នៅពេលដែលការព្រួយកង្វល់នៅមានបន្ តក្នុងចំណោមសម្ព័ន្ធមិត្តរបស់សហរដ្ឋអាមេរិកអំពីការតាំងចិត្តរបស់ប្រធានាធិបតីសហរដ្ឋអាមេរិកដល់ពួកគេ លោកដូណាល់ ត្រាំ កំពុងស្វះស្វែងផ្តល់ការធានាឡើងវិញជាពាក្យសម្តី បន្ទាប់ពីទៅដល់ប្រទេសជប៉ុន ដើម្បីចូលរួមសន្និសីទកំពូលរបស់ប្រទេសមានសេដ្ឋកិច្ចជឿនលឿនទាំង២០ហៅកាត់ថា G20។
ក្នុងអំឡុងនៃជំនួបលើកដំបូងរបស់លោកក្នុងប្រទេសជប៉ុន ក្នុងពិធីពិសាអាហារពេលល្ងាចផងនិងពិភាក្សាគ្នាផងជាមួយលោក Scott Morrison នាយករដ្ឋមន្រ្តីនៃប្រទេសអូស្រ្តាលី ប្រធានាធិបតី ត្រាំ ត្រូវបានអ្នកកាសែតម្នាក់សួរថា «គោលនយោបាយប្រទេសអាមេរិកជាអាទិភាព» កំពុងធ្វើឲ្យប៉ះពាល់សម្ព័ន្ធមិត្តដ៏ជិតស្និទ្ធបំផុតជាប្រពៃណីរបស់រដ្ឋាភិបាលក្រុងវ៉ាស៊ីនតោន នៅក្នុងតំបន់អាស៊ីប៉ាស៊ីហ្វិក។
ប្រធានាធិបតីត្រាំ បានធ្វើការឆ្លើយតប ខណៈដែលលោកនិយាយថា លោកបានទទួលឱនភាពខាងពាណិជ្ជកម្មដ៏ខ្លាំងបំផុតជាមួយសម្ព័ន្ធមិត្តរបស់យើង។ ប្រធានាធិបតី ត្រាំ បានថ្លែងថា៖ «យើងធ្វើការជាមួយសម្ព័ន្ធមិត្តរបស់យើង។ យើងគិតគូរសម្ព័ន្ធមិត្តរបស់យើង។ ហើយយើងថែមទាំងជួយសម្ព័ន្ធមិត្តរបស់យើងខាងយោធាទៀតផង»។
លោក Shinzo Abe នាយករដ្ឋមន្រ្តីជប៉ុនដែលជាម្ចាស់ផ្ទះរៀបចំសន្និសីទកំពូល G20 សង្ឃឹមថា នឹងទទួលបានការបញ្ជាក់ឡើងវិញជាពាក្យសម្តីដែលធ្វើឡើងជាសាធារ ណៈដោយប្រធានាធិបតី ត្រាំ នៅពេលដែលពួកអស់លោកជួបគ្នានៅព្រឹកថ្ងៃសុក្រនេះក្នុងទីក្រុងអូសាកា។
ប្រធានាធិបតី ត្រាំ បាននិយាយក្នុងអំឡុងនៃការសម្ភាសន៍តាមទូរស័ព្ទជាមួយបណ្តាញទូរទស្សន៍ Fox Business News កាលពីថ្ងៃពុធថា៖ «ប្រសិនបើ ជប៉ុនរងការវាយប្រហារ យើងនឹងធ្វើសង្គ្រាមលោកលើកទី៣។ យើងនឹងប្រយុទ្ធយ៉ាងខ្លាំង ក៏ប៉ុន្តែ ប្រសិនបើយើងត្រូវគេវាយប្រហារ ជប៉ុន មិនត្រូវជួយយើងទេ។ ពួកគេអាចមើលតាមទូរទស្សន៍សូនី»៕
