ខណៈពេលមានភាពចម្រូងចម្រាសនៅជុំវិញ លោក Donald Trump នៅក្នុងការប្រកួតប្រជែង ជ្រើសរើសប្រធានាធិបតី បេក្ខជនប្រធានាធិបតីខាងគណបក្សសាធារណរដ្ឋរូបនេះ ក៏ជាការផ្តោតអារម្មណ៍ នៅក្នុងការប្រកួតប្រជែងតាក់តែងច្បាប់ ដែលនឹងកំណត់ថា តើគណបក្សមួយណាអាចកាន់កាប់សភានោះ។
យោងតាមស្ថានភាពនយោបាយក្នុងឆ្នាំនេះ ហាក់ដូចជាបង្ហាញថា គណបក្សប្រជាធិបតេយ្យ ទំនងជានឹងឈ្នះសំឡេងភាគច្រើននៅព្រឹទ្ធសភា ប៉ុន្តែមានភ័ស្តុតាងតិចតួច បង្ហាញថា បញ្ហារបស់លោក Trump កំពុងបំផ្លាញបេក្ខជនព្រឹទ្ធសភាខាងគណបក្សសាធារណរដ្ឋ។
គណបក្សប្រជាធិបតេយ្យកំពុងផ្តោតលើការរិះគន់លោក Donald Trump។ លោកស្រី Clinton ថ្លែងថា៖ «ពិភពលោកទាំងមូលបានដឹង ពីទង្វើររបស់លោកTrump ទៅលើមនុស្សស្រី»។
ហើយភ្ជាប់សមាជិកសភារបស់គណបក្សសាធារណរដ្ឋ ទៅបេក្ខជនប្រធានាធិបតីរបស់ខ្លួន ដោយប្រើប្រាស់ភាសារបស់ខ្លួនប្រឆាំងនឹងបញ្ហាទាំងនោះ។ គណៈកម្មាធិការរៀបចំយុទ្ធនាការថ្លែងថា៖ «ខ្ញុំគិតថា យើងនឹងធ្វើឲ្យអាមេរិកជាប្រទេសអស្ចារ្យម្តងទៀត ពិតមែនទេ?»។ «ខ្ញុំគាំទ្របេក្ខជនខាងគណបក្សសាធារណរដ្ឋ»។ «ខ្ញុំមានគម្រោងគាំទ្របេក្ខជនខាងគណបក្សសាធារណរដ្ឋ»។
ថ្មីៗនេះ សមាជិកគណបក្សសាធារណរដ្ឋមួយចំនួនបានច្រានចោល លោក Donald Trump ទាំងស្រុង។
លោក John Mccain ថា៖ «កាលដែលខ្ញុំច្រានចោលបេក្ខជននៃគណបក្សរបស់ខ្ញុំ មិនមែនជាការធ្វើឲ្យខ្ញុំរីករាយនោះទេ»។
អ្នកផ្សេងទៀត ដែលម្តងគាំទ្រ ម្តងមិនគាំទ្រលោកTrump ឬគាំទ្រលោកដោយស្ទាក់ស្ទើរលើកឡើងថា លោកស្រី Hillary Clinton អាក្រក់ជាងលោក Trump ទៅទៀត។
លោកMarco Rubio ថា៖ «ខ្ញុំមិនទុកចិត្តលោកស្រី Hillary Clintonជាមួយនឹងពត៌មានសម្ងាត់ទេ។ លោកស្រីបានបង្ហាញថា លោកស្រីមិនអាចចាត់ចែងរឿងនេះបានទេ»។
លោក John Feehery ថ្លែថា៖ «បញ្ហាធំជាងគេសម្រាប់អ្នកសាធារណរដ្ឋភាគច្រើន គឺក្រុមអ្នកគាំទ្ររបស់ពួកគេតាំងពីដំបូង គឺអ្នកដែលនឹងត្រូវចេញមកបោះឆ្នោតនោះ នៅតែគាំទ្រលោក Donald Trump»។
គណបក្សប្រជាធិបតេយ្យចាំបាច់ ត្រូវរកឲ្យបានអាសនៈចំនួន៤ បន្ថែមទៀត ដើម្បីទទួលបានចំនួនភាគច្រើនក្នុងព្រឹទ្ធសភា ប្រសិនបើ លោកស្រី Clinton ឈ្នះជាប្រធានាធិបតី ក៏ប៉ុន្តែបើសិនជាលោកTrump ឈ្នះវិញ នោះគណបក្សប្រជាធិបតេយ្យត្រូវរកឲ្យបាន៥ អាសនៈ។
លោក Chuck Schumer ថា៖«ខ្ញុំគិតថា យើងនឹងឈ្នះចំនួនភាគច្រើនក្នុងព្រឹទ្ធសភា។ គណបក្សសាធារណរដ្ឋកំពុងតែបែកបាក់គ្នា ហើយសមាជិកព្រឹទ្ធសភា ដែលកំពុងតែកាន់អំណាច មិនអាចសម្រេចចិត្ត ថាត្រូវធ្វើយ៉ាងណាចំពោះលោក Trumpនោះ»។
គណបក្សសាធារណរដ្ឋកំពុងតែការពារអាសនៈរបស់ខ្លួន ដែលមានចំនួនច្រើនជាង ២ដងនៃអាសនៈ ដែលគណបក្សប្រជាធិបតេយ្យមាន ក្នុងឆ្នាំនេះ រួមទាំងអាសនៈមួយចំនួននៅក្នុងរដ្ឋ ដែលមានទំនោរទៅគណបក្សប្រជាធិបតេយ្យ។ សមាជិកព្រឹទ្ធសភាជាន់ខ្ពស់ខាងគណបក្សសាធារណរដ្ឋ ទទួលស្គាល់ឧបសគ្គទាំងនេះ។
លោក Mitch Macconnel ថា៖ «វាដូចជាការប្រយុទ្ធគ្នាប្រើកាំបិត នៅក្នុងទូរទូរស័ព្ទអញ្ជឹង យើងមិនដឹងថាអ្នកណាឈ្នះ អ្នកណាចាញ់ឡើយ»។
ប៉ុន្តែការស្ទង់មតិ មិនបង្ហាញពីគ្រោះមហន្តរាយរបស់គណបក្សសាធារណរដ្ឋទេ។ ក្រុមសមាជិកព្រឹទ្ធសភាជាន់ខ្ពស់របស់ គណបក្សមានការនាំមុខច្រើន មុនការបោះឆ្នោតសារជាថ្មី។ ចំពោះអ្នកផ្សេងទៀត ចាញ់គូប្រកួតប្រជែងខាងគណបក្សប្រជាធិបតេយ្យ តែបន្តិចបន្តួចប៉ុណ្ណោះ ឬនាំមុខនៅក្នុងការស្ទង់មតិ ដោយបានលើកឡើង ពីភាពចាំបាច់ក្នុងការទប់ទល់ជាមួយនឹងលទ្ធភាព ដែលលោកស្រី Clinton អាចក្លាយជាប្រធានាធិបតីបាន។
លោក Marco Rubio ថា៖ «មិនថាអ្នកណាឈ្នះការបោះឆ្នោតនេះ អ្នកនឹងត្រូវការមនុស្សនៅក្នុងព្រឹទ្ធសភាសហរដ្ឋអាមេរិក ដែលមានឆន្ទៈឈរជាប់នឹងប្រធានាធិបតីសហរដ្ឋអាមេរិក»។
ទោះជាដូច្នោះក៏ដោយ ក្រុមអ្នករៀបចំយុទ្ធសាស្រ្តខាងគណបក្សសាធារណរដ្ឋទទួលស្គាល់ថា លោក Trump អាចធ្វើឲ្យគណបក្សសាធារណបាត់បង់អាសនៈនៅក្នុងសភា។
លោក John Feehery ថា៖ «ប្រសិនបើលោក Donald Trump ចាញ់ការបោះឆ្នោតនេះ១០ពិន្ទុ នោះសភាតំណាងរាស្រ្ត ស្ថិតក្នុងភាពគ្រោះថ្នាក់។ ចំណែកឯព្រឹទ្ធសភានៅមិនទាន់ដឹងថាអ្នកណាជាអ្នកឈ្នះនោះទេ»។
ឥឡូវនេះ គណបក្សប្រជាធិបតេយ្យ នឹងនៅតែភ្ជាប់ គណបក្សសាធារណ ទៅនឹងលោកTrump។
តើអ្នកនឹងប្រាប់កូនរបស់អ្នកឲ្យធ្វើដូចជាលោកTrumpទេ? តើអ្នកនឹងប្រាប់គេឲ្យយកលោក Trump ធ្វើជាមនុស្សគំរូដែរឬទេ? ពិតហើយ ហើយគណបក្សសាធារណរដ្ឋនឹង ព្យាយាមបង្វែររឿងនេះ។
ទាំងលោក Donald Trump និងលោកស្រី Hillary Clinton មិនមែនជាបេក្ខជនដែលល្អឥតខ្ចោះនោះទេ។ ហើយខ្ញុំក៏មិនមែនជាមនុស្ស ដែលល្អឥតខ្ចោះដែរ៕
ប្រែសម្រួលដោយ ស៊ូ ពេជ្រចិន្តា
