ការស្ទង់មតិនយោបាយនៅសហរដ្ឋអាមេរិក បានបង្ហាញច្រើនឡើងៗថា ពលរដ្ឋអាមេរិកាំងមិនពេញចិត្តនឹងការបំពេញការងាររបស់លោកប្រធានាធិបតី Donald Trump ទេ ហើយថា លោកចាញ់លោកអតីតអនុប្រធានាធិបតី Joe Biden គូប្រជែងរបស់លោក នៅក្នុងការប្រឹងប្រែងរបស់លោកដើម្បីឱ្យបានកាន់តំណែងបួនឆ្នាំមួយអាណត្តិទៀត នៅក្នុងសេតវិមាន។
នៅក្នុងការស្ទង់មតិថ្មីៗបំផុតមួយ កាលពីថ្ងៃចន្ទ ទី៨ ខែមិថុនា បណ្តាញទូរទស្សន៍ CNN បាននិយាយថា ក្រុមអ្នកបោះឆ្នោតអាមេរិកាំងដែល CNN បានស្ទង់មតិកាលពីសប្តាហ៍ទីមួយនៃខែមិថុនា បង្ហាញការមិនយល់ស្របនឹងការណ៍ដែលលោក Trump ចាត់ចែងការងារក្នុងតំណែងជាប្រធានាធិបតីដោយមានសំឡេង ៥៧ ភាគរយទល់នឹង ៣៨ ភាគរយ ហើយថា លោកចាញ់លោក Biden ដោយមានសំឡេង ៥៥ ភាគរយទល់នឹង ៤១ ភាគរយ ក្នុងពេល ៥ ខែ មុនការបោះឆ្នោតប្រធានាធិបតី នៅថ្ងៃទី៣ខែវិច្ឆិកា។
នៅក្នុង tweet មួយ ដែលឆ្លើយតបនឹងការស្ទង់មតិដោយ CNN នេះ លោក Trump បានចំអកថា ការស្ទង់មតិនេះ «ក្លែងក្លាយដូចការរាយការណ៍របស់ CNN» ដែរ។ លោក Trump បាននិយាយថា លោកមាន «សំឡេងគាំទ្រដដែល ហើយអាក្រក់ជាងនេះផងពេលប្រកួតប្រជែងនឹងលោកស្រី Hillary ដែលជាមនុស្សទុច្ចរិត» ដែលជាការហៅឈ្មោះបែបចំអកមើលងាយដល់លោកស្រីអតីតរដ្ឋមន្ត្រីការបរទេសអាមេរិក ដែលបានចាញ់លោកក្នុងការបោះឆ្នោតប្រធានាធិបតី កាលពីឆ្នាំ ២០១៦។
ជាញឹកញយលោក Trump បានអួតអំពីការគាំទ្រលោកក្នុងចំណោមអ្នកបោះឆ្នោតខាងគណបក្សសាធារណរដ្ឋ ក៏ប៉ុន្តែការស្ទង់មតិបង្ហាញថា ក្រុមប្រជាធិបតេយ្យក៏បានជំទាស់ដែ រនឹងតំណែងប្រធានាធិបតីរបស់លោក។ នៅពេលជាមួយគ្នានេះ ការស្ទង់មតិដោយ CNN បានបង្ហាញថា ក្រុមអ្នកបោះឆ្នោតឯករាជ្យគាំទ្រឱ្យលោក Biden កាន់តំណែងប្រធានាធិបតី ហើយមានតែ ៤១ ភាគរយទេដែលគាំទ្រលោក Trump។
អត្រាគាំទ្រលោក Trump កម្រិតទាបនេះកើតមានឡើង នៅពេលក្រុមអ្នកបោះឆ្នោតវាយតម្លៃចំណាត់ការរបស់លោកទាក់ទងនឹងការរាតត្បាតជាសាកលនៃជំងឺកូវីដ១៩ ក្នុងពេលបីខែមកនេះ និងចំណាត់ការរបស់លោកកាលពីពេលថ្មីៗបំផុតនេះ ទាក់ទងនឹងបាតុកម្មនៅទូទាំងប្រទេស កាលពីពីរសប្តាហ៍មុននេះ ប្រឆាំងនឹងការស្លាប់លោក George Floyd ដែលជាបុរសស្បែកខ្មៅស្លាប់នៅក្នុងការឃាត់ខ្លួនដោយប៉ូលិសនៅក្នុងក្រុង Minneapolis រដ្ឋ Minnesota។
CNN បាននិយាយថា អត្រាគាំទ្រលោក Trump បានចុះថយ ៧% កាលពីខែមុន គឺធ្លាក់ដល់កម្រិតទាបបំផុត ចាប់តាំងពីខែមក រាឆ្នាំ ២០១៩ មក។ បណ្តាញទូរទស្សន៍នេះបានថ្លែងថា អត្រាគាំទ្រលោក Trump មានចំនួន ៣៨ ភាគរយ ស្រដៀងគ្នានឹងអត្រាគាំទ្រអតីតប្រធានាធិបតីពីរនាក់ គឺលោក Jimmy Carter កាលពីឆ្នាំ ១៩៨០ និងលោក George H.W. Bush កាលពីឆ្នាំ ១៩៩២ នៅពេលលោកទាំងពីរនាក់បានចាញ់ឆ្នោតនៅអាណត្តិទីពីរ។
ការស្ទង់មតិរបស់ CNN បាននិយាយថា ឥទ្ធិពលបាតុកម្មប្រឆាំងនឹងការស្លាប់របស់លោក Floyd ទៅលើក្រុមអ្នកបោះឆ្នោតអាមេរិកាំងមានច្រើនក្រាស់ក្រែល ដោយពួកគេថ្លែងថា នៅពេលនេះទំនាក់ទំនងខាងពូជសាសន៍នៅក្នុងស.រ.អា. ក៏មានសារៈសំខាន់ដូចបញ្ហានានា នៅក្នុងការឃោសនាបោះឆ្នោតឯទៀតៗដែរ ដូចជាបញ្ហាសេដ្ឋកិច្ចនិងការថែទាំសុខភាពជាដើម។
អ្នកដែលបានត្រូវស្ទង់មតិ បាននិយាយថា ពួកគេយល់ថា លោក Biden អាចដោះស្រាយបញ្ហាទំនាក់ទំនងខាងពូជសាសន៍បានល្អប្រសើរជាងលោក Trump គឺមានសំឡេង ៦៣ ភាគរយទល់នឹង ៣១ ភាគរយ។ ក្នុងការស្ទង់មតិទាក់ទងដំណោះស្រាយខាងពូជសាសន៍ ក្រុមអ្នកបោះឆ្នោតស្បែកខ្មៅគាំទ្រលោក Biden ច្រើនលើសលប់គឺ ៩១ ភាគរយទល់នឹង ៤ ភាគរយ។
លោក Biden ក៏មានសំឡេងគាំទ្រឈ្នះលោក Trump ដែរទាក់ទងនឹងការស្ទង់មតិអំពីចំណាត់ការប្រឆាំងការរាតត្បាតជាសាកលនៃជំងឺកូវីដ១៩ គឺមានសំឡេង ៥៥ ភាគរយទល់នឹង ៤១ ភាគរយ។ ចំណែកឯ ការស្ទង់មតិអំពីការចាត់ចែងសេដ្ឋកិច្ច ក្រុមអ្នកបោះឆ្នោតគាំទ្រលោក Trump ច្រើនជាងគឺមាន ៥១ ភាគរយទល់នឹង៤៦ភាគរយ។
ការស្ទង់មតិជាតិនៅក្នុងសហរដ្ឋអាមេរិកបានបង្ហាញយ៉ាងទៀងទាត់ថា លោក Biden នាំមុខលោក Trump នៅក្នុងការស្ទង់មតិទាំងអស់ចំនួន ៤០ លើក ក្នុងខែឧសភា និងការស្ទង់មតិ៩ទៀត ក្នុងខែមិថុនា គឺរហូតមកដល់ពេលនេះ។
លទ្ធផលការស្ទង់មតិទាំងអស់ចងក្រងដោយគេហទំព័រ Real Clear Politics បង្ហាញថា លោក Biden នាំមុខលោក Trump ៤៩,៩ ភាគរយទល់នឹង ៤២,១ ភាគរយ។ ការប្រមូលផ្តុំលទ្ធផលការស្ទង់មតិកាលពីពេលថ្មីៗបំផុតនេះ ដោយគេហទំព័រនេះបង្ហាញថា ក្រុមអ្នកបោះឆ្នោតមិនពេញចិត្តនឹងតំណែងប្រធានាធិបតីរបស់លោក Trump ដោយមានសំឡេង ៥៤,២ ភាគរយទល់នឹង ៤២,៨ ភាគរយ៕
ប្រែសម្រួលដោយលោកឈឹម សុមេធ
