ភ្ជាប់​ទៅ​គេហទំព័រ​ទាក់ទង

លោក​ត្រាំ​ថា​លោក​បាន​ដាក់​សំពាធ​​ខ្លាំងៗ​២ដង​ទៅ​លើ​លោក Putin អំពី​ការ​ជ្រៀត​ជ្រែក​ការបោះឆ្នោត​អាមេរិក


លោក ដូណាល់ ត្រាំ (ស្តាំ) និង​លោក​ Vladimir Putin ក្នុង​​ជំនួបនៅ​ឯក​កិច្ច​ប្រជុំ​កំពូល​នៃ​ក្រុម​ប្រទេស G-20 កាល​ពី​ថ្ងៃទី​៧ ខែ​កក្កដា នៅ​ប្រទេស​អាល្លឺម៉ង់។

ប្រធានាធិបតី​អាមេរិក លោក​ ដូណាល់ ត្រាំ​ បាន​ថ្លែង​កាល​ពី​ថ្ងៃ​អាទិត្យ​ថា លោក​បាន​ដាក់​សំពាធ​យ៉ាង​ខ្លាំង​ចំនួន​២​ដង​ទៅ​លើ​ប្រធានាធិបតី​រុស្ស៊ី លោក ​Vladimir Putin ​អំពី​ការ​ជ្រៀតជ្រែក​របស់​រុស្ស៊ី​ទៅ​លើ​ការបោះឆ្នោត​របស់​អាមេរិក​កាល​ពី​ឆ្នាំ​មុន ហើយ​ឥឡូវ​នេះ គឺ​ជា​ពេល​ដែល​ត្រូវ​បន្ត​ឆ្ពោះ​ទៅ​មុខ​នៅ​ក្នុង​ការ​សហការ​បែប​ស្ថាបនា​ជាមួយ​នឹង​រដ្ឋាភិបាល​ក្រុង​មូស្គូ។​

នៅ​ក្នុង​ប្រអប់​បញ្ចេញ​មតិ​មួយ​ចំនួន​លើ​បណ្តាញ​សង្គម​ Twitter​ បន្ទាប់​ពី​ត្រឡប់​មក​កាន់​រដ្ឋធានី​វ៉ាស៊ីនតោនពី​កិច្ចប្រជុំ​កំពូល​នៅ​ទីក្រុង ​Hamburg ​ក្នុង​ប្រទេស​អាល្លឺម៉ង់ លោក ត្រាំ​ បាន​គូស​បញ្ជាក់​ថា លោក Putin បាន​បដិសេធ​ដាច់​អហង្កការ​ចំពោះ​តួនាទី​របស់​រុស្ស៊ី​នៅ​ក្នុង​ការ​ជ្រៀតជ្រែក​លើ​ការ​បោះឆ្នោត​អាមេរិក ហើយ​ថា​លោក​និង​មេដឹកនាំ​រុស្ស៊ី​បាន​«ពិភាក្សា​គ្នា​បង្កើត​ក្រុម​ការងារ​សន្តិសុខ​ប្រព័ន្ធ​កុំព្យូទ័រ​ឬ​ជា​ភាសា​អង់គ្លេស​ហៅ​ថា​ Cyber Security ​ដ៏​រឹងមាំ ដូច្នេះ​ការ​ជ្រៀតជ្រែក​ការ​បោះឆ្នោត​និង​រឿង​អាក្រក់​ដទៃទៀត នឹង​ត្រូវ​បាន​ការពារ​និង​មាន​សុវត្ថិភាព‍»។

តំណាង​រាស្ត្រ​សំខាន់ៗ​ខាង​គណបក្ស​សាធារណរដ្ឋ យល់​ថា​គំនិត​របស់​លោក ត្រាំ​ ក្នុង​ការ​សហការ​ជាមួយ​នឹងរុស្ស៊ី​ទៅ​លើ​កិច្ចព្រមព្រៀង​សន្តិសុខ​កុំព្យូទ័រ​គឺ​ជា​រឿង​គួរ​ឲ្យ​អស់​សំណើច។ ​លោក ​Lindsey Graham សមាជិក​ព្រឹទ្ធសភា​បាន​ថ្លែង​ក្នុង​កម្មវិធី Meet the Press​ របស់​ទូរទស្សន៍ ​NBC ថា៖ «វា​មិន​មែន​ជា​គំនិត​ដ៏​ល្ងីល្ងើរ​បំផុត​ដែល​ខ្ញុំ​ធ្លាប់​ឭ​នោះ​ទេ ប៉ុន្តែ​គំនិត​នេះ​គឺ​ជិត​ដូច​អញ្ចឹង​ហើយ‍»។

លោក​ Rex Tillerson​ រដ្ឋមន្ត្រី​ការបរទេស​អាមេរិក​បាន​ថ្លែង​នៅ​ក្នុង​ទីក្រុង​កៀវ​ថា ការ​ជ្រៀត​ជ្រែក​របស់​រុស្ស៊ី​នៅ​ក្នុង​ការ​បោះឆ្នោត​កាល​ពី​ខែ​វិច្ឆិកា​ នៅ​តែ​ជា​ឧបសគ្គ​រារាំង​ដល់​ទំនាក់​ទំនង​រវាង​ប្រទេស​ទាំង​ពីរ។

​លោក​ Reince Priebus នាយ​ខុទ្ទកាល័យ​សេតវិមាន បាន​ថ្លែង​ទៅ​កាន់​ទូរទស្សន៍ ​Fox News ថា លោក Trump ​«ពិត​ជា​មិន​ជឿ​លើ​ទាល់​តែ​សោះ‍» លើ​ការ​បដិសេធ​របស់​លោក Putin ទៅ​លើ​ការ​ជ្រៀតជ្រែក​របស់​រុស្ស៊ី​នៅ​ក្នុង​ការ​បោះឆ្នោត​របស់​អាមេរិក៕

XS
SM
MD
LG