា​ប្រឌិត​រឿង​នេះ។

សម្ព័ន្ធមិត្ត​សាធារណរដ្ឋ​ខ្លះ​របស់​លោក ត្រាំ​ នៅ​ក្នុង​សភា​ស.រ.អា.​ក៏​មាន​ពិភាល់​ដែរ​អំពី​ការ​ប្រកា​សស្ថានភាព​មាន​អាសន្ន​នេះ​ដែរ៕

XS
SM
MD
LG