លោក ដូណាល់ ត្រាំ ប្រធានាធិបតីស.រ.អា.បានប្រកាសកាលពីថ្ងៃសៅរ៍ថា លោកនឹងអនុញ្ញាតឲ្យបញ្ចេញឯកសារសម្ងាត់ ដែលប្រហែលជាអាចផ្តល់ព័ត៌មានថែមទៀតអំពីឃាតកម្មលោកអតីតប្រធានាធិបតី John F. Kennedy កាលពីឆ្នាំ១៩៦៣។
លោកប្រធានាធិបតី ត្រាំ បានថ្លែងតាម Twitter ថា ដើម្បីបានព័ត៌មានបន្ថែមទៀត និងក្នុងនាមលោកជាប្រធានាធិបតី លោកនឹងអនុញ្ញាតឲ្យបើកចំហឯកសារអំពីលោក John F. Kennedy ដែលគេរក្សាជាការណ៍សម្ងាត់យូរមកហើយនោះ។
ឯកសារសម្ងាត់ចុងក្រោយត្រូវបញ្ចេញជាសាធារណៈនៅថ្ងៃទី២៦ ខែតុលា ប្រសិនបើលោកប្រធានាធិបតីមិនធ្វើអន្តរាគមន៍មុនថ្ងៃដែលកំណត់ដោយច្បាប់ឈ្មោះគឺច្បាប់ឆ្នាំ១៩៩២ស្តីពីឯកសារឃាតកម្មសម្លាប់លោកអតីតប្រធានាធិបតី Kennedy (1992 Kennedy Assassination Records Collection Act)។
ច្បាប់អនុញ្ញាតឲ្យបញ្ចេញឯកសារឃាតកម្មនេះទាំងអស់ក្នុងពេល២៥ឆ្នាំ ប្រសិនបើប្រធានាធិបតីសម្រេចថា ការបញ្ចេញឯកសារនោះមិនធ្វើឲ្យខូចទំនាក់ទំនងការបរទេស ប្រតិបត្តិការយោធា ការសម្ងាត់ ឬការពង្រឹងច្បាប់ទេនោះ។ ឯកសារជាង៣០០០សន្លឹកត្រូវបានបញ្ចេញឲ្យសាធារណជនបានឃើញ ហើយ៣ម៉ឺនសន្លឹកទៀតបានបញ្ចេញកាលពីមុន ដោយមានការកែប្រែ។
អ្នកសិក្សាអំពីលោក Kennedy ជាច្រើនជឿថា ឯកសារនេះនឹងផ្តល់ព័ត៌មានលម្អិតអំពីការធ្វើដំណើររបស់ Lee Harvey Oswald ទៅទីក្រុង Mexico មុនគាត់បាញ់សម្លាប់លោក Kennedy ហើយឯកសារក៏និយាយអំពី Oswald ទៅស្ថានទូតគុយបានិងទៅសហភាពសូវៀតផងដែរ៕
