ប្រធានាធិបតីអាមេរិកលោក ដូណាល់ ត្រាំ បានចុះហត្ថលេខាលើច្បាប់ចំនួនពីរស្តីពីគម្រោងចំណាយថវិកាដែលផ្តល់ថវិកាដល់រដ្ឋាភិបាលសហព័ន្ធរហូតដល់ខែកញ្ញា ដើម្បីបញ្ចៀសការបិទរដ្ឋាភិបាលដែលត្រូវចូលជាធរមាននៅថ្ងៃសុក្រ។
ច្បាប់ចំណាយនេះមានគម្រោងថវិកាសរុបមានចំនួន១៤សែនលានដុល្លារ ហើយរួមបញ្ចូលទាំងការដំឡើងប្រាក់ខែ៣កណ្តក់សញ្ញា១ភាគរយសម្រាប់បុគ្គលិកស៊ីវិលរបស់រដ្ឋាភិបាល។
តាមរយៈការចុះហត្ថលេខាលើច្បាប់ស្តីពីគម្រោងចំណាយថវិកាសម្រាប់គោលនយោបាយការពារជាតិមានទឹកប្រាក់៧៣៨ពាន់លានដុល្លារនោះ លោក ត្រាំ បានអនុញ្ញាតឱ្យបង្កើតកម្លាំងអវកាស និងការការដំឡើងប្រាក់ខែ៣.១ភាគរយសម្រាប់បុគ្គលិកយោធា និងការសម្រាកពេលមានទារកគឺមាតុភាព បិតាភាពរយៈពេល១២សប្តាហ៍ ដោយមានប្រាក់ខែសម្រាប់បុគ្គលិកសហព័ន្ធ។ ច្បាប់ទាំងនោះត្រូវបានចុះហត្ថលេខា បន្ទាប់ពីសមាជិកសភាមកពីគណបក្សសាធារណរដ្ឋនិងគណបក្សប្រជាធិបតេយ្យបានសម្របសម្រួលគ្នាតែប៉ុន្មានថ្ងៃប៉ុណ្ណោះបន្ទាប់ពីសភាដឹកនាំដោយគណបក្សប្រជាធិបតេយ្យបានចោទប្រកាន់លោកប្រធានាធិបតី។
ខណៈគណបក្សសាធារណរដ្ឋបានលើកឡើងថា កញ្ចប់ចំណាយនេះជាជ័យជំនះសម្រាប់យោធាសហរដ្ឋអាមេរិកនោះ ក្រុមអ្នកប្រជាធិបតេយ្យបាននិយាយថា ពួកគេទទួលបានជោគជ័យក្នុងការធានាឲ្យមានថវិកាសម្រាប់ការដំឡើងប្រាក់ខែបុគ្គលិកស៊ីវិលរដ្ឋាភិបាលសហព័ន្ធ សម្រាប់ស្រាវជ្រាវអំពីអំពើហិង្សាកាំភ្លើង សម្រាប់សន្តិសុខការបោះឆ្នោត និងសម្រាប់ការបង្កើនថវិកាដល់ការស្រាវជ្រាវអាកាសធាតុ៕
