ប្រធានាធិបតីសហរដ្ឋអាមេរិកលោក ដូណាល់ ត្រាំ កំពុងប្រុងប្រៀបអនុវត្តគោលនយោបាយអន្តោប្រវេសន៍កាន់តែតឹងរ៉ឹងឡើង បន្ទាប់ពីការបណ្តេញលោកស្រី Kirstjen Nielsen រដ្ឋមន្រ្តីក្រសួងសន្តិសុខមាតុភូមិភ្លាមៗ កាលពីថ្ងៃអាទិត្យ។
ក្រុមមន្រ្តីសហរដ្ឋអាមេរិក និយាយថា វិបត្តិជនអន្តោប្រវេសន៍មានស្ថានភាពកាន់តែធ្ងន់ធ្ងរឡើងៗ ក្នុងប៉ុន្មានសប្តាហ៍ថ្មីៗនេះ ហើយមានសេចក្តីរាយការណ៍ថា ប្រធានាធិបតី ត្រាំ កំពុងពិចារណាដាក់ឲ្យប្រើឡើងវិញនូវគោលនយោបាយគ្មានប្រជាប្រិយភាព ដែលបំបែកកូនចៅជនចំណាកស្រុកចេញពីក្រុមគ្រួសាររបស់ពួកគេ។
ថ្វីបើមានគោលនយោបាយតឹងរ៉ឹងរបស់រដ្ឋបាលលោក ត្រាំ ក៏ដោយ ក៏ជនចំណាកស្រុកដែលរត់គេចចេញពីភាពក្រីក្រ និងឧក្រិដ្ឋកម្មក្នុងប្រទេសហ្វាតេម៉ាឡា អែលសាវ៉ាឌ័រ និងប្រទេសហុងឌុយរ៉ាស បន្តធ្វើដំណើរកាត់តាមប្រទេសម៉ិចស៊ិក ដើម្បីព្យាយាមចូលក្នុងសហរដ្ឋអាមេរិក។
សម្រាប់ខែកុម្ភៈ បុគ្គលចំនួន ៧ម៉ឺន៦ពាន់នាក់ ភាគច្រើនជាក្រុមគ្រួសារ ត្រូវបានចាប់ខ្លួននៅព្រំដែនភាគនិរតី។
ប្រធានាធិបតីដូណាល់ ត្រាំ ដែលបានធ្វើយុទ្ធនាការលើការពង្រឹងសន្តិសុខព្រំដែន មានការមួម៉ៅកាន់តែខ្លាំងឡើងជាមួយលោកស្រី Kirstjen Nielsen រដ្ឋមន្រ្តីក្រសួងសន្តិសុខមាតុភូមិ ហើយបានបណ្តេញលោកស្រីចេញពីដំណែងកាលពីថ្ងៃអាទិត្យ។
លោកស្រី Kirstjen Nielsen បានថ្លែងត្រួសៗ កាលពីថ្ងៃចន្ទថា៖ «ខ្ញុំមានគោលបំណងការពារព្រំដែនដូចជាលោកប្រធានាធិបតីដែរ។ ខ្ញុំនឹងបន្តគាំទ្រការខំប្រឹងប្រែងទាំងអស់ ដើម្បីដោះស្រាយវិបត្តិមនុស្សធម៌ និងសន្តិសុខនៅតាមព្រំដែន»។
ប្រធានាធិបតី ត្រាំ បានប្រកាសថា លោក Kevin McAleenan អគ្គស្នងការគយ និងការពារព្រំដែនសហរដ្ឋអាមេរិកនៅពេលបច្ចុប្បន្ននេះ នឹងក្លាយជារដ្ឋមន្រ្តីស្តីទីដើម្បីជំនួសលោកស្រី Nielsen ហើយថា លោកបានបង្ហាញនូវការប្រុងប្រៀបជាស្រេច ហើយសម្រាប់គោលនយោបាយកាន់តែតឹងឡើងលើជនអន្តោប្រវេសន៍។
កាលពីថ្ងៃចន្ទ សេតវិមានមិនបានបដិសេធថា លោកប្រធានាធិបតី ត្រាំ កំពុងពិចារណាការដាក់ឲ្យប្រើប្រាស់ឡើងវិញនូវគោលនយោបាយដើម្បីបំបែកកូនចៅជនចំណាកស្រុកពីក្រុមគ្រួសាររបស់ពួកគេនៅឯព្រំដែនទេ។
លោក Hogan Gidley អ្នកនាំពាក្យរងរបស់សេតវិមាន បានថ្លែងថា៖ «លោកអ្នកដឹងហើយថា ការបំបែកកូនក្មេងចេញពីក្រុមគ្រួសារ ដែលលោកប្រធានាធិបតីបាននិយាយកាលពីពេលមុននោះ លោកមិនចូលចិត្តទេ។ វាជាការអនុវត្តប្រកបដោយភាពព្រៃផ្សៃ។ ក៏ប៉ុន្តែសភាមានមធ្យោបាយដើម្បីកែតម្រូវបញ្ហានេះ។ ដូច្នេះការណ៍នេះនឹងមិនមែនជាការទាក់ទាញសម្រាប់មនុស្សមកទីនេះ ហើយប្រើកូនក្មេងធ្វើដូច្នេះទេ»។
ការបំបែកក្រុមគ្រួសារត្រូវបានអនុវត្ត ចាប់តាំងពីខែមេសា រហូតដល់ ខែមិថុនា ឆ្នាំទៅ ហើយត្រូវបានច្រានចោលដោយការសម្រេចនៅក្នុងតុលាការ។ ការបំបែកក្រុមគ្រួសារនេះបានប្រឈមការខឹងសម្បារជាសាធារណៈយ៉ាងខ្លាំង ហើយមិនបានកាត់បន្ថយចំនួនជនចំណាកស្រុកទេ។
លោក Cristobal Ramon នៃមជ្ឈមណ្ឌលគោលនយោបាយរបស់គណបក្សទាំង ២ បាននិយាយថា៖ «តាមការពិត បុគ្គលកាន់តែច្រើនឡើងបានមកទីនេះ។ ដូច្នេះ ខ្ញុំគិតថា រដ្ឋបាលនេះដែលព្យាយាមស្វែងរកមធ្យោបាយដើម្បីកំញើញបុគ្គលទាំងនោះ ក៏ប៉ុន្តែបញ្ហាគឺថា ការកំញើញមិនបានដោះស្រាយស្ថានភាពក្នុងប្រទេសដែលបានធ្វើឲ្យជនចំណាកស្រុកនោះមកទេ។ ឧទាហរណ៍ ការកំញើញនោះ នឹងមិនដោះស្រាយអំពើហិង្សា និងមិនដោះស្រាយភាពក្រីក្រ ហើយវានឹងមិនដោះស្រាយការពិតដែលថា បុគ្គលទាំងអស់នោះមើលមិនឃើញជម្រើសណាផ្សេងទៀត»។
ប្រធានាធិបតី ត្រាំ បានបន្តស្តីបន្ទោសពួកគណបក្សប្រជាធិបតេយ្យដែលជាគណបក្សប្រឆាំង ដែលកំពុងជំទាស់ប្រឆាំងការប្រកាសប្រទេសមានភាពអាសន្នរបស់លោកនៅឯព្រំដែន។
លោកប្រធានាធិបតី ដូណាល់ ត្រាំ បានថ្លែងថា៖ «ជាអកុសល ពួកគណបក្សប្រជាធិបតេយ្យបានបដិសេធពុំព្រមបិទភាពចន្លោះប្រហោងនៃច្បាប់អន្តោប្រវេសន៍។ នេះប្រាកដជាអ្វីដែលសំខាន់»។
កាលពីថ្ងៃព្រហស្បតិ៍សប្តាហ៍មុន ប្រធានាធិបតី ត្រាំ បានបញ្ឈប់ការគំរាមរបស់លោកដើម្បីបិទព្រំដែនភាគខាងត្បូង ហើយបានសរសើរប្រទេសម៉ិចស៊ិកចំពោះការបញ្ឈប់លំហូរជនអន្តោប្រវេសន៍។ ក៏ប៉ុន្តែនៅចុងសប្តាហ៍នេះ លោកបានបញ្ជាឲ្យជំនួយការរបស់លោក ចាត់វិធានការកាន់តឹងរ៉ឹងឡើង ដើម្បីដោះស្រាយបញ្ហានេះ ហើយមានសេចក្តីរាយការណ៍ថា លោកកំពុងពិចារណាពីការបណ្តេញអ្នកជំនួយការកាន់តែច្រើនឡើង៕
ប្រែសម្រួលដោយជឹង ប៉ូជីន
