បេក្ខជនប្រធានាធិបតីសហរដ្ឋអាមេរិកទាំងពីរ គឺលោកស្រី Hillary Clinton និងលោក Donald Trump កំពុងផ្ដោតយុទ្ធនាការឃោសនាបោះឆ្នោតរបស់ពួកគេនៅថ្ងៃអង្គារនេះ នៅក្នុងរដ្ឋ Florida ដែលជារដ្ឋមួយដែលនឹងដើរតួនាទីយ៉ាងសំខាន់នៅក្នុងរយៈពេលពីរសប្ដាហ៍មុនការបោះឆ្នោតចូលមកដល់ ដែលនៅពេលនោះ ពលរដ្ឋអាមេរិកាំងនឹងធ្វើការសម្រេចចិត្តថាតើបេក្ខជនរូបណាដែលពួកគេនឹងជ្រើសរើសឲ្យធ្វើជាប្រធានាធិបតីសហរដ្ឋអាមេរិកបន្ទាប់នោះ។
ដើម្បីក្លាយជាប្រធានាធិបតីសហរដ្ឋអាមេរិក បេក្ខជននីមួយៗត្រូវការសំឡេងគាំទ្រពីគណៈកម្មការជ្រើសរើសប្រធានាធិបតីចំនួន ២៧០ សំឡេង។ នៅក្រោមប្រព័ន្ធរើសប្រធានាធិបតីនេះ រដ្ឋណាដែលមានប្រជាជនច្រើន រដ្ឋនោះមានឥទ្ធិពលខ្លាំងលើការបោះឆ្នោត។ ចំពោះបេក្ខជនណាដែលឈ្នះនៅក្នុងរដ្ឋ Florida បេក្ខជននោះនឹងទទួលបាន ២៩ សំឡេង ពីគណៈកម្មការជ្រើសរើសប្រធានាធិបតី។ ការស្ទង់មតិនាពេលថ្មីៗនេះ បានបង្ហាញថា លោកស្រី Clinton បាននាំមុខលោក Trump ប្រហែល ៤ ពិន្ទុ នៅក្នុងរដ្ឋ Florida។
លោក Trump បានធ្វើយុទ្ធនាការនៅក្នុងរដ្ឋ Florida តាំងពីថ្ងៃចន្ទម្សិលមិញម្ល៉េះ ដែលក្នុងនោះមានទាំងការធ្វើយុទ្ធនាការរបស់លោកនៅក្នុងទីក្រុង Tampa។ នៅក្នុងយុទ្ធនាការរបស់លោកនៅក្នុងទីក្រុង Tampa លោក Trump បានប្រកាសថា លោកនឹងមិនត្រឹមតែឈ្នះនៅក្នុងរដ្ឋ Florida តែប៉ុណ្ណោះទេ តែថែមទាំងឈ្នះការបោះឆ្នោតថ្នាក់ជាតិនេះផង។
លោក Trump និយាយយ៉ាងដូច្នេះថា៖ «យុទ្ធនាការរបស់យើងតំណាងឲ្យការផ្លាស់ប្ដូរមួយប្រភេទ ដែលអាចកើតឡើងតែម្ដងគត់នៅក្នុងជីវិត។ នេះជាឱកាសចុងក្រោយរបស់យើង។ អ្នកត្រូវតែចេញទៅបោះឆ្នោត»។
រីឯលោកស្រី Clinton វិញ លោកស្រីបានចំណាយពេលកាលពីថ្ងៃចន្ទម្សិលមិញធ្វើយុទ្ធនាការនៅក្នុងរដ្ឋ New Hampshire ដែលនៅទីនោះ លោកស្រីបានធ្វើការរិះគន់ចំពោះភាពស័ក្ដិសមរបស់លោក Trump ក្នុងការធ្វើជាប្រធានាធិបតី។
លោកស្រីបាននិយាយយ៉ាងដូច្នេះថា៖ «លោក Trump ខ្លួនឯង បានបង្ហាញឲ្យពិភពលោកឃើញថា តើនឹងមានលទ្ធផលបែបណានៅពេលដែលប្រទេសមួយមានមេបញ្ជាការទ័ព ដែលជាប្រធានាធិបតីមិនមានសមត្ថភាពគ្រប់គ្រាន់នោះ»៕
