ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ប្រធានាធិបតី​សហរដ្ឋអាមេរិក​លោក Trump បាន​ទៅ​សម្រាក​ព្យាបាល​ជំងឺកូវីដ១៩​នៅ​មន្ទីរពេទ្យ​យោធា


ប្រធានាធិបតីសហរដ្ឋអាមេរិកលោក Donald Trump លើកដៃដាក់អ្នកសារព័ត៌មាន ខណៈលោកត្រៀមធ្វើដំណើរចាកចេញពីសេតវិមាន ទៅកាន់មន្ទីរពេទ្យយោធាជាតិ Walter Reed បន្ទាប់ពីលោកបានធ្វើតេស្តរកឃើញថា បានឆ្លងជំងឺកូវីដ១៩ នៅរដ្ឋធានីវ៉ាស៊ីនតោន ថ្ងៃសុក្រ ទី២ ខែតុលា ឆ្នាំ២០២០។
ប្រធានាធិបតីសហរដ្ឋអាមេរិកលោក Donald Trump លើកដៃដាក់អ្នកសារព័ត៌មាន ខណៈលោកត្រៀមធ្វើដំណើរចាកចេញពីសេតវិមាន ទៅកាន់មន្ទីរពេទ្យយោធាជាតិ Walter Reed បន្ទាប់ពីលោកបានធ្វើតេស្តរកឃើញថា បានឆ្លងជំងឺកូវីដ១៩ នៅរដ្ឋធានីវ៉ាស៊ីនតោន ថ្ងៃសុក្រ ទី២ ខែតុលា ឆ្នាំ២០២០។

នៅ​ល្ងាច​ថ្ងៃ​សុក្រ​នេះ ប្រធានាធិបតី​សហរដ្ឋ​អាមេរិក​លោក Donald Trump បានទៅដល់មន្ទីរ​ពេទ្យ​យោធា​ជាតិ Walter Reed ដើម្បីសម្រាកព្យាបាលជំងឺកូវីដ១៩ រយៈពេល «ពីរបីថ្ងៃ» ដែលជាវិធានការការពារ និងតាមការណែនាំរបស់គ្រូពេទ្យនិងក្រុមអ្នកជំនាញវេជ្ជបណ្ឌិត។

លោក​ Trump បាន​បង្ហាញ​ខ្លួន​ជា​លើក​ដំបូង បន្ទាប់​ពី​លោក​បាន​ធ្វើ​តេស្ត​រក​ឃើញ​ថា បាន​ឆ្លង​វីរុស​កូរ៉ូណា​ដែល​បង្ក​ជា​ជំងឺ​កូវីដ១៩ ដោយ​លោក​បាន​ឡើង​ឧទ្ធម្ភាគចក្រ Marine One ចាកចេញ​ពី​សេតវិមាន ឆ្ពោះទៅ​កាន់​មន្ទីរ​ពេទ្យ​យោធា​ជាតិ Walter Reed ខណៈ​នៅសហរដ្ឋអាមេរិកជំងឺកូវីដ១៩នេះ បានសម្លាប់មនុស្សជាង ២០៥.០០០នាក់។

លោក​ប្រធានាធិបតី Trump បាន​ដើរ​ចេញ​ពី​សេតវិមាន ហើយ​បាន​លើក​មេដៃ​ឡើង​លើ (ដែល​បង្ហាញ​ស្មារតី​ល្អ) ប៉ុន្តែ​លោក​មិន​បាន​និយាយ​អ្វី​នោះ​ទេ។ ក្រុម​អាកាសយានិក ទីភ្នាក់ងារ​ការពារ​ប្រធានាធិបតី និង​បុគ្គលិក​សេតវិមាន បាន​ពាក់​ម៉ាស់​ដើម្បី​ការពារ​ពី​ការ​ឆ្លង​ជំងឺ​កូវីដ១៩ ខណៈ​លោក​ប្រធានាធិបតី Trump ឡើង​ឧទ្ធម្ភាគចក្រ។

នៅក្នុងវីដេអូដែលត្រូវបានបង្ហោះនៅលើបណ្តាញសង្គម Twitter លោកប្រធានាធិបតី Trump បានថ្លែងអរគុណដល់សារនានាដែលបានផ្ញើជូនពរដល់លោក និងភរិយាគឺលោកស្រី Melania Trump។

លោកក៏បានថ្លែងបន្ថែមថា៖ «ខ្ញុំយល់ថា ខ្ញុំមានសុខភាពល្អ ប៉ុន្តែយើងនឹងធ្វើកិច្ចការចាំបាច់ ដើម្បីឲ្យបានរើបពីជំងឺនេះ»។

មន្ត្រី​សេតវិមាន ឲ្យ​ដឹង​ថា ការ​សម្រាក​ព្យាបាល​នៅ​មន្ទីរ​ពេទ្យ​របស់​លោក​ប្រធានាធិបតី​រយៈពេល​«ពីរបី​ថ្ងៃ» នេះ គឺជា​វិធានការ​ការពារ​ ហើយ​ថា លោក​ប្រធានាធិបតី នឹង​ធ្វើកិច្ចការ​របស់​លោក​ពី​បន្ទប់​សម្រាក​របស់​លោក នៅ​ក្នុង​មន្ទីរពេទ្យ​នេះ​ដែល​មាន​បំពាក់​ទៅ​ដោយ​សម្ភារៈ​គ្រប់បែបយ៉ាង​ ដែល​អនុញ្ញាត​ឲ្យ​លោក​បំពេញ​កាតព្វកិច្ច​ផ្លូវការ​របស់​លោក​បាន។

អ្នកនាំ​ពាក្យ​សេតវិមាន​អ្នកស្រី Kayleigh McEnany បាន​ថ្លែង​ថា៖ «លោក​ប្រធានាធិបតី Trump នៅ​តែ​មាន​ស្មារតី​ល្អ មាន​រោគសញ្ញា​ស្រាល និង​កំពុង​ធ្វើ​កិច្ចការ​របស់​លោក​ពេញ​មួយ​ថ្ងៃ»។

អ្នកនាំ​ពាក្យ​រូបនេះ​បាន​បន្ថែម​ទៀត​ថា៖ «ជា​វិធានការ​ការពារ​និង​ជា​ការ​ណែនាំ​ពី​គ្រូពេទ្យ​និង​អ្នក​ជំនាញ​វេជ្ជសាស្ត្រ​លោក​ប្រធានាធិបតី នឹង​ធ្វើការ​ពី​ការិយាល័យ​របស់​លោក ដែល​ស្ថិត​ក្នុង​មន្ទីរពេទ្យ​យោធា​ជាតិ Walter Reed រយៈពេល​ពីរបី​ថ្ងៃ»។

នៅ​ថ្ងៃ​សុក្រ​នេះ មន្ត្រី​សេតវិមាន ក៏​បាន​ឲ្យ​ដឹង​ថា លោក Trump ត្រូវបាន​ចាក់​ថ្នាំ​ដែល​ផ្សំ​ឡើង​ពី​សារធាតុអង់ទីករ​បែប​ពិសោធន៍​មួយ ដោយ​គ្រូពេទ្យ​ប្រចាំ​សេតវិមាន។

ក្នុង​រយៈពេល​ជាង​មួយ​ខែ​មុន​ពេល​ការ​បោះឆ្នោត​ប្រធានាធិបតី​អាមេរិក​មក​ដល់ ការ​ឆ្លង​ជំងឺ​កូវីដ​១៩ របស់​លោក​ Trump ត្រូវ​បាន​ផ្សព្វផ្សាយ​ជា​សាធារណៈ​តាម​សារ​លើ​បណ្តាញ​ Twitter របស់​លោក បន្ទាប់​ពី​លោក​បាន​ត្រឡប់​ពី​ចូលរួម​កម្មវិធី​រៃអង្គាស​ថវិកា​សម្រាប់​សកម្មភាព​នយោបាយ​ កាលពី​រសៀល​ថ្ងៃ​ព្រហស្បតិ៍ ទី១ ខែ​តុលា៕

XS
SM
MD
LG