ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ផ្សារហ៊ុន​ពិភពលោក​ធ្លាក់​ចុះ ខណៈ​ប្រធានាធិបតី​អាមេរិក​និង​ភរិយា​ឆ្លង​ជំងឺកូវីដ១៩


ស្ត្រីម្នាក់ដើរកាត់អេក្រង់បង្ហាញទិន្នន័យផ្សារហ៊ុន Nikkei 225 របស់ប្រទេសជប៉ុន នៅទីក្រុងតូក្យូ ប្រទេសជប៉ុន ថ្ងៃទី២ ខែតុលា ឆ្នាំ២០២០ ខណៈផ្សារហ៊ុនអាមេរិកនិងអាស៊ីបានធ្លាក់ចុះ ក្រោយលោកប្រធានាធិបតី Trump និងភរិយាបានឆ្លងជំងឺកូវីដ១៩។
ស្ត្រីម្នាក់ដើរកាត់អេក្រង់បង្ហាញទិន្នន័យផ្សារហ៊ុន Nikkei 225 របស់ប្រទេសជប៉ុន នៅទីក្រុងតូក្យូ ប្រទេសជប៉ុន ថ្ងៃទី២ ខែតុលា ឆ្នាំ២០២០ ខណៈផ្សារហ៊ុនអាមេរិកនិងអាស៊ីបានធ្លាក់ចុះ ក្រោយលោកប្រធានាធិបតី Trump និងភរិយាបានឆ្លងជំងឺកូវីដ១៩។

ប្រធានាធិបតី​សហរដ្ឋ​អាមេរិក​លោក Donald Trump បាន​ប្រកាស​ថា លោក​និង​លោកស្រី Melania ដែល​ជាភរិយា​របស់​លោក ​បាន​ធ្វើ​តេស្ត​វិជ្ជមាន​ថា ​បាន​ឆ្លង​វីរុស​កូរ៉ូណាដែលបង្កជាជំងឺរលាកផ្លូវដង្ហើមកូវីដ១៩។

គេ​មិន​ទាន់​ដឹង​ច្បាស់​ភ្លាមៗ​នៅឡើយទេ​ថា ​តើអ្នក​ទាំង​ពីរ​កំពុង​មាន​រោគសញ្ញា​អ្វី​នៅ​ឡើយ​ ទាក់ទិន​នឹង​ជំងឺ​កូវីដ១៩ ​ដែល​ជាជំងឺ​បណ្តាល​មកពី​វីរុស​កូរ៉ូណា​នេះ។​

លោក​ប្រធានាធិបតី​ Trump ដែល​មាន​អាយុ​ ៧៤ ​ឆ្នាំ ត្រូវ​បាន​គេ​ចាត់ទុក​ថា ​ស្ថិត​ក្នុងក្រុមអ្នកជំងឺដែលងាយ​គ្រោះថ្នាក់ខ្លាំង​សម្រាប់​ជំងឺ​កូវីដ១៩ ពីព្រោះតែ​អាយុ​និង​ទម្ងន់​របស់​លោក។

ការប្រកាន់ខ្ជាប់​ទៅនឹង​ពិធីការ​ចត្តាឡីស័ក ​ឬ​ស្ថិត​នៅ​ដាច់​ដោយ​ឡែក​ពីអ្នកដទៃ ​នឹង​រារាំង​លោក​មិន​ឲ្យ​ធ្វើ​ដំណើរ​រយៈពេល​ ២ សប្តាហ៍​ ដែល​រយៈ​ពេល​នេះនឹងហួស​ថ្ងៃ​កំណត់ ដែល​លោក​ត្រូវ​ជជែក​ដេញ​ដោល​ជា​លើកទី ២ ជាមួយ​នឹង​លោក ​Joe Biden ដែល​ជាគូ​ប្រជែង​ខាង​គណបក្ស​ប្រជាធិបតេយ្យ​ នៅ​ថ្ងៃ​ទី១៥ ខែ​តុលា ខាងមុខ​នេះ។ ថ្ងៃ​បោះឆ្នោតថ្នាក់ជាតិ​នៅ​សហរដ្ឋអាមេរិក​ នឹងធ្វើឡើងនៅ​ថ្ងៃ​ទី៣ ខែវិច្ឆិកា។​

លោក​ប្រធានាធិបតី Trump និង​ភរិយា​របស់​លោក បានក្លាយជាអ្នកឆ្លងជំងឺកូវីដ១៩ ក្នុងចំណោមមនុស្ស​ជាង៧ លាន​ ២ សែន​នាក់ទៀត​នៅ​ក្នុង​សហរដ្ឋ​អាមេរិក​ ដែល​បាន​ឆ្លង​ជំងឺនេះ។ ជំងឺ​កូវីដ១៩ បាន​សម្លាប់​មនុស្ស​ជាង​ ២ សែន​នាក់ ​នៅ​ក្នុង​សហរដ្ឋ​អាមេរិក។

នៅ​ជុំវិញ​ពិភពលោក មនុស្សជាង​ ៣៤ លាន​នាក់បានឆ្លងជំងឺ​កូវីដ​១៩ និងជាង ​១ លាន​នាក់​បាន​ស្លាប់​ដោយសារ​ជំងឺ​នេះ។ នេះ​តាម​សាកល​វិទ្យាល័យ​ Johns Hopkins របស់​សហរដ្ឋ​អាមេរិក ។

លោក​ប្រធានាធិបតី​បាន​ប្រកាស​តាម​បណ្តាញ Twitter កាលពី​ម៉ោងជិត​ ១ ព្រឹក​ថ្ងៃសុក្រថា លោក​និង​ភរិយា​របស់​លោក​ បាន​ធ្វើ​តេស្តវិជ្ជមាន​ថា ​បានឆ្លង​ជំងឺ​កូវីដ​១៩។

រូបឯកសារ៖ ប្រធានាធិបតីសហរដ្ឋអាមេរិកលោក Donald Trump និងភរិយាគឺលោកស្រី Melania Trump បានធ្វើដំណើរទៅដល់អាកាសយានដ្ឋានអន្តរជាតិ Cleveland Hopkins នៅទីក្រុង Cleveland រដ្ឋ Ohio កាលពីថ្ងៃទី២៩ ខែកញ្ញា ឆ្នាំ២០២០។
រូបឯកសារ៖ ប្រធានាធិបតីសហរដ្ឋអាមេរិកលោក Donald Trump និងភរិយាគឺលោកស្រី Melania Trump បានធ្វើដំណើរទៅដល់អាកាសយានដ្ឋានអន្តរជាតិ Cleveland Hopkins នៅទីក្រុង Cleveland រដ្ឋ Ohio កាលពីថ្ងៃទី២៩ ខែកញ្ញា ឆ្នាំ២០២០។

បន្ទាប់ពីការ​ប្រកាស​នេះ លោក​អនុប្រធានាធិបតី​ Mike Pence បាន​បង្ហោះ​សារ​តាម Twitter ថា៖ «លោកស្រី Karen ដែលជា​ភរិយារបស់​ខ្ញុំ​និង​ខ្ញុំ សូម​ផ្ញើ​នូវក្តី​ស្រឡាញ់​និង​ការ​បន់ស្រន់​ដល់​លោក​ប្រធានាធិបតី Donald Trump និង​លោកស្រី Melania Trump ដែល​ជាមិត្តភក្តិជាទី​ស្រឡាញ់​របស់​យើង»។

គេនៅ​មិនទាន់​ដឹង​ពិតប្រាកដ​នៅឡើយ​ថា តើ​លទ្ធផល​តេស្តនឹង​ប៉ះពាល់​សកម្មភាព​យុទ្ធនាការ​ឃោសនា​បោះឆ្នោត​របស់​លោក​ប្រធានាធិបតី​ដែរ​ឬទេ។ សម្រាប់​ពេល​នេះ លោក​ប្រធានាធិបតី Trump នឹង​មិន​ធ្វើ​ដំណើរ​ទៅ​ចូលរួម​យុទ្ធនាការ​ឃោសនា​បោះឆ្នោត​ ឬ​ពិធី​រៃអង្គាស​ថវិកា​ទៀត​ទេ។​

រដ្ឋ​មន្ត្រី​ការបរទេស​សហរដ្ឋ​អាមេរិក​លោក Mike Pomepo បាន​បញ្ជាក់​ប្រាប់​ក្រុម​អ្នក​យកព័ត៌មាន​ឡើង​វិញ ​ដែល​បាន​ធ្វើ​ដំណើរ​ជាមួយ​លោក ​កាលពី​ថ្ងៃ​សុក្រ​ម្សិលមិញ​ទៅកាន់​ប្រទេស​ក្រូអាស៊ី​ថា លោក​មាន​សុខភាព​ល្អ ហើយ​មិន​មាន​ជំងឺ​កូវីដ​១៩​ទេ ដោយ​លោក​និយាយ​ទៀត​ថា លោក​បាន​ធ្វើតេស្ត​ជាប្រចាំ។

លោក​រដ្ឋមន្ត្រី​ការបរទេស ​Pompeo បាន​និយាយ​ទៀតថា៖ «យើង​កំពុង​បន់ស្រន់​ឲ្យ​លោក​ប្រធានាធិបតី​និង​លោកស្រី​ភរិយា​របស់​លោក​ បាន​ជា​សះស្បើយឡើង​វិញ​ឲ្យ​បាន​ឆាប់​រហ័ស»។

ផ្សារ​ភាគហ៊ុន​សាកល​លោក​បាន​ធ្លាក់​ចុះ​ ក្រោយមាន​ព័ត៌មាន​ថា​លោក Trump បាន​ឆ្លង​វីរុស​កូរ៉ូណា។

លោក Naoya Oshikubo សេដ្ឋវិទូ​ជាន់​ខ្ពស់​នៅ​ក្រុមហ៊ុន Sumitomo Mitsui Trust Asset Managment ក្នុង​ទីក្រុង​តូក្យូ បាន​ប្រាប់​ទីភ្នាក់ងារ​ព័ត៌មាន Reuters ថា លោក​មាន​ការ​ព្រួយបារម្ភថា លោក Trump នឹង​មាន​ភាព​គគ្លើន​កាន់តែ​ខ្លាំង​ឡើងប្រឆាំង​នឹង​ចិន​ បន្ទាប់ពីការឆ្លង​វីរុស​នោះ​មក។​

លោក Oshikubo បាន​និយាយ​ទៀត​ថា «ខ្ញុំ​ចាប់​អារម្មណ៍​ថា នាយករដ្ឋមន្ត្រី​ចក្រភព​អង់គ្លេស​លោក Boris Johnsons បាន​ប្រឆាំង​ចិន​កាន់តែ​ខ្លាំង​ឡើង​ បន្ទាប់ពី​លោក​មាន​ជំងឺ​កូវីដ​១៩»។ វីរុស​កូរ៉ូណា​បាន​លេចចេញ​មុន​ដំបូង​គេ​ នៅ​ក្នុង​ប្រទេស​ចិន ​កាលពី​ចុង​ឆ្នាំ​២០១៩​។

លោក​នាយក​រដ្ឋមន្ត្រី Johnson បាន​ជា​សះស្បើយ​ពី​ជំងឺ​កូវីដ​១៩​ កាលពី​ប៉ុន្មាន​ខែ​មុន។​

លោក Joaquin Castro សមាជិក​សភា​ខាងគណបក្ស​ប្រជា​ធិបតេយ្យ​នៅ​ក្នុង​រដ្ឋ​តិចសាស បាន​សម្តែង​នូវការ​ព្រួយ​កង្វល់​តាម​សារ ​Twitter ថា៖ «វា​មិន​មែន​គ្រាន់តែ​ជា​បញ្ហា​សុខភាព​ផ្ទាល់​ខ្លួន​របស់​លោក​ប្រធានាធិបតី​ទេ វា​ជា​បញ្ហា​សន្តិសុខ​ជាតិ។ វីរុស​នេះ​បាន​ឆក់​យក​ជីវិត​មនុស្ស​ជាង​ ២ ​សែន​នាក់​នៅ​ក្នុង​សហរដ្ឋ​អាមេរិក ​ក្នុង​រយៈពេល ​៦ ​ខែ​កន្លង​មក​នេះ»។

នាយក​រដ្ឋមន្ត្រី​ឥណ្ឌា​លោក Narendra Modi ស្ថិត​នៅ​ក្នុង​ចំណោម​មេដឹកនាំ​បរទេស​មុនដំបូង ​ដែល​ជូន​ពរ​ដល់​លោក​ ត្រាំ​ និង​ភរិយា​របស់​លោកឲ្យ​ឆាប់​ជា។ លោក Modi បាន​សរសេរ​នៅ​លើ​បណ្តាញ Twitter ថា៖ «សូម​ជូនពរ​ឲ្យ​មិត្តិភក្តិរបស់​ខ្ញុំ​គឺ​ប្រធានាធិបតី Donald Trump និង​លោក​ស្រី​ Melania បាន​ជា​សះស្បើយ​ឆាប់​រហ័ស និង​មាន​សុខភាព​ល្អ» ។​

សារ​នោះត្រូវ​បាន​បន្ទរ​ឡើង​ ដោយដោយ​អ្នក​រិះគន់​ដ៏​ខ្លាំង​ខ្លះ​របស់​លោក​ប្រធានា​ធិបតី​ដែរ ។

លោក Jesse Jackson មេដឹកនាំ​សិទ្ធិ​ស៊ីវិល​អាមេរិកាំង ​បាន​និយាយ​នៅ​លើ​បណ្តាញTwitter ថា៖ «យើងសូម​បន់ស្រន់​ដោយ​ស្មោះស្ម័គ្រ​ឲ្យ​លោក​ប្រធានាធិបតី​និង​លោកស្រី Melania មិនមាន​ជំងឺ​ដ៏​អាក្រក់​បំផុត​នេះ។ យើងសូម​បួងសួង​ឲ្យ​លោក​ប្រធានាធិបតី​និង​ភរិយា​របស់​លោក ​ឆាប់​ជា​សះស្បើយ។ យើង​សូម​បន់ស្រន់​ដល់​មនុស្ស​រាប់លាន​នាក់​ទៀត ​ដែល​រង​ផល​ប៉ះពាល់​ដោយជំងឺ​នេះ​ទោះបីមាន​ជំនឿ​និង​នយោបាយ​អ្វី​ក៏ដោយ»៕

ប្រែសម្រួល​ដោយ​ជឹង ប៉ូជីន

XS
SM
MD
LG