សហរដ្ឋអាមេរិកនិងប្រទេសកូរ៉េខាងត្បូងបានសម្រេចពន្យារពេលការធ្វើសមយុទ្ធយោធារួមគ្នារហូតបន្ទាប់ពីកីឡាអូឡាំពិករដូវរងានៅក្នុងទីក្រុង Pyeongchang នៅខែក្រោយនេះ នេះយោងតាមពួកមន្រ្តីមកពីប្រទេសទាំង២។
ការិយាល័យប្រធានាធិបតីរបស់កូរ៉េខាងត្បូងបានប្រាប់ឲ្យដឹងថា ការសម្រេចនេះបានកើតមានឡើងក្នុងអំឡុងនៃការនិយាយទូរសព្ទរវាងប្រធានាធិបតីសហរដ្ឋអាមេរិកដូណាល់ ត្រាំនិងប្រធានាធិបតីកូរ៉េខាងត្បូងMoon Jae-inកាលពីថ្ងៃព្រឹកថ្ងៃព្រហស្បតិ៍។
សេចក្តីថ្លែងការណ៍របស់សេតវិមានបានប្រាប់ឲ្យដឹងថា មេដឹកនាំទាំង២បានព្រមព្រៀងគ្នាកាត់បន្ថយជម្លោះនៅប្រកួតកីឡាអូឡាំពិកនិងសមយុទ្ធយោធារបស់យើងដែលកងទ័ពសហរដ្ឋអាមេរិកនិងកូរ៉េខាងត្បូងអាចផ្តោតលើការធ្វើឲ្យមានសន្តិសុខដល់ការប្រកួតកីឡានោះ។
កាលពីព្រឹកថ្ងៃព្រហស្បតិ៍ លោកវរសេនីយឯកRobert Manning អ្នកនាំពាក្យក្រ សួងការពារប្រទេសសហរដ្ឋអាមេរិកបាននិយាយថា «ក្រសួងការពារប្រទេសគាំទ្រការសម្រេចរបស់ប្រធានាធិបតីហើយនឹងអ្វីដែលជាផលប្រយោជន៍ដ៏ល្អបំផុតរបស់សាធារណរដ្ឋកូរ៉េដែលជាសម្ព័ន្ធមិត្តរបស់សហរដ្ឋអាមេរិក»។
សមយុទ្ធយោធារួមគ្នាប្រចាំឆ្នាំដែលគេហៅថា Foal Eagle ជាធម្មតាបានធ្វើឡើងនៅចន្លោះខែកុម្ភៈនិងខែមេសាហើយជាសមយុទ្ធដ៏ធំបំផុតបង្អស់មួយរបស់ពិភព លោក។ សមយុទ្ធយោធានោះរួមមានកិច្ចប្រតិបត្តិការកងទ័ពថ្មើរជើង ទ័ពអាកាស នាវានិងកិច្ចប្រតិបត្តិការពិសេសដើម្បីបង្កើនការប្រុងប្រៀបខ្លួនដើម្បីការពារប្រទេសកូរ៉េខាងត្បូងនិងតំបន់។ កូរ៉េខាងជើងបានច្រានចោលជាប្រចាំដល់សមយុទ្ធយោធានោះ៕
