ប្រធានាធិបតីសហរដ្ឋអាមេរិកលោក Donald Trump និយាយថា លោកនិងលោកស្រី Melania Trump ដែលជាភរិយារបស់លោកបានធ្វើតេស្តឃើញវិជ្ជមានថាមានវីរុសកូរ៉ូណាដែលបង្កជំងឺកូវីដ១៩។។
ក្នុងសាររបស់លោកបញ្ជូនសារតាម Twitter នាពេលរំលងអធ្រាត្រឆ្លងចូលព្រឹកថ្ងៃសុក្រម៉ោង ១២:៥៤នាទី ម៉ោងនៅសហរដ្ឋអាមេរិកភាគខាងកើត លោក Trump បានសរសេរក្នុងន័យដើមថា៖ «យប់នេះ ភរិយាខ្ញុំនិងខ្ញុំ បានធ្វើតេស្តឃើញវិជ្ជមានថាមានកូវីដ១៩ ។ យើងនឹងចាប់ផ្តើមស្ថិតនៅដាច់ឆ្ងាយពីគេ (ធ្វើចត្តាឡីស័ក) និងធ្វើការព្យាបាលឲ្យបានជាសះស្បើយជាបន្ទាន់។ យើងនឹងឆ្លងផុតស្ថានភាពនេះជាមួយគ្នា» ។
ប្រហែល ១១ នាទីក្រោយការបង្ហោះសារនេះ សេតវិមានបានចេញកំណត់ហេតុមួយពីលោក Sean Conley ដែលជាវេជ្ជបណ្ឌិតរបស់លោកប្រធានាធិបតី ដោយលោកបានបញ្ជាក់ថាលោកប្រធានាធិបតីនិងភរិយារបស់លោក បានធ្វើតេស្តវិជ្ជមានមានជំងឺកូវីដ១៩។
លោកវេជ្ជបណ្ឌិត Conley បានថ្លែងក្នុងសេចក្តីប្រកាសនោះក្នុងន័យដើមថា៖ «លោកប្រធានាធិបតី និងភរិយា ស្ថិតក្នុងស្ថានភាពសុខភាពល្អនាពេលនេះ ហើយអ្នកទាំងពីរគ្រោងនឹងស្ថិតក្នុងវិមានប្រធានាធិបតីដែលស្ថិតក្នុងសេតវិមាន ក្នុងអំឡុងពេលសម្រាកព្យាបាលជំងឺ»។
លោកវេជ្ជបណ្ឌិតរូបនេះបានបន្ថែមថា លោករំពឹងថា លោកប្រធានាធិបតី Trump «នឹងបន្តកាតព្វកិច្ចរបស់លោកដោយគ្មានការរំខាន ខណៈពេលកំពុងសម្រាកព្យាបាល ហើយខ្ញុំនឹងផ្តល់ព័ត៌មានថ្មីៗដល់អ្នកគ្រប់គ្នានាពេលខាងមុខនេះ»។
លោកវេជ្ជបណ្ឌិត Conley បាននិយាយថា៖ «លោកប្រធានាធិបតីនិងភរិយារបស់លោក មានសុខភាពល្អនៅពេលនេះ ហើយអ្នកទាំងពីរ មានគម្រោងស្ថិតនៅគេហដ្ឋានក្នុងសេតវិមានក្នុងអំឡុងពេលនៃការព្យាបាលនេះ»។
ក្នុងសេចក្តីថ្លែងការណ៍លោក Sean Conley វេជ្ជបណ្ឌិតប្រចាំសេតវិមាននិយាយថា លោករំពឹងថា លោកប្រធានាធិបតីនឹងអាចបំពេញការងាររបស់លោកដោយមិនមានការបង្អាក់ ។
នៅក្នុងសារធ្វីតធឺដាច់ដោយឡែកមួយ លោកស្រី Melania Trump បានថ្លែងក្នុងសម្តីដើមថា៖ «ស្របពេលដែលពលរដ្ឋអាមេរិកាំងជាច្រើននាក់បានឆ្លងកាត់ការធ្វើដូច្នេះក្នុងឆ្នាំនេះ ខ្ញុំនិងលោកប្រធានាធិបតី កំពុងរក្សាខ្លួនឲ្យនៅដាច់ដោយឡែកពីអ្នកដទៃនៅវិមានប្រធានាធិបតី បន្ទាប់ពីបានធ្វើតេស្តរកឃើញថា បានឆ្លងជំងឺកូវីដ១៩។ យើងមានសុខភាពល្អធម្មតា ហើយខ្ញុំបានពន្យារពេលរាល់សកម្មភាពរបស់ខ្ញុំដែលបានគ្រោងទុកពីមុន។ សូមថែរក្សាខ្លួនអ្នកឲ្យមានសុវត្តិភាព ហើយយើងនឹងឆ្លងផុតផលលំបាកពីជំងឺនេះជាមួយគ្នា»។
ការប្រកាសនេះបានកើតមានឡើង ប៉ុន្មានម៉ោងបន្ទាប់ពីមានសេចក្តីរាយការណ៍ថា អ្នកស្រី Hope Hicks អ្នកជំនួយការរបស់សេតវិមានបានធ្វើតេស្តមានវីរុសកូរ៉ូណាដែលបង្កជំងឺកូវីដ១៩ ដែលបានផ្តាច់ផ្តិលជីវិតមនុស្សជាង ២ សែននាក់ នៅក្នុងសហរដ្ឋអាមេរិក។
មន្ត្រីសេតវិមានម្នាក់បាននិយាយថា «យុទ្ធនាការឃោសនាបោះឆ្នោតទាំងអស់របស់លោកប្រធានាធិបតី Trump បានត្រូវបញ្ជាឲ្យលុបចោលទាំងអស់»។
ព័ត៌មាននេះបានធ្វើឲ្យទីផ្សារភាគហ៊ុនសហរដ្ឋអាមេរិកដាំក្បាលចុះភ្លាមៗ និងធ្វើឲ្យមានការផ្អាកយុទ្ធនាការឃោសនាបោះឆ្នោតរបស់លោក Trump តែប្រមាណមួយខែប៉ុណ្ណោះ មុនការបោះឆ្នោតទល់នឹងលោកអតីតអនុប្រធានាធិបតី Joe Biden ដែលកំពុងនាំមុខក្នុងការស្ទង់មតិ៕
