លោកប្រធានាធិបតីសហរដ្ឋអាមេរិក ដូណាល់ ត្រាំ និយាយថា លោកសង្ឃឹមថា ការចរចាដែលរៀបចំថ្មីរវាងកូរ៉េខាងជើងនិងកូរ៉េខាងត្បូងនឹងទៅហួសពី«កីឡាអូឡាំពិក»ហើយលោកប្រធានាធិបតី ត្រាំ បានសន្យាថា សហរដ្ឋអាមេរិកនឹងចូលរួម «នៅពេលវេលាដ៏សមរម្យមួយ»។
ប្រធានាធិបតីត្រាំបានធ្វើសន្និសីទកាសែតខុសពីធម្មតាមួយកាលពីថ្ងៃសៅរ៍ពីកន្លែងឈប់សម្រាកប្រធានាធិបតី Camp David ដែលនៅទីនោះលោកបានជួបជាមួយសមាជិកសភាខាងគណបក្សសាធារណរដ្ឋ។ ការចរចានៅពេលខាងមុខរវាងរដ្ឋាភិបាលក្រុងសេអ៊ូលនិងរដ្ឋាភិបាលក្រុងព្យុងយ៉ាង ប្រធានាធិបតី ត្រាំបាននិយាយថា៖ «ខ្ញុំសង្ឃឹមថាការណ៍នេះនឹងមានដំណើរការល្អ»។
លោកប្រធានាធិបតីអាមេរិកដូណាល់ ត្រាំនិយាយថា «ខ្ញុំចង់ឃើញពួកគេចរចាគ្នាហួសពីកីឡាអូឡាំពិក។ហើយនៅពេលវេលាដ៏សមរម្យ យើងនឹងទាក់ទិននៅក្នុងការចរចានោះ»។
កូរ៉េខាងជើងបានសុខចិត្តទទួលយកសំណើរនៃការចរចាកម្រិតខ្ពស់របស់កូរ៉េ ខាងត្បូងកាលពីថ្ងៃសុក្រ ស្តីពីការប្រកួតកីឡាអូឡាំពិកនៅពេលខាងមុខដែលធ្វើឡើងនៅថ្ងៃទី៩ ខែមករានេះនៅឯភូមិយុទ្ធសន្តិភាព Panmunjom នៅក្នុងតំបន់ដែលគ្មានយោធាដែលមានការយាមដ៏តឹងរ៉ឹងដែលបានបែងចែកកូរ៉េជា២។
យោងតាមក្រសួងបង្រួបបង្រួមជាតិរបស់កូរ៉េខាងត្បូងបានប្រាប់ឲ្យដឹងថា កូរ៉េខាងជើង កាលពីព្រឹកថ្ងៃសុក្រ បានផ្ញើរសារដែលប្រាប់ឲ្យដឹងថា ខ្លួនសុខចិត្តទទួលយកសំណើររបស់កូរ៉េខាងត្បូងដើម្បីជួបគ្នានៅឯភូមិព្រំដែនដើម្បីពិភាក្សាពីកិច្ចសហប្រតិបត្តិការកីឡាអូឡាំពិក ហើយនឹងធ្វើឲ្យប្រសើរឡើងនូវចំណងទាក់ទង៕
