ក្រុមមន្ត្រីសន្តិសុខជាតិក្នុងរដ្ឋធានីវ៉ាស៊ីនតោន កំពុងបដិសេធអត្ថាធិប្បាយទៅលើសេចក្ដីរាយការណ៍របស់បណ្ដាញសារព័ត៌មាននានាដែលថា ប្រធានាធិបតីសហរដ្ឋអាមេរិក លោក ដូណាល់ ត្រាំ កាលពីថ្ងៃព្រហស្បតិ៍ បានយល់ព្រមឱ្យយោធាអាមេរិកបើកការវាយប្រហារទៅលើប្រទេសអ៊ីរ៉ង់វិញ ជាការឆ្លើយតបទៅនឹងការបាញ់ទម្លាក់យន្តហោះស៊ើបយកការណ៍គ្មានមនុស្សបើករបស់អាមេរិក ប៉ុន្តែក្រោយមកក៏បានដកការអនុញ្ញាតឱ្យវាយប្រហារនោះទៅវិញ ដោយមិនបញ្ជាក់ពីមូលហេតុ។
ដំបូងឡើយ លោក ត្រាំ បានអនុញ្ញាតឱ្យមានការវាយប្រហារទៅលើគោលដៅអ៊ីរ៉ង់មួយចំនួន ដូចជាកន្លែងបញ្ជាប្រព័ន្ធរ៉ាដានិងកាំជ្រួច ដូចដែលកាសែតThe New York Times បានរាយការណ៍មុនគេបង្អស់។
កាសែត The Washington Post និងប្រព័ន្ធផ្សព្វផ្សាយដទៃទៀត ក៏បានរាយការណ៍បន្តបន្ទាប់មកទៀតថា មន្ត្រីរដ្ឋាភិបាលអាមេរិកបាននិយាយថា លោកប្រធានាធិបតី ត្រាំ បានយល់ព្រមឱ្យមានការវាយបកទៅវិញ។
ទន្ទឹមពេលជាមួយគ្នានេះ សារព័ត៌មាន Reuters បានរាយការណ៍ថា រដ្ឋាភិបាលអ៊ីរ៉ង់បានថ្លែងប្រាប់ទីភ្នាក់ងារសារព័ត៌មាននេះថា អ៊ីរ៉ង់បានទទួលសារមួយពីប្រធានាធិបតី ត្រាំ តាមរយៈប្រទេសអូម៉ង់កាលពីពាក់កណ្ដាលយប់ ដោយព្រមានអំពីការវាយប្រហារមួយដែលនឹងកើតមានលើប្រទេសអ៊ីរ៉ង់៕
